Aerenakaa

2 Ka va lun sha iyange i Iniongo i Pentikôsti yô, ve cii ve kohol ijiir i môm shighe u iniongo lu zan hemen la. 2 Ica i gbe ga yô, ihyuran due sha aôndo, er ahumbe a taver nga a toon nahan, va iv ken iyou i ve tema ker la cii. 3 Maa ve nenge a kwagh* er ka iniomborusu nahan, va tema môm môm sha hanmô ve, 4 nahan ve cii ve iv a icighan jijingi, maa ve gba lamen ken ijô kposo kposo, vough er jijingi na ve ian u lamen la.

5 Hen shighe ne, Mbayuda mba civir Aôndo sha gbashima mba ve due ken hanma tar cii yô lu ken Yerusalem. 6 Nahan zum u ihyuran ne due yô, ikpelaior va kohol her shi kondo ve iyol, sha ci u hanmô ve yô nan ungwa ve lu lamen ken zwa u nan. 7 Kwagh ne kpiligh ve iyol je gande, ve pine ér: “Nenge ase yô, mba ve lamen mban ka Mbagalilia, shin ka ve ga? 8 Man tsô er nan ve hanmô wase nan lu ungwan zwa u nan u ityôô?* 9 Se, Mbaparta man Mbamede man Mbaelam kua mba ken Mesopotamia, man Yudia man Kapadoshia man Ponti man mba ken tiôntar u Ashia, 10 man Ferijia man Pamfilia man Igipiti, kua uharegh mba ken Libia, ikyua a Shirene; man mbavannya mba ve dugh ken Roma, mba ve lu Mbayuda man mba ve nyer a nyôr ve la cii, 11 man Mbakerete kua Mbaarabia kpaa, se ungwa mba ôron akaa a kpilighyol a Aôndo a er yô, ken ijô yase.” 12 Sha kpôô yô, ve cii yange kpiligh ve iyol shi lan ve ishima kpishi, ve gba pinen ker ayol a ve ér: “Inja i kwagh ne ka nyi?” 13 Kpa mbagenev naha ve tar kaa ér: “Ve ma wain u nyohon* ngee gande.”

14 Kpa Peteru kighir mough sha vea Mbapuekarmôm mbara lam a ikpelaior la genger genger, a kaa ér: “Ne ior i Yudia man ne mba ken Yerusalem cii, fa nen kwagh ne shi ver nen ato sha akaa a m lu ôron ne ne zulee. 15 Jighilii yô, ior mban mba hunden msôrom er ne henen nahan ga, gadia hegen ka pepe, er ahwa ataankaranyiin* nahan di tsô. 16 Kpa ka kwagh u yange i ôr sha ikyev i profeti Yoel yô, ér: 17 ‘Aôndo kaa ér, “Ken ayange a masejime yô, me haa jijingi wam* sha hanma injaor cii, nahan ônov enev mba nomso man mba kasev vea ôr kwaghôron u profeti, shi agumaior a en aa nenge mbampase, shi mnyam ma a cier ior enev mba ve bee iyol la. 18 Shi me haa jijingi wam* sha ikpan yam i nomso man sha ikpan yam i ukase je kpaa, nahan vea ôr kwaghôron u profeti. 19 Me tese akaa a kpilighyol sha kwavaôndo shi me er uivande shin tar—awambe man usu man mnyim ma ilen. 20 A gema iyange ia hingir ime, uwer di ua hingir awambe cii iyange i Yehova* i vesen man i kpilighyol la ia va ye. 21 Nahan hanma or u nan yer sha iti i Yehova* yô, a yima nan.”’

22 “Ne ior i Iserael, ungwa nen mkaanem man: Yesu, Ornasareti la, lu or u Aôndo tese ne un ken igbar sha ityom i ageegh man akaa a kpilighyol kua uivande mba Aôndo lu eren sha ikyev na hen atô wen la, vough er ne ayol a en kpa ne fe nahan. 23 Or shon, u i na ne un, er Aôndo vande wan ken ishima shi tsenga fan kwagh shon ne, yange ne mande un sha kon sha ikyev i mbavendanatindi, ne wua un kpaa. 24 Kpa Aôndo nder un shin ku, a sagh un ikyangenev mbi kuugh kera, sha ci u lu u ku ua fatyô u kangen un ga. 25 Gadia Davidi ôr kwagh na ér: ‘M ver Yehova* ken hemen wam* gbem, sha ci u ngum ken uwegh ku yanegh sha u mayange m de tenger ga yô. 26 Sha ityôkyaa ne yô, ishima yam hingir sar sar shi nombor wam ember kpishi. Nahan me lu* ken ishimaverenkeghen; 27 sha ci u ú undum* shin Uwar* ga, shi ú de wer u a civir we sha mimi a̱ hôô ga. 28 U tesem igbenda i uma; u va ivim a msaanyol kpishi sha ishigh you.’

29 “Anmgbianev, de m ôr ne kwagh u orya Davidi a ishima i gbar gbar; yange kpe, i ii un, shi uwar na ngu heen zan zan nyian. 30 Er lu profeti shi fa er Aôndo bum a na ér una ver wan na ugen sha ikyônough nagh ki torough yô, 31 a tsenga nengen ér a va nder Kristu shin ku, shi a ôr kwagh sha mi ér, i undu un shin Uwar* ga, shi iyol na kpa hôô ga. 32 Aôndo nder Yesu ne shin ku, man se cii se mba mbashiada sha kwagh ne. 33 Nahan, er i kôndo a Yesu sha a za tem ken uwegh ku yanegh ku Aôndo, shi Ter a ne un icighan jijingi u yange tôndo zwa a na la yô, a haa un sha a vese, man ka kwagh shon vough je ne lu nengen shi ungwan ne. 34 Davidi yange kôndo yem sha ga, kpa un iyol na kaa ér, ‘Yehova* kaa a Terem ér: “Temam ken uwegh ku yanegh 35 zan zan me kar veren mbahyomov ou ve̱ lu u kpenga* u pendan angahar sha mi.”’* 36 Sha nahan yô, ya u Iserael cii a fa ér mimi je, Aôndo gema Yesu u yange ne mande un sha kon ne a hingir Ter man Kristu.”

37 Nahan mba ongo kwagh ne yô, ishima ta ve kwe. Tsô ve pine Peteru kua mbaapostoli mbagenev mbara cii ér: “Anmgbianev, ka nyi i gbe u se ere?” 38 Peteru kaa a ve ér: “Gema nen asema i er hanma wen batisema ken iti i Yesu Kristu sha u i de ne asorabo yô, nahan ne ngohol iyua i icighan jijingi. 39 Gadia i er ityendezwa ne a ven kua ônov enev, man ior mba ve lu ken ajiir a icaa, mba Yehova* Aôndo wase una yila ve hen a na cii.” 40 Shi a ôr ve akaa agen kpishi, a er shiada vighe vighe, lu wan ve kwagh kaan ér: “De nen i yima ne ken kov u ifer ne.” 41 Nahan i er mba ve ngohol kwaghôron na saan saan la batisema. Sha iyange la, ior seer iyenge kuma er 3,000 nahan. 42 Ve za hemen u veren ishima sha ityesen i mbaapostoli, kohol imôngo,* yan kwagh imôngo shi eren mbamsen.

43 Jighilii yô, mciem hii u gban hanma or iyol, shi mbaapostoli lu eren akaa a kpilighyol kpishi kua uivande. 44 Mba ve hingir mbananjighjigh la cii ve zua ve lu imôngo, shi ve kohol akaa a ve lu a mi cii sha ci u wasen hanmô ve, 45 ve lu teen akaa a ve, karen hanma or ken a ve cii inyaregh sha mbamgbe mba nan vough vough. 46 Shi ve luun ken tempel ayange ayange, ve banen ker ga; ve lu a awashima môm, shi ve lu kohol ken uya kposo kposo yan kwaghyan imôngo, nan mbagenev ken a ve kwaghyan a iember tsung man a ishima i môm. 47 Ve lu wuese Aôndo, shi doo ior cii a ve. Shi Yehova* lu seer mba i lu yiman ve la sha a ve ayange ayange.