መጽሓፍ ቅዱስ ፍሉይ ዝዓይነቱ መጽሓፍ

እዚ መጽሓፍ እዚ ኣብ ዓለም ዕዳጋ ዝረኸበ መጽሓፍ ተባሂሉ ተጸዊዑ ኢዩ: ሓቂ ኸኣ ኢዩ። መጽሓፍ ቅዱስ ካብ ዝዀነ ይኹን ካልእ መጽሓፍ ንላዕሊ እተነበን ብኽብሪ እተታሕዘን መጽሓፍ ኢዩ። ኣብዚ ግዜ እዚ (ብምሉኡ ወይ ከኣ ክፋሉ) ብኣርባዕተ ቢልዮን ቅዳሓትን ብልዕሊ 2, 000 ቋንቋታትን ተዘርጊሑ ከም ዘሎ ይግመት።

ይኹን እምበር ካብቲ ዝርጋሐኡ ንላዕሊ ዝያዳ ዘገድስ: ብመለኮታዊ መመርሒ ከም እተጻሕፈ ዝዛረብ ምዃኑ ኢዩ። እቲ ክርስትያን ሃዋርያ ጳውሎስ “[“ኵሉ ቅዱስ ጽሑፍ: NW ] መንፈስ ኣምላኽ ዝነፈሶ [ኢዩ]” ኢሉ ጸሓፈ። (2 ጢሞቴዎስ 3:⁠16) እዚ እንታይ ማለት ኢዩ፧ እታ “መንፈስ ኣምላኽ ዝነፈሶ” (ግሪኽ: ቲ·ኦʹኒዩ·ስቶስ ) እትብል ሓረግ ቃል ብቓሉ “ኣምላኽ ዘተንፈሶ” ማለት ኢያ። እታ ምስኣ እትዛመድ ኒዩ ʹማ እትብል ናይ ግሪኽ ቃል ከኣ “መንፈስ” ማለት ኢያ። ስለዚ እምበኣር እቲ ኣበሃህላ እቲ: ናይ ኣምላኽ መንፈስ ቅዱስ ነቶም ጸሓፍቲ ደሪኽዎም: ብምሳልያዊ ኣዘራርባ ኸኣ ኣምላኽ ኣብ ልዕሊኦም ኣተንፊሱ ማለት ኢዩ: ውጽኢቱ ድማ ቃል ሰብ ዘይኰነስ ብሓቂ ቃል ኣምላኽ ክበሃል ይከኣል ኢዩ። ብርግጽ እኳ ድኣ: ብዙሓት ንመጽሓፍ ቅዱስ ዘጽንዑ ሰባት: ንሓድሕዱ ዝሰማማዕ ምዃኑ: ብስነ⁠-​ፍልጠት ርጡብ ምዃኑ: ናይቶም ጸሓፍቲ ሓቅነትን ቅንዕናን: ዝያዳ ዘገድስ ድማ እቲ እተፈጸመ ትንቢታቱ ብምርኣይ ተገሪሞም ኢዮም። ኵሉ እዚ ረቛሒታት እዚ ንብዙሓት መስተውዓልቲ ሰባት እዚ መጽሓፍ እዚ ካብ ሓደ ልዕሊ ሰብ ዝዀነ ምንጪ ከም ዝመጸ ከእምኖም ክኢሉ ኢዩ።a

ግናኸ መጽሓፍ ቅዱስ ክጸሓፍ ከሎ ኣምላኽ ክሳዕ ክንደይ ኢዩ ጸኒዑ እተኸታተሎ፧ ገሊኣቶም ንመጽሓፍ ቅዱስ ቃል ብቓሉ እናተዛረበ ኢዩ ኣጽሒፍዎ ይብሉ። ካልኦት ከኣ ነቲ ኣብ መጽሓፍ ቅዱስ ዝርከብ ሓሳባት ጥራይ ኢዩ ብመንፈሱ መሪሕዎ እምበር ነቲ ቃላት ኣይኰነን ይብሉ። ከም ሓቁ ክርአ ከሎ ግን: ብመንፈስ ምምራሕ ክበሃል ከሎ ኣብ ሓደ ዓይነት ኣገባብ ጥራይ ክድረት ኣይክኣልን ኢዩ: ከመይሲ ኣምላኽ ‘ብብዙሕ መገዲ ነቦታትና ብነብያቱ ገይሩ’ ተዛሪብዎም ኢዩ። (እብራውያን 1:⁠1፣ ምስ 1 ቈረንቶስ 12:⁠6 ኣረኣእዮ።) ኣብዛ ቀጺላ ዘላ ዓንቀጽ: ኣምላኽ ንገለ 40 ዝዀኑ መጽሓፍ ቅዱስ ዝጸሓፉ ሰባት እተዛረበሉ መገድታት ክንምርምር ኢና።

[እግረ-ጽሑፍ]