Akore ty Toko’e Hiheverantikagne i Tahina i Jehovah-y?

1-2. Akore ty ahafantarantika tie tena nilahibey tamy i Jesosy ty tahina i Jehovah?

TENA lahibey amy i Jesosy i tahina i Jehovah-y. Tena niambake ty fanohagna’e ty tahina i Baba’e. Nitreantika tamy i lahatsoratse taloha itoỳ tie nivognogne ty homate noho ty amy i tahina i Jehovah-y ty Jesosy. Niporofoe’e ka tie lava manao ty maregne avao ty Jehovah. (Mar. 14:36; Heb. 10:7-9) Afara i Fanjakà i Jesosy Arivo Taogney, le hovognogne hamoe ze fahefa’e iaby reke mba ho fagnamasignagne i tahina i Jehovah-y. (1 Kor. 15:26-28) Trea boake amy ty hatea i Jesosy i tahinan’Agnaharey tie manao akore ty fifandrambesa’e amy i Baba’e. Tsy isalasalagne fa tena tea’e ty Jehovah.

² Niavy tambone tane etoy tamy ty tahina i Baba’e ty Jesosy. (Jaona 5:43; 12:13) Nampahafantare’e o mpanonjohy ty lia’eo i tahina i Baba’ey. (Jaona 17:6, 26) Nampianatse sady nanao fahagagagne tamy ty tahina i Jehovah reke. (Jaona 10:25) Naho ty maregne, le nangatake tamy i Jehovah ty Jesosy, mba hiaro o mpiana’eo ‘noho i tahina’ey [Jehovah].’ (Jaona 17:11) Tena nilahibey tamy i Jesosy areke i tahina i Jehovah-y. Naho izay ty henteagne, afake mirehake vao ty ndaty raike tie mpanonjohy ty lia i Kristy, ie amy izao reke tsy mahafantatse ndra tsy mampiasa i tahina i Baba i Jesosỳ?

3. Inogne ty hodinehentika ato?

³ Tena sarobily amantika Kristiana i tahina i Baba i Jesosỳ satria mpanonjohy ty lia i Jesosy tikagne. (1 Pet. 2:21) Amy ty lahatsoratse toy, le hotreantikagne tie nagnino ty ndaty mitory ty “talily soa i Fanjakagney” ro tokavegne amy ty tahina i Jehovah. (Mat. 24:14) Horehafentikagne ka tie akore ty toko’e hiheverantika tsikiraidraike i tahina i Jehovah-y.

“NDATY HINDAY TY TAHINA’E”

4. a) Inogne ty raha nampanoe i Jesosy i apostoli’e rey taloha ty nionjona’e an-dagnitse agne? b) Inogne ty fagnonteneagne atera izay?

⁴ Taloha kede ty niheregna i Jesosy an-dagnitse agne, le nirehake tamo o mpiana’eo reke tie: “Hahazo hery nareo naho fa mahazo i fagnahy masigney, le ho vavolombeloko a Jerosalema agne, magneragne i Jodia naho i Samaria vaho amy ty faritse fara’e lavitse an-tane etoy.” (Asa. 1:8) Tsy a Israely ao avao ty itoriagne i talily soay. Naho fa nandeha ty fotoagne, le nanagne fahafahagne ty ho mpanonjohy ty lia i Jesosy ze ndaty amy ty firenena iaby. (Mat. 28:19, 20) Faie hoe ty Jesosy: ‘Ho vavolombeloko nareo.’ Nila nahafantatse ty tahina i Jehovah vao zane o mpianatse vaovao reo sa le fa toko’e ho vavolombelo i Jesosy avao? Ty raha niseho tantaraegne amy ty boke ty Asa o Apostolio 15 ao, le hagnampe antika hamale o fagnonteneagne iohoe.

5. Akore ty nanoroa ty apostoly naho ty androanavy ta Jerosalema tagne tie mila mahafantatse ty tahina i Jehovah o ndatio? (Henteo ka i sarey.)

⁵ Nivory ty apostoly naho ty androanavy ta Jerosalema tao tamy ty taogne 49. Nidinehe iareo tamy izay ty toko’e hatao o hafa firenena tsy mitapakeo mba hahavy iareo hanjare Kristiana. Tamy ty fifaragna i fifampirehafagney, le nirehake hoe izao ty Jakoba rahalahy i Jesosy: “Nitantarae i Simeona [Petera] tamantikagne teo tie, neken’Agnahare ka o ndaty boake amy ty firenena hafao. Amy izay reke mijobogne ndaty boake ao mba hinday ty tahina’e.” Ia o tahinagne tea i Jakoba horehafegne iohoe? Nagneregne ty raha nirehafe i Amosa mpaminany toy reke: “Amy izay ze ndaty sisa eo, hipay mafe i Jehovah miarake amo o ndaty boake amy ty firenena hafao. Hotokavegne amy ty agnarako o ndaty rehoe hoe ty Jehovah.” (Asa. 15:14-18) Tsy tihoe mila mianatse ty miomba i Jehovah avao o ndaty vaovao rehoe fa mila ‘tokavegne amy ty tahina’e’ ka. Midika zay tie, toko’e hampahafantatse i tahinan’Agnaharey iareo sady io ka ty toko’e hahafantaragne iareo.

6-7. a) Nagnino ty Jesosy ro niavy tan-tane etoy? b) Inogne ka ty raha lahibey hafa tafilitse amy izay?

⁶ Ty dika i agnara i Jesosỳ, le tihoe “I Jehovah ro Famonjeagne.” Niporofoe i Jesosy tie afake magnavotse ze maneho finoagne ty Jehovah. Niavy tambone tane etoy reke mba hagnomey ty fiai’e hoahy o ndatio. (Mat. 20:28) Noho i solovoigney, le ho avotse sady ho afake ty hiaigne nainai’e o ndatio.​—Jaona 3:16.

⁷ Nagnino o ndatio ro mila solovoigne? Noho ty raha niseho tamy i tonda i Edenay tao. Nitreantikagne tamy i lahatsoratse taloha teoy tie nigoreve tamy i Jehovah ty Adama naho i Eva razambeintikagne. Tsy afake ty hiaigne nainai’e areke iareo. (Gen. 3:6, 24) Faie misy raha hafa ka lahibey mandikoatse ty fagnavotagne o ndaty mpanotao. Nisy nagnaraty i tahina i Jehovah-y. (Gen. 3:4, 5) Misy ifandrambesa’e amy ty raha lahibey toy, le ty fagnamasignagne ty tahina i Jehovah areke ty fagnavotagne o tarana i Adama naho i Evao. Nanagne anjara asa lahibey amy ty fagnamasignagne i tahina i Jehovah-y ty Jesosy satria nisolontegna i Jehovah reke sady nampahafantatse i Tahina’ey.

8. Ino ty mila fantare ze mpanonjohy ty lia i Jesosy iaby?

⁸ Nila nahafantatse ty Tena Nagnomey i solovoigney ze Jiosy naho ze hafa firenena naneho finoagne i Jesosy. Tsy ia zay fa i Baba’e, le i Jehovah Andrianagnahare. (Jaona 17:3) Tsy vita izay fa toko’e hofantatse amy i tahina i Jehovah-y iareo manahake i Jesosy. Mila mahafantatse ty maha lahibey ty fagnamasignagne o tahinagne iohoe ka iareo. Miankigne amy izay ty fagnavotagne iareo. (Asa. 2:21, 22) Nila nahafantatse soa i Jehovah naho i Jesosy areke ze tena mpanonjohy ty lia i Jesosy. Izay ty nahavy i Jesosy namaragne ty vavake natao’e amy Jaona 17 ao hoe izao: “Fa nampahafantareko iareo i tahina’oy sady mbe hampahafantareko avao ka. Amy izay iareo haneho hatea ty hafa, manahake ty nanehoa’o hatea tamako sady hahavy ahy ho tafaharo raike amy iareo.”​—Jaona 17:26.

“INAREO TY VAVOLOMBELOKO”

9. Akore ty ampisehoantika tie sarobily amantika i tahina i Jehovah-y?

⁹ Ty tena mpanonjohy ty lia i Jesosy, le tsy maintsy magnamasigne i tahina i Jehovah-y. (Mat. 6:9, 10) Tsy maintsy hevere iareo ho lahibey ambone ty raha hafa ty tahina i Jehovah. Midika zay tie misy raha toko’e hataontikagne. Inogne ty azontikagne atao mba hagnamasignagne i tahina i Jehovah-y ndra mba hagnaliovagne aze amy ty vande natao i Satana?

10. Inogne i fitsaràgne agn’ohatse rehafegne amy Isaia toko 42-44 aoy? (Isaia 43:9; 44:7-9) (Henteo ka i sarey.)

¹⁰ Asongadigne amy ty toko 42-44 amy ty boke Isaia ao ty anjara asantikagne amy ty fagnaliovagne i tahina i Jehovah-y. Fitsaragne agn’ohatse miomba o andrianagnahareo ty rehafe o toko rehoe. Nisaontsy tamy ze nihevetse ty tegna’e ho andrianagnahare ty Jehovah, mba hagnaporofo naho toe andrianagnahare vata’e iareo. Nagnontenea i Jehovah ka iareo naho toe nisy vavolombelogne afake magnaporofo ty maha andrianagnahare iareo, faie tsy nisy zay.​—Vakio ty Isaia 43:9; 44:7-9.

11. Arake ty Isaia 43:10-12, inogne ty raha nisaontsie i Jehovah amo o vahoa’eo?

¹¹ Vakio ty Isaia 43:10-12. Hoe ty Jehovah tamo o vahoa’eo: “Inareo ty vavolombeloko ... le Andrianagnahare raho.” Nirisihe i Jehovah hamale ty fagnonteneagne toy iareo: “Misy Andrianagnahare hafa ankoatse ahike vao?” (Isaia 44:8) Managne tombotsoa hamale o fagnonteneagne iohoe tikagne. Atorontika amy ty raha rehafentika naho ataontika tie i Jehovah raike avao ty Andrianagnahare maregne. Ambone ze kila agnaragne iaby i tahina’ey. Atorontika amy ty fomba fiaignantikagne tie tena teantika ty Jehovah sady tsy hivalike ama’e tikagne, ndra inogn’ino raha atao i Satana mba hikalagnagne antika. Fomba raike ahafahantika magnampe amy ty fagnamasignagne i Tahina’ey zay.

12. Akore ty nahatanteraha ty faminaniagne amy Isaia 40:3, 5 ao?

¹² Manahake i Jesosy Kristy tika naho fa miaro ty tahina i Jehovah ndra ty laza’e. Fa nirehake mialoha ka ty Isaia tie hisy ndaty raike ‘hagnomagne ty lala i Jehovah.’ (Isaia 40:3) Akore ty nahatanteraha izay? Nitanterake zay naho fa nagnomagne ty lala i Jesosy ty Jaona Mpanao Badisa, satria niavy amy ty tahina i Jehovah naho nirehake amy ty alala i tahina’ey ty Jesosy. (Mat. 3:3; Mar. 1:2-4; Lioka 3:3-6) Mbe nirehake avao i faminaniagney tie: “Hibaribary ty voninahy i Jehovah.” (Isaia 40:5) Amy ty fomba akore? Nisolontegna i Jehovah tamy ty fomba voririke ty Jesosy naho fa niavy tambone tane etoy. Le hoe niavy tan-tane etoy areke ty Jehovah.​—Jaona 12:45.

13. Akore ty azontika anahafagne i Jesosy?

¹³ Vavolombelo i Jehovah manahake i Jesosy ka tikagne. Minday ty tahina i Jehovah tikagne sady magnambara amy ze kila ndaty ty raha fanjaka natao’e. Mba hahavitagne izay, le tsy maintsy mampahafantatse amo o ndatio ty anjara asa i Jesosy amy ty fagnamasignagne i tahina i Jehovah-y tikagne. (Asa. 1:8) Magnorike ty fitariha i Jesosy tikagne satria ireke ty Vavolombelo i Jehovah lahibey. (Apok. 1:5) Akore areke ty toko’e ho fiheverantika tsikiraidraike ty tahina i Jehovah?

TY FIHEVERANTIKAGNE TY TAHINA I JEHOVAH

14. Arake ty Salamo 105:3, inogne ty tsapantika miomba i tahina i Jehovah-y?

¹⁴ Reharehantikagne i tahina i Jehovah-y. (Vakio ty Salamo 105:3.) Fale ty Jehovah naho fa mirehareha miomba i tahina’ey tikagne. (Jer. 9:23, 24; 1 Kor. 1:31; 2 Kor. 10:17) Finaritse amy i Jehovah noho ireke Andrianagnaharentikagne ty dika tihoe “manao i Jehovah ho rehareha.” Heverentikagne ho tombotsoa ty magnomey voninahitse i tahina’ey naho miaro ty laza’e. Tsy toko’e hahamegnatse antika ty hampahafantatse ty mpiara-miasa amantikagne, ty mpiara-mianatse, ty mpiharo tanàgne amantika vaho ty ndaty hafa tie Vavolombelo i Jehovah tikagne! Teà i Devoly tikagne naho tsy mirehake miomba i tahina i Jehovah-y amy ty ndaty hafa. (Jer. 11:21; Apok. 12:17) Naho ty maregne, le teà i Satana naho o mpaminani’e sandokeo o ndatio naho magnaligno i tahina i Jehovah-y. (Jer. 23:26, 27) Faie ty hateantikagne i tahina i Jehovah-y ty mahavy antikagne ho fale avao “tontolo andro.”​—Sal. 5:11; 89:16.

15. Ino ty dika tihoe mitoka ty tahina i Jehovah?

¹⁵ Manohy mitoka i tahina i Jehovah-y tikagne. (Joela 2:32; Rom. 10:13, 14) Tsy tihoe mahafantatse sady mampiasa i tahinan’Agnaharey avao tihoe mitoka ty tahina i Jehovah. Haintikagne fa Andrianagnahare tena Misy reke. Matoky aze ka tikagne sady mipay ty fagnampea’e naho ty tari-dala’e. (Sal. 20:7; 99:6; 116:4; 145:18) Rehafentikagne amo o ndatio ty tahina’e naho ty toetse’e. Risihentikagne hibebake naho hanao raha mba hahazoagne ty fankasitraha i Jehovah ka ireo.​—Isaia 12:4; Asa. 2:21, 38.

16. Akore ty hagnaporofoantika tie mpavande ty Satana?

¹⁶ Vognogne ty hijale noho ty amy i tahina i Jehovah-y tikagne. (Jak. 5:10, 11) Naho tsy mivalike tikagne ndra tie miatreke raha sarotse aza, le porofoentikagne tie amy izay tie mpavande ty Satana. Nandratiraty ze ndaty manompo i Jehovah ty Satana tamy ty andro i Joba. Hoe reke: “Hagnomey ze raha iaby anagna’e o ndatio mba hiarovagne ty fiai’e.” (Joba 2:4) Nirehake ty Satana tie manompo i Jehovah o ndatio satria mbe milamigne ty fiaigna’e. Fa naho miatreke raha sarotse iareo, le hiala amy i Jehovah. Noho ty tsy fivaliha i Joba, le nagnaporofo reke tie diso ze fagnaratiagne zay. Managne tombotsoa hagnaporofo ka tikagne tie ndra inogn’ino raha sarotse atao i Satana amantikagne, le tsy ombia hiala i Jehovah tika. Afake matoky tanterake tika tie hiaro antikagne ty Jehovah noho ty amy i tahina’ey.​—Jaona 17:11.

17. Arake ty 1 Petera 2:12, akore ka ty fomba hafa azontika agnomeagne voninahitse ty tahina i Jehovah?

¹⁷ Magnaja i tahina i Jehovah-y tikagne. (Ohab. 30:9; Jer. 7:8-11) Misy voka’e amy ty tahina i Jehovah ze raha ataontika, satria fanta o ndaty tie Vavolombelo’e tika sady minday ty tahina’e. (Vakio ty 1 Petera 2:12.) Faie te hanao ze azontika atao tikagne, mba hideragne i Jehovah amy ze raha rehafentika naho ty findesam-batantika. Naho manao izay tikagne, le magnomey voninahitse i tahina’ey arake ze vitantika ndaty tsy voririke.

18. Akore ka ty fomba hafa azontika agnaporofoagne tie lahibey amantika i tahina i Jehovah-y? (Henteo ka i fagnamarehagne ambane pejey.)

¹⁸ Ty laza i Jehovah ty tena lahibey amantikagne fa tsy ty antika. (Sal. 138:2) Nagnino zay ro tena lahibey? Noho ty hateantika i tahina i Jehovah-y, le va’e hagnaratiraty antika ty magnodidigne antikagne.a Nivognogne ty ho mate tamy ty fomba mahamegnatse ty Jesosy satria niheveregne ho ndaty raty reke. Noho ireke te hagnomey voninahitse ty tahina i Jehovah ty nahavy izay. Tsy “nimegnatse” ty ho afa-baraka reke, satria tsy nampagninogne aze ty ho fieretsereta ty hafa aze. (Heb. 12:2-4) Nifantoke amy ty fanoagne ty zoton’arofon’Agnahare reke.​—Mat. 26:39.

19. Ino ty tsapa’o miomba i tahina i Jehovah-y, le inogne ty anto’e?

¹⁹ Mirehareha noho ty amy i tahina i Jehovah-y tika sady voninahitse ho antika ty tokavegne tihoe Vavolombelo i Jehovah. Izay ty mahavy antika vognogne hiatreke ze fagnaratiratiagne misy eo. Lahibey amantika mandikoatse ty lazantika i tahina i Jehovah-y. Lonike areke tikagne, mba ho tapa-kevetse ty hidera i tahina i Jehovah-y avao ndra inogn’ino raha atao i Satana mba hikalagnagne antika. Izay ty hagnaporofoantika tie i tahina i Jehovah-y ty tena lahibey amantikagne manahake ty natao i Jesosy Kristy.