Nehemia

9 Sha iyange i sha 24 i uwer ne la, Mbaiserael kohol imôngo; ve lu hôron kwaghyan a akondo a zungwen iyol man a inya shin ityo.+ 2 Mba ve lu Mbaiserael kpôô kpôô la pav lu kposo a akuraior agen cii,+ ve tile ve pase asorabo a ve kua akaa a uter vev er shami ga la.+ 3 Maa ve mough sha ajiir a ve tema la ve tile sha, nahan ve ôr takeda u Tindi+ u Yehova Aôndo ve genger genger kuma ahwa atar,* ahwa atar agen la di ve lu pasen asorabo a ve shi guren sha ishigh ki Yehova Aôndo ve.

4 Tsô Yeshua man Bani man Kademiel man Shebania man Buni man Sherebia+ man Bani kua Kenani ve unde ve tile sha tsembe+ u Mbalevi la, ve er msen hen Yehova Aôndo ve genger genger. 5 Maa Yeshua man Kademiel man Bani man Hashabeneia man Sherebia man Hodia man Shebania man Petahia mba ve lu Mbalevi la di ve kaa ér: “Mough nen sha wuese nen Yehova Aôndo wen zan zan gbem sha won.+ I wuese iti you i icivirigh i i gande hanma icivir man iwuese i i dugh hen ior cii la.

6 “Ka we tseegh u lu Yehova ye.+ U gba usha, een, usha mba ve hembe gban ica la man akum a ve cii,* shi u gba tar man akaa a a lu sha u cii, kua uzegembamngerev man akaa a a lu shin ve cii. U na ve cii mba uma, man akum a sha kpaa nga ngurum sha ishigh you. 7 We u ngu Yehova Aôndo u mimi, we u yange u tsua Aberam+ u due a na ken Ur,+ gar u Mbakaldi shi u na un iti wer Aberaham la.+ 8 Yange u nenge lu a ishima i eren kwagh u mimi sha ishigh you,+ nahan u tôndo zwa a na wer u na un tar u Mbakaanan man Mbahiti man Mbaamor man Mbaperishi man Mbayebushi kua Mbagirgashi, u na ônov nav* u;+ shi u kure uityendezwa ou kpaa, sha ci u we u ngu u perapera.

9 “Shi u nenge ican i uter asev lu yan ken Igipiti la,+ shi u ungwa mliam vem hen Zegemnger u Nyian la. 10 Maa u er akaa a kpilighyol kua uivande sha u tsahan Farou man mbatomov nav kua ior mba ken tar na cii,+ sha ci u u fa er ve lu manger+ sha ior ou yô. Nahan u na iti you za gwa zan zan nyian.+ 11 Shi u pav zegemnger sha ishiv vev, ve ndyar sha tareghnyaagh ve per,+ u gema u ker mba ve lu zendan ve la ve za gba shin aiv a zegemnger er iwen i i kende i shin mngerem ma ma lu kpianger nahan.+ 12 U lu hemen ve atetan sha ibyeenegh ki lun er ityôgh nahan, tugh di sha usu u lun er ityôgh nahan sha u tan ve iwanger sha gbenda hen ape ve lu zan cii.+ 13 Shi u sen sha Uwo u Senai+ u lam a ve sha aôndo+ shi u na ve akaaôron a ou a perapera man atindi a mimi* kua akaawan a injaa man akaa a u ne zwa wer i er la.+ 14 U pase ve kwagh u Iyange i Memen you i i lu icighan la,+ shi u ôr ve akaa a vea eren yô, shi u na ve akaawan a ou man atindi sha ikyev i wanakiriki wou Mose. 15 U na ve kwaghyan* u sha kpaa, sha shighe u ijen kôr ve la,+ shi u er mngerem due ken vande sha ci ve shighe u imura kôr ve la,+ shi u kaa a ve wer ve nyôr ken tar u yange u bum* wer u na ve u hingir u ve la.

16 “Kpa uter asev er kwagh sha iyolgengese,+ shi ve hingir u eren kwagh sha icihi,*+ ve ver ato sha atindi a ou kpaa ga. 17 Ve venda u keghen ato+ shi ve umbur akaa a kpilighyol a u er hen atô ve la ga, kpa ve hingir u taver ityough,* ve tsua orhemen ér vea hide vea yem ken Igipiti vea za lu ikpan her.+ Kpa we u ngu Aôndo u u kegh iyol u den ior kwaghbo yô,* mhôônom ma ker u* shi u zungu mhôônom, u vihin ishima fele ga, shi dooshima* wou ngee+ nahan u ta ve kera ga.+ 18 Yange ve er eev* mbu wanbua, ve lu kaan ér, ‘Ka Aôndo wou u a due a we ken Igipiti kera je ne,’+ shi ve er kwagh a we sha ilyahan kpishi. 19 Nahan je kpa u undu ve ken taaikyôngo ga,+ sha ci u u ngee a mhôônom ma zungwen. Ibyeenegh ki lun er ka ityôgh la kar hen a ve kera ga, ki za hemen u tesen ve gbenda atetan, tugh kpaa usu u lun er ka ityôgh la za hemen u tan ve iwanger hen ape ve lu zan la.+ 20 U na jijingi wou u dedoo sha u a na ve mkav,+ u nyume zwa ve mana ga+ shi u na ve mngerem shighe u imura kôr ve yô.+ 21 U koso ve ken taaikyôngo anyom 40.+ Kwagh môm ban ve ga. Akondo a ve bee iyol ga,+ angahar a ve kpa mura ga.

22 “U gema ityartor man akuraior u na ve, u pav i ker u na hanma or ci u nan,+ nahan ve ngohol tar u Shihon,+ ka tar u tor u Heshebon+ kua tar u Ogo+ tor u Bashan je la. 23 U na ônov vev ngee er asan a sha aôndo nahan.+ Maa u va a ve ken tar u yange u tôndo zwa a uter vev wer vea nyôr ker shi vea ya dyako u u la.+ 24 Ônov vev nyôr ken tar la ngohol u.+ U hemba Mbakaanan+ mba ve tema ker la sha ashe a ve, u gema ve u na sha ikyev ve, ve man utor vev kua ior vev cii, sha er vea er a ve er ve soo cii yô. 25 Ve ngohol agar a i maa a i kase yô+ man inya i doon iyiav*+ shi ve ya dyako sha uya mba ve mgbough a akaa a dedoo ker kua azôr a i vande timen yô, man ishule i ikyon i wain kua ikyon i olev+ man ikyon kpishi i umen atam. Nahan ve ya kwagh kuma ve shi ve kehe, kpe ve iyol a uerdoo ou.

26 “Nahan kpa ve hemba u ato shi ve hendan a we,+ ve gema ijime a Atindi a ou.* Ve wua uprofeti ou mba ve lu tan ve icin sha u vea hide a ve hen a we la, shi ve er kwagh a we sha ilyahan kpishi.+ 27 Nahan u na ve sha ikyev i mbahyomov vev,+ ve zer eren ve ican.+ Kpa zum u vea vaa a we hen shighe u ican i lu eren ve la yô, u ungwa sha; shi er u mgbough a mhôônom ma zungwen yô, u tindi ior ve va yima ve sha ikyev i mbahyomov vev.+

28 “Kpa vea zuan a zua a mpeveryol nahan maa shi ve hide ve gba eren kwaghbo sha ishigh you,+ maa u na ve sha ikyev i mbahyomov vev, ve gba kighir ve.*+ Maa ve hide ve gba yilan we ér we u wase ve,+ shi we kpa u ungwa sha. U yima ve kwa kimbir kimbir sha ci u u mgbough a mhôônom ma zungwen.+ 29 Shin er yange u ta ve icin sha er u nôngo u hide a ve ve va kura Atindi a ou nahan kpa, ve er kwagh sha iyolgengese, ve venda u keghen ato a akaawan a ou;+ ve per atindi a ou a or a kura a ve nana lu uma la.+ Ve gema ve taver ityough, ve gema ijime a we, ve nômbo ikyôr shi ve venda u keghen ato a we. 30 U wa ishima a ve+ anyom kpishi, u zer tan ve icin sha jijingi wou sha ikyev i uprofeti ou, kpa ve venda u ungwan. Ken masejime yô u na ve sha ikyev i akuraior a hen tar ne.+ 31 Er u ngee a mhôônom ma zungwen yô u tim ve ga+ shi u ta ve kera ga, gadia u ngu Aôndo u mhôônom ma ker u* shi u zungu mhôônom yô.+

32 “Yô, Aôndo wase, we Aôndo u hemban man u ageegh, u u te ihindi iyol shi u kuren uityendezwa ou shi u tesen dooshima gbem la,+ de kenger ican i se lu yan ne cii ashe ashe ga, ican i se man utor asev man mbavesen asev+ man upristi+ man uprofeti+ man uter asev man ior ou cii ve lu yan hii sha ayange a ator a Ashiria+ zan zan nyian ne. 33 U ngu a ishô sha akaa a a tser se ne cii, gadia u er kwagh sha mimi; kpa se yô se er aferakaa.+ 34 Utor asev man mbavesen asev man upristi man uprofeti man uter asev mba tsev kura Atindi a ou ga, shi ve wa ikyo sha akaaôron a ou shin akaa a u ta ve icin sha mi* la ga. 35 Shighe u ve lu ken tartor ve shi kpe ve iyol sha ci u akaa a dedoo a u na ve, ve lu ken tar u gbanger man u doon iyiav u u na ve la je kpa ve civir we ga,+ shi ve gema ijime a aferakaa a ve lu eren la kpaa ga. 36 Yô nenge ase, se mba ikpan+ nyian, man ka ken tar u yange u na uter asev wer ve ya iyiav mbi ker kua akaainjaa a ker ne je se lu ikpan ye. 37 Akaa a dedoo a a dumbur ker la nga ka sha ci u utor mba u ver wer ve hemen se sha ci u asorabo a ase la.+ Ve ya tor sha a vese kua uzendenya asev er ve nenge i doo ve la, ican tsule se kpishi.

38 “Sha ci u atôakyaa ne yô, se mba eren iceghzwa i mimi+ shi ngeren i shin inya, man mbavesen asev kua Mbalevi man upristi cii ver ikyav sha mi* u tesen ér ve lumun a mi.”+