ҲУШЁРУ БЕДОР БОШЕД!
Замин нобуд шуда истодааст. Китоби Муқаддас дар ин бора чӣ мегӯяд?
«Аз дасти одамон обу ҳаво тағйир ёфта истодааст. Ба наздикӣ ин сабаби офатҳои харобиовар шуда метавонад, масалан зери об мондани бисёр шаҳрҳо, гармшавии иқлим дар тамоми замин, тӯфонҳои харобиовар, норасоии об ва нобудшавии миллионҳо намуди растаниву ҳайвонот. Ин маълумоти бофта ё муболиға нест. Олимон мегӯянд, ки, агар ҳукуматдорон барои ҳифзи муҳити гирду атроф чора наандешанд, ин офатҳо ҳатман рӯй медиҳанд»,— гуфт котиби генералии Созмони Милали Муттаҳид, Антониу Гутерриш (ҳисоботи Шӯрои мутахассисони байниҳукуматӣ оид ба тағйирёбии обу иқлим аз санаи 4 апрели 2022).
«Олимон бонги хатар зада мегӯянд, ки дар солҳои наздик офатҳое, ки бо тағйирёбии иқлим вобастаанд, ба ҳама боғҳо, яъне ба 423 боғи миллӣ (дар Иёлоти Муттаҳида), ки ба баландшавии обу ҳаво тобовар нестанд, зарар мерасонанд. Офатҳое, ки рӯй дода метавонанд, ба офатҳое, ки дар Китоби Муқаддас зикр шудаанд, монанданд: сӯхтору тӯфон, обшавии пиряхҳо, баландшавии сатҳи оби баҳр ва гармшавии иқлим» («Обхезии шадид дар Йеллоустоун. Офат наздик аст!», мақола аз рӯзномаи Ню-Йорк таймс аз 15 июни 2022).
Оё ин душвориҳо ҳалли худро меёбанд? Агар ҳа, кӣ онҳоро ҳал мекунад? Биёед фаҳмем, ки Китоби Муқаддас дар ин бора чӣ мегӯяд.
Пешгӯйӣ шуда буд, ки ба муҳити атроф зарар расонида мешавад
Китоби Муқаддас мегӯяд, ки Худо «нобудгарони замин»-ро нобуд месозад (Ошкорсозӣ 11:18). Ин оят ба мо се чизро мефаҳмонад:
1. Корҳои одамизод ба замин зарар меорад.
2. Дигар ҳеҷ гоҳ ба замин зарар расонида намешавад.
3. Душвориҳои муҳити гирду атрофро на одамизод, балки Худо ҳал мекунад.
Замин ва одамизодро ояндаи дурахшон дар пеш аст
Дар Китоби Муқаддас гуфта шудааст, ки «замин то абад пойдор аст» (Пандгӯ 1:4). Он ҳамеша ҷойи зисти одамон хоҳад буд.
«Росткорон соҳиби замин мешаванд ва дар он то абад зиндагӣ мекунанд» (Забур 37:29).
Замин ободу гул-гулшукуфон мешавад.
«Биёбон ва замини хушк хурраму шукуфон хоҳад шуд, дашт хурсандӣ хоҳад кард ва мисли заъфарон хоҳад шукуфт» (Ишаъё 35:1).