Ҳисобот аз вохӯрии солона

Вохӯрие, ки бо ягонагӣ ва тағйиротҳои ҳаяҷонбахшаш дар хотирҳо нақш баст

ВОХӮРИҲОИ солонаи Ҷамъияти Бурҷи дидбонӣ ҳамеша рӯҳбаландкунанда ва хотирмон мебошанд. Дар бораи 127–умин вохӯрии солона, ки рӯзи шанбеи 1 октябри соли 2011 баргузор гардид, албатта чунин гуфтан мумкин аст. Меҳмонони аз тамоми ҷаҳон даъватшуда дар Толори анҷуманҳои Шоҳидони Яҳува дар шаҳри Ҷерсии иёлоти Ню–Ҷерси (ИМА) ҷамъ омаданд.

Аъзои Ҳайати роҳбарикунанда, Геррит Лёш, ҳозиронро хушомадед гуфта ба барнома оғоз бахшид. Ӯ ба меҳмононе, ки тақрибан аз 85 мамлакат омада буданд, муроҷиат карда гуфт, ки онҳо аз ягонагии беҳамтои байналмилалӣ баҳра мебаранд. Чунин ягонагӣ шаҳодати хубест ва Яҳуваро ҷалол медиҳад. Дар давоми ин барнома мавзӯи ягонагӣ якчанд маротиба зикр карда шуд.

ҲИСОБОТ АЗ МЕКСИКА

Дар қисми аввали барнома оиди ягонагии халқи Яҳува мисолҳо оварда шуданд. Балтасар Перла аз Байт–Или Мексика аз се аъзоёни дигари он оиди бо филиали Мексика якҷоя шудани шаш филиали Америкаи Марказӣ мусоҳиба гирифт. Он бародарон гуфтанд, ки ҳоло дар оилаи Байт–Или Мексика бародарону хоҳарони боз ҳам бештаре аз миллату маданиятҳои гуногун хизмат мекунанд. Ва чунин муҳит барои ҳар яки онҳо рӯҳбаландкунанда аст. Ин мисли он аст, ки гӯё Худо як хаткӯркунаки калонро гирифта тамоми монеаҳои нажодиву маданиро кӯр кардааст.

Як масъалаи ҳалталаб дар он буд, ки ба воизон кӯмак кунанд, то онҳо аз сабаби дар мамлакаташон дигар фаъолият накардани филиал худро аз ташкилоти Яҳува ҷудошуда ҳис накунанд. Бо ин мақсад бародарон ғамхорӣ намуданд, то ки ҳар як ҷамъомад, ҳатто ҷамъомадҳои дар маҳалҳои дурдаст воқеъбуда тавассути почтаи электронии бехатар бо филиал бевосита алоқа карда тавонанд.

ХАБАРҲО АЗ ҶОПОН

Ҷеймс Линтон аз филиали Ҷопон нақл кард, ки чӣ тавр бародарони мо аз заминҷунбӣ ва тсунамиҳои моҳи марти соли 2011 рӯйдода зарар диданд. Шумораи зиёди Шоҳидон наздикон ва дороии худро аз даст доданд. Аз тарафи Шоҳидоне, ки берун аз минтақаи зарардида зиндагӣ мекарданд, беш аз 3 100 хонаҳо ва садҳо воситаҳои нақлиётӣ пешкаш карда шуданд. Ихтиёриёни аз тарафи Кумитаи минтақавӣ оид ба сохтмон фиристодашуда барои барқарор кардани хонаҳои бародарон шабу рӯз меҳнат мекарданд. Зиёда аз 1 700 ихтиёриён дар ҳар ҷое, ки эҳтиёҷ буд, ёрдами худро мерасонданд. Ҳамчунин 575 нафар ихтиёриён, аз он ҷумла гурӯҳи ихтиёриён аз Иёлоти Муттаҳида, барои барқарор кардани Толори Салтанат кӯмак мекарданд.

Диққати зиёд ба он равона шуд, ки ба зарардидагон аз ҷиҳати рӯҳонӣ ва эмотсионалӣ кӯмак расонида шавад. Беш аз 400 нафар пирон ба хабаргирии зарардидагон рафта онҳоро дилбардорӣ мекарданд. Вақте ки ду нозири минтақавӣ аз идораи марказӣ барои рӯҳбаландкунии ҳамимонон ба ҷои зарардида омаданд, ғамхории Ҳайати Роҳбарикунанда ба таври равшан аён шуд. Ҳамчунин, суханони дилгармкунандаи Шоҳидони Яҳува аз саросари ҷаҳон барои зарардидагон манбаи тасаллии бузург буданд.

ҒАЛАБАҲОИ СУДӢ

Вақте ки Стивен Ҳарди аз филиали Британия ғалабаҳои судиро бо якчанд бародарон муҳокима кард, шунавандагон онро бо тамоми диққат гӯш карданд. Масалан, ҳукумати Фаронса талаб мекард, ки ҷамъияти ҳуқуқии мо дар он ҷо ба маблағи 82 миллион доллари амрикоӣ андоз супорад. Аммо Суди Аврупо оид ба ҳуқуқи башар қарор баровард, ки ин талабот аз рӯи қонун набуд. Суд бо он розӣ шуд, ки Шоҳидони Яҳува аз супоридани андоз саркашӣ намекарданд ва қайд кард, ки ҳукумати Фаронса моддаи 9–уми Созишномаи Аврупоро, ки озодии диниро ҳимоя мекунад, вайрон кардааст. Масалан, ҳукумати Фаронса Шоҳидони Яҳуваро чун дин эътироф кардан намехост, фаъолияти онҳоро дар мамлакат манъ карданӣ буд ва нисбати онҳо суханони таҳқиромез истифода мебурд.

Ҳамчунин ҳангоми дида баромадани кори судӣ оид ба Шоҳидони Яҳува дар Арманистон Суди Аврупо ба манфиати мо қарор баровард. Аз соли 1965 Суди Аврупо ба он аҳамияти хоса медод, ки мувофиқи Созишномаи Аврупо мардон ҳуқуқи рад кардани хизмати ҳарбиро надоранд. Лекин Палатаи болоии Суди Аврупо оид ба ҳуқуқи башар қарор қабул кард, ки Созишномаи Аврупо дар мавриди доштани ақидаҳои устувори динӣ ба шахс ҳуқуқ медиҳад, ки аз хизмати ҳарбӣ даст кашад. Мувофиқи ин қарор ҳукумати Арманистон ва ҳамчунин ҳукуматҳои Озарбойҷону Туркия бояд ин ҳуқуқро эътироф кунанд.

НАҚШАҲО ОИД БА СОХТМОН

Сипас Гай Пирс, аъзои Ҳайати Роҳбарикунанда, бо нутқ баромад кард ва ба ҳозирон, ки оиди лоиҳаи сохтмонӣ дар иёлоти Ню–Йорк бештар фаҳмидан мехостанд, маълумот дод. Ӯ тавассути видеонаворҳо корҳои ҳоло дар Уолкил (Паттерсон) иҷро шудаистода ва қитъаҳои замини нави дар Уорвик ва Таксидо (Ню–Йорк) харидашударо нишон дод. Дар Уолкил сохтмони бинои нави истиқоматӣ бо зиёда аз 300 ҳуҷра бояд соли 2014 ба анҷом расад.

Бародарон нақша доранд, ки дар қитъаи зимини Уорвик, ки 100 гектарро ташкил медиҳад, биноҳои нав бисозанд. Бародар Пирс қайд намуд, ки ҳарчанд Ҳайати Роҳбарикунанда ҳоло аниқ гуфта наметавонад, ки иродаи Яҳува нисбати Уорвик чист, ба ҳар ҳол он ба корҳои сохтмонӣ омода аст. Ҳайати Роҳбарикунанда мақсад дорад, ки идораи марказиро аз Бруклин ба Уорвик кӯчонад. Ҳамчунин ба нақша гирифта шуд, ки дар масофаи 10 км дуртар аз Уорвик 20 гектар қитъаи замин барои нигоҳ доштани ҳар гуна лавозимоту дастгоҳҳо ва масолеҳи сохтмонӣ истифода бурда шавад. Бародар Пирс гуфт: «Вақте ки мо барои сохтмон иҷозат мегирем, мо умед дорем, ки тамоми корҳои сохтмониро дар давоми чор сол ба анҷом мерасонем. Он гоҳ мо моликияти дар Бруклин доштаамонро фурӯхта метавонем».

«Оё Ҳайати Роҳбарикунанда фикрашро оиди наздик будани мусибати бузург тағйир дод?»,— пурсид бародар Пирс. «Албатта не»,— ҷавоб дод ӯ. «Агар мусибати бузург ба нақшаҳои мо монеа шавад, ин олиҷаноб, хеле олиҷаноб мешавад!»

АЗ ШЕРИ ҒУРРОН ЭҲТИЁТ ШАВЕД

Аъзои дигари Ҳайати Роҳбарикунанда, Стивен Летт, ояти 1 Петрус 5:8–ро дида баромад. Он ҷо мо мехонем: «Ҳушёр ва бедор бошед, чунки душмани шумо, иблис, мисли шери ғуррон гаштугузор карда, касеро меҷӯяд, то ба коми худ кашад». Бародар Летт ба якчанд хусусияти шерҳо ишора намуда гуфт, ки тасвири Петрус нисбати Иблис хеле мувофиқ аст.

Шерҳо назар ба одамон бақувваттар ва чолоктаранд. Шайтон ҳам чунон бақувват аст, ки мо наметавонем та́нҳо бо қуввати худ бо вай мубориза барем ё аз вай гурезем. Мо ба кӯмаки Яҳува ниёз дорем (Иш. 40:31). Бисёр вақт шер шабона шикор мекунад, то ки ҳайвон вайро дида натавонад. Агар мо хоҳем, ки тӯъмаи Шайтон нашавем, мо бояд аз зулмоти рӯҳонӣ, ки дар он Шайтон моро сайд карда метавонад, дурӣ ҷӯем. Чӣ тавре ки шер оҳуи беозор ё говмеши хурди хобрафтаро мекушад, мисли ин Шайтон бераҳм аст ва моро куштан мехоҳад. Одатан баъди он ки шер шикамашро сер мекунад, тӯъмаи вай ба гӯштпора мубаддал мегардад ва шинохтани он тамоман имконнопазир мешавад. Ба ин монанд, «анҷоми онҳо»–е, ки тӯъмаи Шайтон мегарданд, «бадтар аз аввалашон мешавад» (2 Пет. 2:20). Пас, мо бояд ба Шайтон муқобилат кунем ва бо қатъият принсипҳои аз Китоби Муқаддас омӯхтаамонро дар ҳаёт истифода барем (1 Пет. 5:9).

ҶОИ ХУДРО ДАР ХОНАИ ЯҲУВА ҚАДР КУНЕД

Сэмюэл Ҳӯрд, аъзои дигари Ҳайати Роҳбарикунанда, бо нутқ баромад карда гуфт: «Ҳар яки мо дар хонаи Яҳува ҷои худро дорем». Ин маънои онро дорад, ки ҳамаи масеҳиён дар асоси имон ба фидияи қурбонии Исо Худоро ба таври ба Ӯ мақбул ибодат карда метавонанд. Мо бояд ин ҷойро чун имконияти беҳамто қадр кунем. Мисли Довуд мо мехоҳем, ки «тамоми айёми умри худ дар хонаи Худованд сокин» бошем (Заб. 26:4).

Бародар Ҳӯрд ба Забур 91:13–15 ишора карда пурсид: «Чӣ тавр Яҳува ба мо имконият медиҳад, ки нашъунамо ёбем?» Ӯ ҷавоб дод: «Дар биҳишти рӯҳонӣ Худо моро дар гармӣ нигоҳ медорад, муҳофизат мекунад ва ба мо оби тароватбахши ҳақиқатро медиҳад». Сипас бародар Ҳӯрд шунавандагонро барангехт: «Биёед барои ин ба Ӯ миннатдор бошем. Бигзор мо дар хонаи Яҳува на фақат дар муддати кӯтоҳ, балки абадан бимонем ва аз ин қаноатманд бошем».

МАСЕҲИЁН КАЛОМИ ХУДОРО ЭҲТИРОМ МЕКУНАНД

Дейвид Сплейн, ки ҳамчунин аъзои Ҳайати Роҳбарикунанда мебошад, бо нутқи навбатӣ баромад карда фаҳмонд, ки масеҳиёни ҳақиқӣ ҳамеша Каломи Худоро эҳтиром мекарданд. Дар асри як барои ҳал кардани масъалаи хатна кардани мардон онҳо ба Каломи Худо такя намуданд (Аъм. 15:16, 17). Лекин баъзе ба ном масеҳиёни асри ду фалсафаи юнониро аз Навиштаҳо болотар меҳисобиданд. Баъдтар, дигарон таълимотҳои Китоби Муқаддасро бо ақидаҳои ба ном Падарони калисо ва императорони Рум иваз мекарданд ва ҳамин тавр ба паҳншавии таълимотҳои бардурӯғ мусоидат менамуданд.

Бародар Сплейн ҳамчунин оиди яке аз масалҳои Исо сухан ронд. Ин масали Исо нишон медиҳад, ки аз асри як сар карда ҳамеша дар рӯи замин масеҳиёни тадҳиншудаи ҳақиқӣ вуҷуд доштанд, то ҳақиқати Китоби Муқаддасро муҳофизат кунанд (Мат. 13:24–30). Мо аниқ гуфта наметавонем, ки онҳо кӣ буданд. Лекин, дар давоми асрҳо бисёр шахсоне ёфт мешуданд, ки таълимот ва аъмоли ба Навиштаҳо муқобилро фош менамуданд. Баъзе аз чунин одамон рӯҳонии калони шаҳри Лион Агобард (асри 9), Питер аз шаҳри Бруэ, Ҳенри аз шаҳри Лосанн, Валдес ё Валдо (асри 12), Ҷон Уиклиф (асри 14), Уилям Тиндал (асри 16), Ҳенри Гру ва Ҷорҷ Сторрз (асри 19) буданд. Имрӯз Шоҳидони Яҳува риоя кардани меъёрҳои Навиштаҳоро давом дода Китоби Муқаддасро чун асоси ҳақиқат эътироф мекунанд. Ана барои чӣ Ҳайати Роҳбарикунанда чун матни солона барои соли 2012 ояти Юҳанно 17:17–ро интихоб кард: «Каломи Ту ростист».

ТАҒЙИРОТҲОИ ҲАЯҶОНОВАР ДАР СОҲАИ ТАЪЛИМГИРӢ ВА ХИЗМАТ

Боз як аъзои Ҳайати Роҳбарикунанда, Энтони Моррис, тағйиротҳоеро, ки ба миссионерҳо ва пешравони махсус тааллуқ доштанд, эълон намуд. Аз моҳи сентябри соли 2012 сар карда дар баъзе мамлакатҳо Мактаби бар Навиштаҳо асосёфта барои ҷуфтони масеҳӣ гузаронида хоҳад шуд. Аз моҳи октябри соли 2011 сар карда талабот барои таҳсил кардан дар Мактаби Ҷилъод дигар шуд. Акнун дар мактаби мазкур танҳо он шахсоне таълим гирифта метавонанд, ки аллакай дар ягон намуди хизмати махсуси пурравақт иштирок мекунанд, масалан миссионероне, ки пештар дар мактаби Ҷилъод таҳсил накарда буданд, пешравони махсус, нозирони сайёр ва ходимони Байт–Ил. Баъди хатми ин мактаб баъзеҳо чун ходимони Байт–Ил ё нозирони сайёр таъин мешаванд, дигарон бошанд, ба шаҳрҳои сераҳолӣ фиристода мешаванд, то бо ҷамъомади маҳаллӣ дар кори мавъиза ҳамкорӣ кунанд. Онҳо метавонанд бо хоҳару бародарон ҳамкорӣ карда онҳоро қувват бахшанд, дастгирӣ намоянд ва дар кори мавъиза ба онҳо намуна бошанд.

Эълон шуда буд, ки аз 1–уми январи соли 2012 касоне, ки дар Мактаби бар Навиштаҳо асосёфта барои бародарони безан ва Мактаби бар Навиштаҳо асосёфта барои ҷуфтони масеҳӣ таълим мегиранд, муваққатан чун пешравони махсус таъин карда мешаванд. Онҳо дар маҳалҳое, ки он ҷо воизон каманд ё тамоман нестанд, мавъиза хоҳанд кард. Онҳое, ки чун пешравони махсуси муваққатӣ таъин мешаванд, аввал ба муддати дувоздаҳ моҳ таъин мешаванд ва метавонанд аз як то се сол чун пешравони махсуси муваққатӣ хизмат кунанд. Баъди гузаштани се сол, касоне, ки ба таври самаранок хизмат мекунанд, метавонанд чун пешравони махсуси доимӣ таъин карда шаванд.

Вохӯрии солонаи соли 2011 вохӯрии хурсандибахш буд. Ташкилоти Яҳува кӯшиш мекунад, ки хушхабар дар саросари ҷаҳон мавъиза карда шавад ва барои муттаҳид кардани бародарияти умумиҷаҳонӣ кӯмак мекунад. Мо дуо мегӯем, ки Яҳува кори моро баракат диҳад ва он ба Ӯ ҷалол ва ҳамду санои бештар орад.

[Чорчӯба/Тасвир дар саҳифаи 18, 19]

Мо бо онҳо аз наздик шинос шудем

Дар барномаи ин вохӯрӣ ҳамчунин аз панҷ нафар хоҳароне, ки шавҳаронашон аъзоёни Ҳайати Роҳбарикунанда буданду ҳоло ҳаёти заминиашон ба охир расидааст, мусоҳиба гирифта шуд. Хоҳарон Марина Сидлик, Эдит Сютер, Мелита Ярач, Мелба Бэрри ва Сидни Барбер нақл карданд, ки чӣ тавр онҳо ҳақиқатро фаҳмиданд ва хизмати пурравақтро сар карданд. Ҳар яки онҳо ба шунавандагон дар бораи хотираҳои пурарзиши худ, хислатҳои хуби шавҳарашон ва оиди баракатҳое, ки аз онҳо ҳамроҳи ҳамсарашон баҳра бурданд, нақл карданд. Дар хотимаи ин мусоҳиба ҳозирон суруди рақами 86–ро, ки «Занони содиқ, хоҳарони масеҳӣ» ном дорад, сароиданд.

[Тасвирҳо]

(Дар боло) Дэниел ва Марина Сидлик; Грант ва Эдит Сютер; Теодор ва Мелита Ярач

(Дар поён) Ллойд ва Мелба Бэрри; Кэри ва Сидни Барбер

[Харита дар саҳифаи 16]

Шаш филиал ба филиали Мексика ҳамроҳ шуданд ва акнун чун як филиал фаъолият мекунанд

МЕКСИКА

ГВАТЕМАЛА

ҲОНДУРАС

САЛВАДОР

НИКАРАГУА

КОСТА–РИКА

ПАНАМА

[Тасвир дар саҳифаи 17]

Лоиҳаи идораи марказии Шоҳидони Яҳува дар Уорвик (Ню–Йорк)