Матта

10 Соңра Иса 12 шәгирдини чагырып, олара җынлары ковуп чыкармага ыгтыяр ве дүрли кеселли хем-де сыркав адамлары сагалтмага гүйч берди.

2 Ине 12 ресулың атлары: Симун дийилйән Петрус* ве онуң доганы Андреас; Зебедейиң оглы Якуп ве онуң доганы Яхя; 3 Филипус ве Бартоломей; Томас ве салгытчы Матта; Алфейиң оглы Якуп; Таддевус; 4 Симун Кананит*. Шейле-де Иса дөнүклик эден Иуда Искариот.

5 Иса 12 шәгирдини ёллап, олара шейле табшырык берди: «Өзге миллетлере гитмәң ве самариялыларың хич бир шәхерине гирмәң; 6 Диңе Ысрайыл өйүниң йитен гоюнларыны гөзләң. 7 Ёлда баряркаңыз: „Гөкдәки Патышалык голайлады“ дийип вагыз эдиң. 8 Сыркавлары сагалдың, өлүлери дирелдиң, хейвере кеселлилери тәмизләң, җынлары ковуп чыкарың. Мугт алдыңыз, мугт хем бериң. 9 Яныңыз билен алтындан, күмүшден я-да мисден пул алмаң. 10 Я-да ёла иймитли торба, яныңыз билен ики эшик, аякгап, я хаса алмаң, чүнки ишчи чөреге мынасыпдыр.

11 Хайсы шәхере я оба барсаңыз-да, ол ерде мынасып адамлары гөзләң ве гайдянчаңыз, шол ерде болуң. 12 Өе гирениңизде, ичердәкилере салам* бериң. 13 Эгер олар сизи кабул этселер, онда берекет* аларлар. Эмма кабул этмеселер, берекедиңиз сизе гайдып гелер. 14 Кимдир бири сизи кабул этмесе я-да сөзлериңизи диңлемесе, шол өйден, я-да шәхерден чыканыңызда, аягыңызың тозаныны какың*. 15 Сизе догрусыны айдярын, Хөкүм гүнүнде* Содом билен Гоморраның яшайҗыларына шол шәхере гараныңда хас аңсат дүшер.

16 Ине, мен сизи мөҗеклериң арасына гоюнлар кимин ёллаярын; шонуң үчин йыланлар ялы сересап ве кепдерилер ялы сада* болуң. 17 Әгә болуң, себәби адамлар сизи казыете элтерлер ве синагогаларда енҗерлер*. 18 Мениң шәгирдимдигиңиз үчин, олар сизи хөкүмдарларың ве патышаларың өңүне алып барарлар. Шонда сиз олара ве өзге миллетлере шаятлык эдип билерсиңиз. 19 Эмма сизи оларың өңүне элтенлеринде, нәме я-да нәдип айдарын дийип алада этмәң. Себәби нәме айтмалыдыгыны шол бада билерсиңиз. 20 Шонда диңе сизиң өзүңиз дәл, эйсем, сиз аркалы Атаңызың рухы гепләр. 21 Шейле-де адамлар өз доганыны өлүме табшырарлар. Ата өз чагасына, чагалар хем ата-энесине гаршы чыкып, олары өлдүрерлер. 22 Мениң адыма иман эдйәндигиңиз үчин, хеммелер сизи йигренер. Эмма соңуна ченли чыдан халас болар. 23 Сизи бир шәхерде ызарласалар, башга шәхере гачың. Сизе догрусыны айдярын, Ынсан оглы Ысрайылың әхли шәхерлерини айланып етишмәнкәңиз гелер.

24 Шәгирт халыпасындан, гул хем хоҗайынындан улы дәлдир. 25 Шәгирт халыпасы, гул хем хоҗайыны ялы болса бегенмелидир. Адамлар өй эесине Беелзебул* диен болсалар, онда өй-ичерисиндәкилери сылармы?* 26 Шонуң үчин адамлардан горкмаң. Үсти ачылмаҗак ве хич хили билинмән галҗак гизлин зат ёкдур. 27 Мениң гараңкылыкда айдянларымы ягтылыкда, пышырдап айдянларымы җайларың үчеклеринден ыглан эдиң. 28 Бедени өлдүрип, йөне җаны* өлдүрип билмейәнлерден горкмаң; гайтам, хем җаны, хем бедени Җәхеннемде* ёк эдип билйәнден горкуң. 29 Ики серчәни бир теңңә* сатярлар, шейле дәлми? Эмма оларың екеҗеси-де ере гачанда, гөкдәки Атаңызың назарындан сыпян дәлдир. 30 Сизиң болса башыңыздакы сачыңызам саналгыдыр. 31 Шонуң үчин горкмаң, сиз көп серчелерден-де хас гымматлысыңыз.

32 Эгер бири адамларың өңүнде мениң шәгирдимдигини айтмага чекинмесе, мен хем оны гөкдәки Атамың өңүнде шәгирдим хасапламага чекинмерин. 33 Эмма ким адамларың өңүнде менден йүз өвүрсе, мен хем гөкдәки Атамың өңүнде ондан йүз өврерин. 34 Мен ер йүзүне парахатлык гетирмек үчин гелендирин өйтмәң; мен парахатлык дәл-де, агзалалык* гетирдим. 35 Себәби мен оглы атасындан, гызы энесинден ве гелни гайыненесинден айырмага гелдим. 36 Сизе догрусыны айдярын, адамың душманы өй-ичерисиндәкилери болар. 37 Ким атасыны я энесини менден хас көп сөйсе, шәгирдим болмага мынасып дәлдир; ким оглуны я гызыны менден хас көп сөйсе, шәгирдим болмага мынасып дәлдир. 38 Ким җебир пүрсүни* алып ызыма дүшмесе, мениң шәгирдим болмага мынасып дәлдир. 39 Ким җаныны* халас этҗек болса, оны йитирер. Йөне җаныны* мениң угрумда йитирен оны халас эдер.

40 Сизи кабул эдйән мени-де кабул эдйәндир, мени кабул эдйән мени Иберени-де кабул эдйәндир. 41 Пыгамбери пыгамбер боландыгы үчин кабул эдйән адам пыгамбериң сылагыны алар; догры адамы догрулыгы үчин кабул эдйән адам догры адамың сылагыны алар. 42 Сизе догрусыны айдярын, шәгиртлеримден* бирине шәгирдим боландыгы үчин бир кәсе совук сув берйән адам хөкман сылагыны алар*».