3 Подшоҳон
6 Дар соли 480-уми аз замини Миср+ баромадани исроилиён, дар соли чоруми бар тамоми Исроил подшоҳ шудани Сулаймон, дар моҳи зив*+ (яъне моҳи дуюм), ӯ сохтани хонаи Яҳуваро* сар кард.+ 2 Дарозии хонае, ки шоҳ Сулаймон барои Яҳува сохт, 60 газ*, бараш 20 газ ва баландиаш 30 газ буд.+ 3 Даҳлези+ пеши ибодатгоҳ* мувофиқи бари хона 20 газ дарозӣ* дошт. Бари он, аз қисми пеши хона сар карда, даҳ газ буд.
4 Ӯ барои хона тирезаҳое сохт, ки чорчӯбаашон торафт танг мешуд.+ 5 Ғайр аз ин, ӯ назди девори хона иморате сохт. Ин иморат гирдогирди девори хона, деворҳои ибодатгоҳ* ва хонаи дарун,+ сохта шуд. Ӯ ҳуҷраҳои иморатро гирдогирд сохта буд.+ 6 Бари қабати поёни ин ҳуҷраҳо панҷ газ, қабати мобайн шаш газ ва қабати сеюм ҳафт газ буд, чунки гирдогирди хона барҷастагиҳо дошт, то ки чизе ба деворҳои хона пайванд нашавад.+
7 Хона бо сангҳое сохта шуд, ки дар кон тайёр карда буданд,+ аз ин рӯ ҳангоми сохтани хона садои болға, табар ё асбоби оҳанини дигаре шунида намешуд. 8 Даромадгоҳ ба қабати поёни ҳуҷраҳои гирдогирд аз тарафи ҷанубии* хона буд+ ва зинапояи печдоре аз он ҷо ба қабати мобайн ва баъд ба қабати сеюм мебурд. 9 Ӯ сохтани хонаро давом дода, ба охир расонд+ ва шифти хонаро аз болору вассаҳои чӯби сидра+ сохт. 10 Ӯ ҳуҷраҳои иморатро гирдогирди хона сохт,+ ки ҳар яке панҷ газ баландӣ дошта, бо тахтаҳои сидра ба хона мепайваст.
11 Он вақт Яҳува ба Сулаймон паём фиристода, гуфт: 12 «Агар ту аз рӯйи фармудаҳои ман рафтор кунӣ, ҳукмҳои маро ба ҷо орӣ ва ҳамаи амрҳои маро риоя намоӣ,+ ман низ ваъдаеро, ки ба падарат Довуд дода будам, нисбати ту ба ҷо меорам+ 13 ва дар миёни Исроил сокин мешаваму+ халқам Исроилро тарк намекунам».+
14 Сулаймон сохтани хонаро давом дод, то онро ба охир расонад. 15 Ӯ деворҳои хонаро аз дарун аз тахтаҳои сидра сохта, онҳоро аз фарши хона то болорҳои шифт бо чӯб пӯшонид ва фарши хонаро бо тахтаҳои арча рӯпӯш кард.+ 16 Ӯ дар дарунтари хона 20 газро ҷудо карда, онро аз фарш то болорҳо аз тахтаҳои сидра сохт ва дар дохили хона ҳуҷраи дарун,+ Макони поктаринро,+ сохт. 17 Ибодатгоҳ*+ — қисми пеши хона, 40 газ буд. 18 Дар чӯби сидраи даруни хона тарбузҳои ёбоӣ+ ва гулҳои шукуфон+ кандакорӣ шуда буданд. Ҳамаи он аз чӯби сидра буд ва санге намудор набуд.
19 Сулаймон ҳуҷраи даруни+ хонаро барои он сохт, ки дар он ҷо сандуқи аҳди Яҳуваро+ гузорад. 20 Дарозии ҳуҷраи дарун 20 газ, бараш 20 газ ва баландиаш 20 газ буд+ ва ӯ онро бо тиллои тоза рӯйбаст кард, ҳамчунин ӯ қурбонгоҳро+ бо чӯби сидра рӯкаш кард. 21 Сулаймон даруни хонаро бо тиллои тоза рӯйбаст кард+ ва дар пеши ҳуҷраи дарун,+ ки бо тилло рӯйбаст шуда буд, занҷирҳои тиллоӣ овехт. 22 Ӯ тамоми хонаро бо тилло рӯйбаст кард, то даме ки рӯйбаст кардани тамоми хонаро ба охир расонд. Ӯ ҳамчунин қурбонгоҳро, ки дар назди ҳуҷраи дарун буд, пурра бо тилло рӯйбаст кард.+
23 Дар ҳуҷраи дарун Сулаймон аз чӯби санавбар* ду каррубӣ+ сохт, ки ҳар яке даҳ газ баландӣ дошт.+ 24 Як боли каррубӣ панҷ газ ва боли дигараш панҷ газ буд. Аз нӯги як бол то нӯги боли дигар даҳ газ буд. 25 Каррубии дуюм низ даҳ газ буд. Ду каррубӣ як андозаву шакл доштанд. 26 Баландии як каррубӣ даҳ газ буд ва баландии каррубии дигар низ ҳамин қадар буд. 27 Сипас ӯ каррубиҳоро+ ба хонаи дарун* гузошт. Болҳои каррубиҳо паҳн шуда буданд, ба тавре ки боли як каррубӣ ба як девор ва боли каррубии дигар ба дигар девор мерасид, болҳои онҳо сӯйи байни хона паҳн шуда буд ва ба якдигар мерасид. 28 Ӯ ин каррубиҳоро бо тилло рӯйбаст кард.
29 Сулаймон бар деворҳои гирдогирди хона, дар ҳуҷраҳои дарун ва берун, нақши каррубиён,+ нахлҳо+ ва гулҳои шукуфонро+ кандакорӣ намуд. 30 Ӯ фарши ҳуҷраҳои дарун ва беруни хонаро бо тилло рӯйбаст кард. 31 Ӯ барои даромадгоҳи ҳуҷраи дарун аз чӯби санавбар дарҳо, сутунҳои паҳлуӣ ва паҳлудариҳо, яъне қисми панҷумро*, сохт. 32 Ду дар аз чӯби санавбар сохта шуданд ва ӯ бар онҳо нақши каррубиҳо, нахлҳо ва гулҳои шукуфонро кандакорӣ намуд ва онҳоро бо тилло рӯйбаст кард, ӯ бар каррубиҳо ва нахлҳо тилло кӯфт. 33 Ӯ барои даромадгоҳи ибодатгоҳ* низ аз чӯби санавбар чунин паҳлудариҳо сохт, ки қисми чорум* буданд. 34 Ӯ аз чӯби арча ду дар сохт. Як дар ду табақа дошт, ки бар пошнаҳо тоб мехӯрданд, дари дигар низ ду табақа дошт, ки бар пошнаҳо тоб мехӯрданд.+ 35 Ӯ бар онҳо нақши каррубиҳо, нахлҳо ва гулҳои шукуфонро кандакорӣ кард ва ин нақшҳоро бо тилло рӯйбаст намуд.
36 Ӯ саҳни+ даруниро аз се қатор санги тарошида ва як қатор чӯби сидра+ сохт.
37 Дар соли чорум, дар моҳи зив*, таҳкурсии хонаи Яҳува гузошта шуд+ 38 ва дар соли 11-ум, дар моҳи бул* (яъне моҳи ҳаштум), сохтмони хона мувофиқи нақша+ пурра ба анҷом расид. Ӯ онро дар давоми ҳафт сол бино кард.