Оё ба Китоби Муқаддас тағйирот дароварда шудааст?

Баъзе одамон фикр мекунанд, ки ба Китоби Муқаддас дигаргунӣ дароварда шудааст. Аммо оё ин рост аст? Пайғамбар Ишаъё қайд кард, ки «каломи Худои мо то абад қоим хоҳад буд» (Ишаъё 40:8). Чаро мо боварӣ дошта метавонем, ки суханону ваъдаҳое, ки Худо дар Каломаш навишта буд, бе тағйирот то замони мо омада расидаанд?

Худо қодир аст, ки Каломи Худро нигоҳ дорад ва Ӯ намегузорад, ки касе суханонашро дигар кунад. Дар замонҳои қадим касоне, ки дастхатҳои илоҳиро нусхабардорӣ мекарданд, бодиққат ҳар як ҳарфи матнро мешумориданд, то дилпур бошанд, ки чизе илова, дигар ё партофта нашудааст. Аммо пӯшида нест, ки аз сабаби нокомилӣ баъзеи он одамон ба хатогиҳои ночиз роҳ додаанд.

ЧАРО БОВАРӢ ДОШТА МЕТАВОНЕМ, КИ КИТОБИ МУҚАДДАСИ ИМРӮЗА АЙНАН СУХАНОНИ НУСХАҲОИ АСЛИРО ДАР БАР МЕГИРАД?

То ба замони мо ҳазорон дастнависи қадимаи Навиштаҳои Муқаддас ёфт шудаанд, ки онҳоро бо ҳам муқоиса карда ягон хатогии роҳ дода шударо ёфтан мумкин аст. Агар ягон нусха каме фарқ кунад, онро бо дигар нусхаҳо муқоиса намуда матни ҳақиқиро муайян кардан мумкин аст. Барои зиёдтар фаҳмидан аз сайти jw.org мақолаи «Оё Китоби Муқаддас дигар карда шудааст?»-ро хонда метавонед.

Биёед баъзе ҳуҷҷатҳои қадимаро мисол орем, ки соли 1947 дар ғорҳои назди Баҳри Мурда бедуинҳо (қавми бодиянишин) дарёфт намуданд. Дар байни он матнҳои қадима баъзе қисмҳои Навиштаҳои Муқаддас низ буданд, ки ба дастнавис шудани онҳо беш аз 2000 сол шудааст. Олимон он дастнависҳои қадимаро бо матни Китоби Муқаддаси имрӯза муқоиса карда чиро муайян намуданд?

Олимон ба хулоса омаданд, ки матни имрӯзаи Каломи Худо аз навиштаҳои аслӣ фарқ намекунандa. Бодиққат аз назар гузаронидани дастнависҳои қадима исбот мекунанд, ки он чизе, ки мо имрӯз аз Китоби Муқаддас мехонем, гуфтаҳои аслии Худо мебошанд. Бешубҳа метавон гуфт, ки Худо Худаш роҳбарӣ кард, ки Навиштаҳои Муқаддас то ба замони мо аниқ ва бетағйир омада расанд.

Аз ин рӯ, вақте мо Каломи Худоро мехонем, метавонем дилпур бошем, ки он аниқ ва сазовори боварӣ аст. Дар мақолаи навбатӣ гуфта мешавад, ки мо аз пайғамбарон дар бораи Худо чӣ мефаҳмем.