Taratasy Voaloha’e Hoahy o Korintianao

5 Nisy nanao tatetse tie, misy mijangajanga ty ama’areo eo, ie amy izao fijangajangagne tsy fitrea ndra amo o firenena hafao agne aza, satria misy lahilahy manambaly ty valin-drae’e. 2 Faie tsy toko’e hampirehareha anareo zay fa toko’e hampalahelo anareo, le hafaha’areo tsy ho ama’areo eo i lahilahy nanao i raha zaỳ. 3 Ndra tie tsy ama’areo agne aza raho, le agne ty saiko, sady fa nitsara i lahilahy manao ze raha zaỳ raho, manahake tihoe ama’areo agne. 4 Naho fa miarake mivory amy ty agnara i Jesosy Tompontikagney nareo, sady hai’areo tie ama’areo agne ty saiko naho ty hery i Jesosy Tompontikagne, 5 le tsy maintsy atolo’areo i Satana ze lahilahy zay, mba hagnafahagne i asa ty nofotsey tsy ho ama’areo eo, amy izay ho voaro ty toe-tsay o fiangonagneo agnate i andro i Tompoy.

6 Tsy soa ty raha irehareha’areo. Tsy fanta’areo vao fa lalivay* kedekede avao, le fa mampitombo i kobay iaby? 7 Afaho’areo i lalivay talohay, amy izay nareo ho koba vaovao satria tsy toko’e hisy lalivay nareo. Ty anto’e, fa natao sorogne ty Kristy, i anak’agnondry i Pasakeỳ. 8 Andao areke tika hankalaza i fetey, faie tsy amy i lalivay fa elay, le ty haratiagne naho ty haraty fagnahy, fa amy ty mofo tsy misy lalivay, ndra ty hatsotra fo naho ty hamaregnagne.

9 Nanoratse tama’areo raho mba tsy hifagnosehosea’areo amo o ndaty mpijangajangao. 10 Faie tsy ze mpijangajanga iaby amy ty tontolo toy eto, ndra ty ndaty tsy mete afa-po, ndra ty mpandrava magnente, ndra ty mpanompo sampy ty teako horehafegne. Fa naho ohatse izay, le tsy maintsy miala amy ty tontolo toy eto nareo. 11 Faie amy izao raho manoratse ama’areo mba tsy hifagnosehosea’areo sasa amy ze tokavegne tihoe rahalahy, faie mpijangajanga, ndra tsy mete afa-po, ndra mpanompo sampy, ndra mpanivetive, ndra mamo lava, ndra mpandrava magnente. Ko atao’areo ndra ty miarake mihinagne amy ty ndaty hoe izay aza. 12 Fa ino moa ty idirako amy ty fitsaragne ty ndaty ivela’e agne? Tsy inareo vao ty mitsara ty ndaty agnate’e ao, 13 le i Andrianagnahare ty mitsara ty ivela’e agne? “Asintaho tsy ho ama’areo eo i mpanao ratỳ.”