2 Подшоҳон

9 Рӯзе Довуд гуфт: «Оё аз хонадони Шоул ягон кас мондааст, ки ман ба ӯ ба хотири Юнотон меҳру вафо кунам?»+ 2 Дар хонаи Шоул хизматгоре буд, ки Сибо+ ном дошт. Ӯро ба назди Довуд даъват карданд ва подшоҳ аз ӯ пурсид: «Ту Сибо ҳастӣ?» Ӯ ҷавоб дод: «Бале, бандаат Сибо аст». 3 Подшоҳ пурсид: «Оё аз хонадони Шоул ягон кас мондааст, ки ман ба ӯ меҳру вафо кунам, чуноне ки Худо меҳру вафо мекунад?» Сибо ба подшоҳ гуфт: «Як писари Юнотон мондааст, ки ба ҳар ду по мелангад».+ 4 Подшоҳ аз ӯ пурсид: «Вай дар куҷост?» Сибо ба подшоҳ гуфт: «Ӯ дар хонаи Мокири+ писари Аммиил, дар Лӯ-Дабор, аст».

5 Шоҳ Довуд даррав кас фиристода, ӯро аз Лӯ-Дабор, аз хонаи Мокири писари Аммиил, овард. 6 Ҳамин ки Мефибӯшети писари Юнотони писари Шоул ба назди Довуд даромад, рӯ ба замин афтода таъзим кард. Довуд гуфт: «Мефибӯшет!» Ӯ дар ҷавоб гуфт: «Лаббай, хоҷаам». 7 Довуд ба ӯ гуфт: «Натарс, чунки ман ба хотири падарат Юнотон ҳатман ба ту меҳру вафо мекунам.+ Ман тамоми замини бобоят Шоулро ба ту бармегардонам ва худи ту ҳамеша аз дастархони ман нон мехӯрӣ».+

8 Он гоҳ Мефибӯшет таъзим карда, гуфт: «Бандаат кист, ки ту ба саги мурдае+ чун ман аҳамият диҳӣ?» 9 Подшоҳ кас фиристода, Сибои хизматгузори Шоулро овард ва ба ӯ гуфт: «Ҳар чизеро, ки аз они Шоул ва тамоми хонадони ӯ буд, ба набераи хӯҷаинат медиҳам.+ 10 Ту бо писарон ва хизматгоронат дар замини ӯ кор мекунӣ ва ҳосилашро ҷамъ карда, барои хӯрдан ба касоне, ки аз они набераи хӯҷаинат ҳастанд, медиҳӣ. Мефибӯшет, набераи хӯҷаинат, бошад, ҳамеша аз дастархони ман нон мехӯрад».+

Сибо, ки 15 писар ва 20 хизматгор дошт,+ 11 ба подшоҳ гуфт: «Бандаат ҳар чизеро, ки хоҷаам подшоҳ ба бандааш фармуд, ба ҷо меорад». Аз он вақт сар карда, Мефибӯшет мисли яке аз писарони подшоҳ аз дастархони Довуд* мехӯрд. 12 Мефибӯшет Мико+ ном писари хурдсоле дошт. Ҳамаи онҳое, ки дар хонаи Сибо зиндагӣ мекарданд, хизматгори Мефибӯшет шуданд. 13 Мефибӯшет, ки ба ҳар ду по мелангид,+ дар Ерусалим зиста, ҳамеша аз дастархони подшоҳ мехӯрд.+