«Шоҳидони Яҳува — имон дар амал, қисми 1: Аз зулмот ба рӯшноӣ»
Дар Китоби Муқаддас ҳақиқат ба нуру рӯшноӣ монанд карда шудаасту дурӯғ бошад ба торикӣ (Заб. 42:3; Иш. 5:20). Шайтон дурӯғро ҳангоми фиреб додани Ҳавво ба ҷаҳон ворид кард ва бо мурури замон зулмот тамоми инсониятро фаро гирифт (Ваҳй 12:9). Дар филми «Шоҳидони Яҳува — имон дар амал, қисми 1: Аз зулмот ба рӯшноӣ» (рус.) таърихи он нишон дода шудааст, ки чӣ тавр дар зулмоти рӯҳонӣ нури ҳақиқат дурахшиданро сар кард (Иш. 60:1, 2). Ҳоло биёед ин филмро ба воситаи саволу ҷавоб муҳокима кунем.
1) Чӣ тавр пас аз марги ҳаввориён торикӣ ба масеҳият низ паҳн шуд? 2) Аз солҳои 1100-ум сар карда, кадом дигаргуниҳо ба одамон дар фаҳмидани он кӯмак карданд, ки калисоҳои масеҳӣ дигар ҳақиқатро таълим намедиҳанд? 3) Мо дар бораи Ҳенри Гру ва Ҷорҷ Сторс чӣ медонем? 4) Кадом рӯйдодҳои ҳаёти Чарлз Рассел ба ӯ таъсири сахт расонданд? 5) Чӣ тавр бародар Рассел, падари ӯ ва ҳамроҳонаш Китоби Муқаддасро меомӯхтанд ва дар асоси он ба кадом хулосаҳо омаданд? 6) Барои чӣ гурӯҳи омӯзандагони Китоби Муқаддас ба гурӯҳи Нелсон Барбор ҳамроҳ шуданд ва аз кадом сабаб баъдтар бародар Рассел аз онҳо ҷудо шуд? 7) Кадом рӯйдоди моҳи июли соли 1879 ба равшантар шудани нури ҳақиқат сабаб шуд? 8) Аз он вақт сар карда шумораи зиёдшавандаи Тадқиқотчиёни Китоби Муқаддас барои паҳн кардани хушхабар чӣ кор мекарданд? 9) Кадом рӯйдодро дар соли 1914 Тадқиқотчиёни Китоби Муқаддас солҳои зиёд интизор буданд? 10) Тадқиқотчиёни Китоби Муқаддас пас аз марги бародар Рассел бо кадом душвориҳо рӯ ба рӯ шуданд? 11) Баъди аз маҳбас озод шудани бародар Рутерфорд ва ҳамроҳонаш Тадқиқотчиён ба чӣ кор сар карданд? 12) Чӣ тавр пас аз тамошои ин филм миннатдории шумо нисбати ташкилоти Яҳува зиёдтар шуд? 13) Чӣ хел ин филм шуморо тақвият дод, ки нигоҳ накарда ба муқобилат бо ҷидду ҷаҳд мавъиза карданро давом диҳед? 14) Чӣ тавр аз ин филм истифода бурда, метавонем ба хешовандон, омӯзандагони Китоби Муқаддас ва дигарон ёрӣ диҳем?
Чӣ мероси рӯҳонии пурарзише он Тадқиқотчиёни пешини Китоби Муқаддас ба мо гузоштанд! Онҳо нотарсона, бо далерӣ ва ҷидду ҷаҳд нури ҳақиқатро дар зулмоти рӯҳонии ин ҷаҳон паҳн мекарданд. Пас, биёед мо низ ба онҳо пайравӣ намуда, чун «фарзандони нур» рафтор кунем (Эфс. 5:8).