ኣብ ኣገልግሎት ክእለትካ ኣመሓይሽ—ምብጽጻሕ መጽሔት ኣማዕብል

ኣገዳሲ ዝዀነ ስለምንታይ እዩ፧ ንመጽሔታትና ምንባብ ዚፈትዉ ሓያሎ ሰባት፡ ምሳና መጽሓፍ ቅዱስ ኬጽንዑ ድሌት የብሎምን። ምናልባት ብሃይማኖቶም ዕጉባት ይዀኑ ወይ እውን ንኼጽንዑ ግዜ ዘይብሎም ኰይኑ ይስምዖም ይኸውን። እንተዀነ ግና፡ ኣዘውቲሮም መጽሔታትና ብዘንበቡ መጠን፡ ንቓል ኣምላኽ ኪብህግዎ ይኽእሉ እዮም። (1 ጴጥ. 2:2) ምናልባት ሓንቲ ዓንቀጽ ንልቦም ኽትትንክፍ ትኽእል ወይ እውን ኵነታቶም ይቕየር ይኸውን። ስሩዕን ሓጺርን ዝዀነ ምብጻሕ፡ ዝያዳ ፍዅስ ከም እንብሎም ይገብር፡ ብዛዕባ እቲ ዜገድሶምን ዜተሓሳስቦም ነገራት ንኽንፈልጥ እውን ይሕግዘና እዩ። ድሕሪ ግዜ ድማ መጽናዕቲ መጽሓፍ ቅዱስ ኪጅመር ይኽእል ይኸውን።

እንታይ ክትገብር ኣሎካ፧

ኣብ ነፍሲ ወከፍ ወርሒ፡ ነቲ ሰብ ሓደስቲ መጽሔታት ግምቢ ዘብዐኛን ንቕሑ!ን ንኸተብጽሓሉ መደብ ግበር። ኣብታ ዝገደፍካሉ መጽሔት ንዘሎ ገሊኡ ዓንቀጽ ሸውሃቱ ምእንቲ ኽትከፍት ወይ እውን ኣብታ ወርሒ ንዚዕደል ካልእ ጽሑፋት ምእንቲ ኸተበርክተሉ፡ ኣብታ ወርሒ ኻልእ መዓልቲ ኽትበጽሖ ትኽእል ኢኻ። ጽቡቕ መዝገብ ከኣ ሓዝ።—ናይ ጥሪ 2014 ናይ መንግስቲ ኣገልግሎትና፡ ኣብ ገጽ 3 ርአ።
ንነፍሲ ወከፍ ምብጻሕ ተዳሎ። ንሓደ ብዓል ቤት መጽሔታት ገዲፍካሉ ጥራይ ኣብ ክንዲ እትኸይድ፡ ኣዘራርቦ፣ ተገዳስነቱ ንኸተለዓዕል ከኣ ምስኡ ዕርክነት ክትምስርት ጽዓር።
መጽናዕቲ ንኸተጀምር ዜኽእለካ ኣጋጣሚታት ኣናዲ። ሓደ ኻብቶም መጽሔት እተበጻጽሓሎም ሰባት ብዛዕባ ሓደ ኣርእስቲ፡ መጽሓፍ ቅዱስ እንታይ ከም ዚብል ምስ ዚሓትተካ፡ ነታ ሕቶ ዚምልስ ንመጽናዕቲ ዚኸውን ጽሑፍ ኣምጽኣሉ፡ ሓቢርኩም ድማ ተመያየጡሉ። ቅድሚ ምስንባትካ ምስቲ እተዘራረብኩምሉ ዚተሓሓዝ ሕቶ ኣበግስ፡ ኣብ ዚመጽእ ምብጻሕካ ኸኣ ተመያየጡሉ። መጽሓፍ ቅዱስ ወይ ንመጽናዕቲ ዚኸውን ጽሑፍ ተጠቒምካ ስሩዕ ዝዀነ ሓጺር ምይይጥ ብሜላ ትገብር እንተ ደኣ ኣሊኻ፡ መጽናዕቲ መጽሓፍ ቅዱስ ትመርሕ ኣለኻ ማለት እዩ። ነቲ በዓል ቤት፡ እታ ብስራት ኣምላኽ ዘርእስታ ብሮሹር ብምብርካት ሓጺር መጽናዕቲ መጽሓፍ ቅዱስ ብኸመይ ከም ዚግበር ኣርኢኻዮ ዲኻ፧ ነተን መጽሓፍ ቅዱስ ከተጽንዕ ዘሎካ ስለምንታይ ኢኻ፧ ከምኡ እውን መጽናዕቲ መጽሓፍ ቅዱስ ብኸመይ እዩ ዚምራሕ፧ ዘርእስተን ቪድዮታት ኣርኢኻዮዶ ትፈልጥ፧ ዋላ እኳ እቲ ሰብ ቅድሚ ሕጂ መጽናዕቲ ኺምርሓሉ ፍቓደኛ እንተ ዘይነበረ፡ ኵነታት ግና ይቕየር እዩ። ደጊምካ እንተ ትፍትን ጥቕሚ ኣይምሃለዎንዶ፧

ኣብዛ ወርሒ እዚኣ፡ ነዚ ፈትኖ፦

ዝርዝር ኣስማት እቶም መጽሔታት ከተበጻጽሓሎም እትኽእል ሰባት ኣዳሉ። ንቕዳሕ እተን ሓደስቲ መጽሔታት ኣበርክተሎም፣ ነተን ዚቕጽላ መጽሔታት ከም እተምጽኣሎም ድማ ሓብሮም።