Матта
11 Иса 12 шәгирдине гөркезме беренден соңра, башга шәхерлере өвретмәге ве вагыз этмәге гитди.
2 Яхя туссаглыкдака, Месихиң эден ишлери барада эшиденде, онуң янына шәгиртлерини иберип, 3 Исадан: «Бизиң Гарашянымыз сенми я-да башга бири гелмели?» дийип сорамагы табшырды. 4 Иса олара шейле җогап берди: «Барың-да, эшидйән ве гөрйән затларыңызы Яхя гүррүң бериң: 5 көрлер гөрйәр, агсаклар йөрейәр, хейвере кеселлилер тәмизленйәр, керлер эшидйәр, өлүлер дирелйәр, гарыплара хош хабар айдыляр. 6 Мен бабатда шүбхеленмейән* адам багтлыдыр».
7 Иса Яхяның шәгиртлерини уградансоң, мәрекә йүзленип, Яхя барада шейле дийди: «Сиз чөле нәме гөрмәге гитдиңиз? Еле ыранян гамшымы? 8 Онда сиз нәме гөрмәге гитдиңиз? Гымматбаха эшик геен адамымы? Гымматбаха эшик геен адамлар патышаларың өйүнде боляр. 9 Догрудан-да, сиз ол ере нәме үчин гитдиңиз? Пыгамбери гөрмәгеми? Хава, сизе диййәрин, ол пыгамберден-де хас улудыр. 10 Ол хакда шейле сөзлер языландыр: „Ине, мен сениң өңүңден хабарчымы ёллаярын, ол саңа ёл тайярлар!“ 11 Сизе догрусыны айдярын, аяллардан догланларың арасында сува чүмдүрйән Яхядан бейиги болан дәлдир. Эмма гөкдәки Патышалыкда иң пес везипәни эелейән хер кес ондан бейикдир. 12 Сува чүмдүрйән Яхяның гүнлеринден бәри, адамлар гөкдәки Патышалыга етмеги максат эдинйәрлер, җан эдйән адамлар хем оңа етйәрлер. 13 Галыберсе-де, Яхяның гүнлерине ченли Пыгамберлер язгыларында ве Мусаның канунында гелеҗекки затлар өңүнден айдылыпды; 14 эгер муны кабул этмек ислесеңиз, онда „гелмели Ыляс“ Яхядыр. 15 Гой, гулагы бар адам эшитсин.
16 Мен бу несли ким билен деңешдирейин? Бу несил базарларда отурып, дең-душларына шейле диййән чагалар ялыдыр: 17 „Биз сизиң үчин түйдүк чалдык, сиз болса танс этмедиңиз; биз зарын-зарын агладык, сиз болса хасрат чекмедиңиз*“. 18 Шонуң ялы Яхя хем геленде, хеммелер ялы ийип-ичмеди, эмма адамлар оңа: „Ол җынлы“ диййәрлер. 19 Ынсан оглы геленде, хеммелер ялы ийип-ичсе-де, адамлар оңа: „Ине хаҗымелик, аракхор*, салгытчыларың ве гүнәкәрлериң досты“ диййәрлер. Шейлеликде, адам акылдардыгыны догры ишлери билен субут эдйәндир».
20 Соңра ол энчеме гудратлары гөрен, йөне шонда-да тоба этмедик шәхерлере кәйәп, шейле дийди: 21 «Вай гүнүңизе, Хоразиниң яшайҗылары! Вай гүнүңизе, Бетсайданың яшайҗылары! Эгер сизде гөркезилен гудратлар Сур билен Сидонда* гөркезилен болсады, онда олар биреййәм тоба эдип, җул гейнердилер ве күлүң үстүнде отурардылар. 22 Шонуң үчин сизе диййәрин, Хөкүм гүнүнде Сур билен Сидоның яшайҗыларына сизе гараныңда хас аңсат дүшер. 23 Эй Капернаумың яшайҗылары, Худай сизи арша* чыкарар өйдйәрмисиңиз? Ёк, ол сизи Габра* индирер, себәби сизде эдилен гудратлар Содомда гөркезилен болсады, онда ол хәзире ченли аман галарды. 24 Шонуң үчин сизе диййәрин, Хөкүм гүнүнде Содомың яшайҗыларына сизе гараныңда хас аңсат дүшер».
25 Шонда Иса шейле дийди: «Эй Атам, гөгүң ве ериң Эеси, сени хеммелериң өңүнде шөхратландырярын, себәби сен бу затлары акылдар хем билимли адамлардан гизләп, чагалар ялы песгөвүнли адамлара ачдың. 26 Хава, Атам, бу сениң ислегиңди. 27 Әхли зады Атам мениң элиме берендир. Оглы Атадан башга хич ким говы танаян дәлдир; Атаны-да Оглундан ве Оглуң танатмак ислейән адамындан башга хич ким говы танаян дәлдир. 28 Эй ядап халыс болан ве агыр йүкли адамлар, мениң яныма гелиң, мен сизе дынчлык берейин. 29 Мениң боюнтырыгымы эгниңизе алың-да, менден өврениң, чүнки мен юмшак ве песгөвүнлидирин. Шонда җаныңыз дынчлык тапар. 30 Себәби мениң боюнтырыгым юмшак*, йүкүм еңилдир».