2 Воқеанома
36 Он гоҳ мардуми Яҳудо Еҳуоҳози+ писари Юшиёро ба ҷойи падараш дар Ерусалим подшоҳ кард.+ 2 Еҳуоҳоз дар 23-солагиаш подшоҳ шуд ва се моҳ дар Ерусалим ҳукмронӣ кард. 3 Вале подшоҳи Миср ӯро дар Ерусалим аз тахт гирифт ва мамлакатро хироҷгузор кард, ки 100 киккар* нуқра ва як киккар тилло супоранд.+ 4 Илова бар ин, подшоҳи Миср Элёқими бародари Еҳуоҳозро бар Яҳудо ва Ерусалим подшоҳ кард ва номашро Еҳуёқим гузошт, Еҳуоҳози бародарашро бошад, Накӯҳ+ ба Миср бурд.+
5 Еҳуёқим+ дар 25-солагиаш подшоҳ шуд ва 11 сол дар Ерусалим ҳукмронӣ кард. Ӯ он чиро, ки дар назари Худояш Яҳува бад буд, ба амал меовард.+ 6 Набукаднесари+ подшоҳи Бобил бар зидди Еҳуёқим баромад ва ӯро бо ду занҷири мисин бандубаст кард, то ба Бобил барад.+ 7 Набукаднесар баъзе ашёи хонаи Яҳуваро гирифта, ба Бобил бурд ва дар қасраш гузошт.+ 8 Воқеаҳои дигари ҳаёти Еҳуёқим, корҳои ҳароми ӯ ва бадие, ки дар ӯ ёфт шуд, дар Китоби шоҳони Исроилу Яҳудо навишта шудааст. Ба ҷойи ӯ писараш Еҳуёкин подшоҳ шуд.+
9 Еҳуёкин+ дар 18-солагиаш подшоҳ шуд ва се моҳу даҳ рӯз дар Ерусалим ҳукмронӣ кард. Ӯ он чиро, ки дар назари Яҳува бад буд, ба амал меовард.+ 10 Дар сари сол* шоҳ Набукаднесар кас фиристод, то ӯро бо чизҳои қиматбаҳои хонаи Яҳува+ ба Бобил оранд,+ ва ба ҷояш Сидқиёҳуи амакашро бар Яҳудо ва Ерусалим подшоҳ кард.+
11 Сидқиёҳу+ дар 21-солагиаш подшоҳ шуд ва 11 сол дар Ерусалим ҳукмронӣ кард.+ 12 Ӯ он чиро, ки дар назари Худояш Яҳува бад буд, ба амал меовард. Вай пеши Ирмиёи пайғамбар, ки бо амри Яҳува сухан гуфта буд, гардан нафуровард.+ 13 Ӯ инчунин бар зидди шоҳ Набукаднесар, ки ӯро бо Худо қасам дода буд, исён бардошт.+ Ӯ аз гарданшахию дилсахтии худ намонд ва нахост, ки сӯйи Яҳува, Худои Исроил, баргардад. 14 Ҳамаи сарварони коҳинон ва мардум тамоми корҳои ҳароми халқҳоро карда, дар бевафоӣ аз ҳад гузаштанд ва хонаи Яҳуваро, ки ӯ дар Ерусалим муқаддас намуда буд, нопок карданд.+
15 Яҳува, Худои бобоёнашон, паёмбарони худро фиристода, гаштаю баргашта онҳоро огоҳ мекард, зеро дили ӯ ба халқаш ва маконаш месӯхт. 16 Аммо онҳо фиристодагони Худоро паст мезаданд,+ суханонашро писанд намекарданд+ ва пайғамбаронашро масхара менамуданд,+ ба тавре ки шифонопазир гаштанд ва оташи ғазаби Яҳува бар халқаш аланга гирифт.+
17 Аз ин рӯ Худо подшоҳи калдониёнро бар зидди онҳо барангехт+ ва вай ҷавонони онҳоро дар муқаддасгоҳашон+ аз дами шамшер гузаронд+ — вай ба ҷавонмарду бокира ва пиру нотавон раҳме накард.+ Худо ҳама чиро ба дасти вай супурд.+ 18 Тамоми ашёи калону майдаи хонаи Худо, ҳамчунин ганҷҳои хонаи Яҳува ва ганҷҳои подшоҳу миронаш, ҳама чиз, ба Бобил бурда шуд.+ 19 Ӯ хонаи Худоро алов сар дод,+ ҳисори Ерусалимро вайрон кард,+ тамоми бурҷҳои* истеҳкомдорашро сӯзонду ҳамаи чизҳои пурарзишро нобуд кард.+ 20 Ӯ касонеро, ки аз дами шамшер кушта нашуданд, ба Бобил ба асирӣ бурд+ ва онҳо хизматгорони ӯву писаронаш гаштанд,+ то даме ки ҳукмронии шоҳони Форс сар шуд,+ 21 то сухане, ки Яҳува ба воситаи Ирмиё гуфта буд,+ иҷро гардад ва шанбеҳои замин пардохта шавад.+ Тамоми рӯзҳое, ки замин харобазор буд, рӯзи шанбеи он давом мекард, то даме ки 70 сол гузашт.+
22 Дар соли якуми ҳукмронии подшоҳи Форс — Куруш,+ барои иҷро гардидани сухани Яҳува, ки ба воситаи Ирмиёи пайғамбар гуфта буд,+ Яҳува подшоҳи Форс — Курушро*, барангехт, ки дар тамоми қаламрави худ чунин фармон барорад (ин фармон ҳамчунин ба шакли хаттӣ дароварда шуд):+ 23 «Куруш — подшоҳи Форс, чунин мегӯяд: “Яҳува Худои осмон тамоми мамлакатҳои заминро ба ман додааст+ ва ӯ ба ман фармудааст, ки дар Ерусалим, ки дар Яҳудост, барояш хонае бисозам.+ Ҳар касе, ки аз халқи ӯст, бигзор равона шавад ва Худояш Яҳува бо вай бошад”».+