1 Қӯринтиён
3 Ман, эй бародарон, бо шумо чун бо одамони рӯҳонӣ гап зада натавонистам,+ балки чун бо одамони ҷисмонӣ, чун бо касоне, ки дар роҳи Масеҳ кӯдак ҳастанд.+ 2 Ман ба шумо шир додам, на ғизои сахт, чунки шумо бақувват набудед ва ҳоло низ бақувват нестед,+ 3 балки то ҳол ҷисмониед.+ Дар миёни шумо рашку ҳасад ва ҷанҷолҳо вуҷуд доранд, пас, магар шумо ҷисмонӣ нестед+ ва оё мисли одамони ин ҷаҳон рафтор намекунед? 4 Вақте якеатон «ман шогирди Павлус ҳастам» мегӯеду дигаре «ман аз они Апуллус»,+ магар монанди одамони ин ҷаҳон намешавед?
5 Охир, Апуллус кист? Павлус кист? Онҳо хизматгузороне+ мебошанд, ки супориши Ҳазратро иҷро мекунанд, онҳо касонеанд, ки шумо ба воситаашон имон овардаед. 6 Ман коштам,+ Апуллус об дод,+ лекин Худо сабзонид, 7 бинобар ин на корандаро бояд ҷалол дод ва на обдиҳандаро, балки Худои сабзонандаро.+ 8 Коранда ва обдиҳанда ҳар ду як мақсад доранд, вале ҳар кас аз рӯйи кораш мукофот мегирад.+ 9 Мо ҳамкорони Худо ҳастем, шумо бошед, киштзори Худову иморати Худо.+
10 Аз рӯйи лутфу марҳамати Худо, ки ба ман ато шудааст, чун меъмори моҳир таҳкурсӣ гузоштам+ ва каси дигаре бар он иморат месозад, лекин ҳар кас бигзор ба он диққат диҳад, ки чӣ тавр месозад. 11 Ҳеҷ кас ғайр аз таҳкурсие, ки гузошта шудаасту он Исои Масеҳ мебошад, таҳкурсии дигаре гузошта наметавонад.+ 12 Агар касе бар ин таҳкурсӣ аз тилло, нуқра, сангҳои қиматбаҳо, чӯб, беда ё коҳ бино кунад, 13 дар он рӯз маълум мегардад, ки кори ӯ чӣ гуна аст, зеро он бо оташ санҷида мешавад+ ва сифати кораш аён мегардад. 14 Агар чизе, ки кас бар он таҳкурсӣ бино кардааст, пойдор монад, ӯ мукофот мегирад 15 ва, агар сӯзад, зарар мебинад, вале худаш наҷот меёбад, аммо, тавре ки гӯё аз даруни оташ гузашта бошад.
16 Оё намедонед, ки шумо ибодатгоҳи Худо ҳастед+ ва рӯҳи Худо дар шумо сокин аст?+ 17 Агар касе ибодатгоҳи Худоро нест кунад, Худо ӯро нест мекунад, зеро ибодатгоҳи Худо муқаддас аст ва он ибодатгоҳ шумоед.+
18 Бигзор ҳеҷ кас худро фиреб надиҳад: агар касе аз шумо дар ин ҷаҳон* худро хирадманд ҳисобад, бигзор беақл гардад, то хирадманд шавад, 19 зеро хиради ин ҷаҳон дар назари Худо беақлист, чуноне ки навишта шудааст: «Ӯ хирадмандонро ба макри худашон гирифтор мекунад».+ 20 Ҳамчунин омадааст: «Яҳува медонад, ки фикру андешаи хирадмандон беҳуда аст».+ 21 Бинобар ин ҳеҷ кас бо одамон фахр накунад, зеро ҳама аз шумост, 22 хоҳ Павлус бошад, хоҳ Апуллус ва хоҳ Кифо*,+ хоҳ ҷаҳон, хоҳ ҳаёт ва хоҳ марг, хоҳ ҳозира ва хоҳ оянда — ҳамааш аз они шумосту 23 шумо аз они Масеҳ,+ Масеҳ бошад, аз они Худост.