ДАРСИ 10

Тағйири оҳанги овоз

Аъмол 16:28

МАҚСАДИ ДАРС: Баландии овоз ва оҳангу суръати гапзаниатонро тағйир дода, фикрҳоро равшан созед ва ба дили шунавандагон таъсир расонед.

ИНРО ЧӢ ТАВР КУНЕМ?

Баландии овозатонро тағйир диҳед. Вақте ки ягон фикри муҳимро қайд карданиед ё мехоҳед шунавандагонро ба чизе барангезед, овозатонро баландтар кунед. Ҳукму довариҳоро низ бо овози баланд хонед. Лекин, вақте мехоҳед, ки тарсу ошуфтагиро нишон диҳед ё дили шунавандагонро ба шунидани ягон фикр тайёр кунед, овозатонро пасттар намоед.

Овозатонро тез-тез баланд накунед, то шунавандагон фикр накунанд, ки шумо онҳоро сарзаниш карда истодаед. Ҳангоми баланд ё паст кардани овозатон кӯшиш кунед, ки он сохта набошад ва диққати дигарон аз ҳад зиёд ба шумо равона нагардад.
Оҳанги овозатонро тағйир диҳед. Бо оҳанги овозатон шодиву хурсандӣ ё ғамгинию хавотириро нишон диҳед. Ҳамчунин барои нишон додани масофа ё ҳаҷми чизе баъзе садонокҳои калимаро кашида талаффуз кардан мумкин аст.
Суръати гапзаниатонро тағйир диҳед. Барои нишон додани хурсандӣ ва ҳаяҷон тезтар гап занед. Лекин, вақте ки ягон фикри муҳимро қайд кардан мехоҳед, оҳистатар гап занед.

Суръати гапзаниатонро яку якбора дигар накунед, то ки ба шунаванда аҷиб натобад. Аз ҳад тез гап назанед, то шахс гапҳоятонро фаҳмад.