1 Воқеанома
23 Вақте Довуд пир шуд ва умраш ба поён мерасид, писари худ Сулаймонро бар Исроил подшоҳ кард.+ 2 Довуд ҳамаи мирони Исроил, коҳинон+ ва левизодагонро+ ҷамъ овард. 3 Левизодагони 30-сола ва аз 30 боло ҳисоб карда шуданд+ ва шумораи ин мардон 38 000 нафар буд. 4 Аз онҳо 24 000 нафар нозири корҳои хонаи Яҳува, 6000 нафарашон сардору довар+ 5 ва 4000-ашон дарбон+ буданд ва боз 4000 бо созҳое, ки Довуд дар бораашон «ман онҳоро барои васфу ситоиш тайёр кардам» гуфта буд, Яҳуваро ҳамд мегуфтанд.+
6 Сипас Довуд онҳоро мувофиқи писарони Левӣ — Ҷершӯн, Қаҳот ва Марорӣ,+ ба гурӯҳҳо ҷудо кард.+ 7 Писарони Ҷершӯн Лаъдон ва Шимъӣ буданд. 8 Писарони Лаъдон Яҳиили сардор, Зитом ва Юил,+ се нафар, буданд. 9 Писарони Шимъӣ Шалӯмит, Ҳазиил ва Ҳоррон, се нафар, буданд. Онҳо сарварони хонаводаҳои Лаъдон буданд. 10 Писарони Шимъӣ Яҳат, Зина, Яуш ва Барио буданд. Ин чор нафар писарони Шимъӣ буданд. 11 Яҳат сардор буд ва Зизо дуюм. Азбаски Яуш ва Барио писарони бисёр надоштанд, як хонавода ҳисобида шуданд ва як вазифаро ба уҳда доштанд.
12 Писарони Қаҳот Имрон, Исҳор,+ Ҳебрӯн ва Узиил,+ чор нафар, буданд. 13 Писарони Имрон Ҳорун+ ва Мӯсо+ буданд. Аммо Ҳорун ва писаронаш ба сурати доимӣ ҷудо карда шуданд,+ то Макони поктаринро поку муқаддас гардонанд, пеши Яҳува қурбониҳо оранд, ба ӯ хизмат намоянд ва доимо аз номи ӯ дуои нек кунанд.+ 14 Писарони Мӯсои марди Худо бошанд, дар қатори дигар писарони қабилаи Левӣ номбар шуда буданд. 15 Писарони Мӯсо Ҷершӯн+ ва Элиезер+ буданд. 16 Аз писарони Ҷершӯн Шабуил+ сардор буд. 17 Аз писарони Элиезер Раҳабёҳу+ сардор буд. Элиезер дигар писар надошт, аммо Раҳабёҳу писарони бисёр дошт. 18 Аз писарони Исҳор+ Шелӯмит+ сардор буд. 19 Писарони Ҳебрӯн инҳо буданд: Ериёҳу сардор буд, Амарё — дуюм, Яҳазиил — сеюм ва Еқамъом+ — чорум. 20 Писарони Узиил+ инҳо буданд: Мико сардор буд ва Ишиё — дуюм.
21 Писарони Марорӣ Маҳлӣ ва Мушӣ буданд.+ Писарони Маҳлӣ Элъозор ва Қиш буданд. 22 Элъозор мурд. Ӯ писар надошт, балки фақат духтар дошт ва хешовандонашон*, писарони Қиш, онҳоро ба занӣ гирифтанд. 23 Писарони Мушӣ Маҳлӣ, Эдар ва Иремӯт, се нафар, буданд.
24 Инҳо буданд писарони Левӣ, ки мувофиқи хонаводаҳо ва сарварони хонаводаҳо саршуморӣ карда шуданд. Левизодагони 20-сола ва аз 20 боло шумурда шуданд ва барои хизмати хонаи Яҳува ном ба ном рӯйхат карда шуданд, 25 зеро Довуд гуфта буд: «Яҳува, Худои Исроил, ба халқаш оромӣ бахшид+ ва ӯ дар Ерусалим то абад сокин хоҳад буд.+ 26 Ба левизодагон дигар лозим намеояд, ки хаймаи муқаддас ё ашёеро, ки дар он истифода мешавад, кашонанд».+ 27 Мувофиқи дастури охирини Довуд левизодагони 20-сола ва аз 20 боло ҳисоб карда шуданд. 28 Вазифаи онҳо ин буд, ки дар хизмати хонаи Яҳува ба писарони Ҳорун ёрӣ диҳанд+ ва барои саҳнҳо,+ ошхонаҳо, пок сохтани чизҳои муқаддас ва ҳар коре, ки дар хизмати хонаи Худо ба ҷо оварда мешуд, ҷавобгар бошанд. 29 Онҳо дар тайёр кардани нони чида*,+ орди маҳин барои ҳадияи ғалла, нончаҳои бехамиртуруши тунук,+ нонҳое, ки дар тоба пухта мешаванд, хамири омехта,+ ҳамчунин дар муайян кардани миқдору андозаи ҳама чиз ёрӣ медоданд. 30 Онҳо бояд ҳар саҳар+ ва ҳамчунин ҳар бегоҳ омода шуда, Яҳуваро шукргузорӣ мекарданд ва ҳамду сано мехонданд.+ 31 Ҳар дафъае ки дар рӯзҳои шанбе,+ навмоҳҳо+ ва идҳои муқаддас+ (ҳамон қадаре ки мувофиқи қонуну қоида лозим буд) ба Яҳува қурбониҳои сӯхтанӣ оварда мешуд, онҳо дар ҳузури Яҳува ёрӣ медоданд. 32 Онҳо ҳамчунин вазифаҳои худро нисбати хаймаи ҷомеъ ва ҷойи муқаддас ба ҷо меоварданд ва ба бародаронашон, писарони Ҳорун, дар хизмати хонаи Яҳува ёрӣ медоданд.