Матта
18 Соңра шәгиртлери Исаның янына гелип: «Гөкдәки Патышалыкда иң улы ким болар?» дийип сорадылар. 2 Иса бир чаганы чагырды-да, оны шәгиртлериниң өңүнде дурзуп, 3 шейле дийди: «Сизе догрусыны айдярын, эгер дүшүнҗәңизи ве хәсиетиңизи үйтгедип, шу чага ялы болмасаңыз, гөкдәки Патышалыга* асла гирип билмерсиңиз. 4 Шейлеликде, ким шу чага ялы песгөвүнли болса, шол хем гөкдәки Патышалыкда иң улы болар. 5 Мениң адым үчин шейле чаганы кабул эден адам мени-де кабул эдйәндир. 6 Эмма ким маңа иман эдйән песгөвүнли адамларың иманының говшамагына* себәп болса, бойнуна эшегиң айлаян дегирмен дашыны асып, деңизде гарк боланы хас говы боларды.
7 Эй бу дүнйәниң адамлары, вай гүнүңизе! Себәби сиз башгаларың иманыны говшадярсыңыз*. Ким башгаларың иман этмегине пәсгел берсе*, онуң башына мушакгат инер! 8 Эгер сениң элиң я-да аягың гүнә этмегиңе* себәп болян болса, оны кес-де ташла. Ики элиң я-да ики аягың билен эбеди ода* ташлананыңдан, элсиз, я-да аяксыз болуп яшайша говшаның говудыр. 9 Шейле-де гөзүң саңа гүнә этмегиңе* себәп болса, оны оюп ташла. Ики гөзли болуп Җәхеннем* одуна ташлананыңдан, бир гөзли болуп яшайша говшаның говудыр. 10 Песгөвүнли адамлары кемситмәң. Сизе диййәрин, оларың перишделери гөкде элмыдама Атамың йүзүни гөрйәндирлер. 11 *——
12 Сиз нәхили пикир эдйәрсиңиз, эгер бир адамың 100 гойны болуп, оларың бири йитсе, ол 99 гойнуны дагда галдырып, йитен гойнуны гөзлемәге чыкмазмы? 13 Сизе догрусыны айдярын, эгер оны тапса, йитмедик 99 гойнуна гараныңда, тапылан бир гойнуна хас көп бегенер. 14 Шонуң ялы-да гөкдәки Атам песгөвүнли адамлардан екеҗесиниң хем йитмегини ислемейәр.
15 Эгер доганың саңа гаршы гүнә этсе, бар-да, икичәк геплешип, оңа эден этмишини айт. Эгер диңлесе, сен оңа догры ёла дүшмәге көмек эдерсиң. 16 Эгер диңлемесе, яныңа бирки шаяды алып бар, чүнки хер иш ики я үч шаядың сөзи билен тассыкланяндыр. 17 Эгер олары-да диңлемесе, онда йыгнага* айт. Эгер йыгнагы-да диңлемесе, гой, ол сениң үчин башга халкың адамы ве салгытчы ялы болсун.
18 Сизе догрусыны айдярын, ер йүзүнде баглан задыңыз гөкде-де багланар, ер йүзүнде чөзен задыңыз гөкде-де чөзүлер. 19 Сизе ене-де диййәрин, эгер араңыздан ики адам ер йүзүнде өзара ылалашып, бир ваҗып зады дилесе, гөкдәки Атам олар үчин муны эдер. 20 Ики я-да үч адам мениң адым үчин ислендик ерде йыгнанышса, мен олар билен биле боларын».
21 Соңра Петрус гелип: «Агам, маңа гаршы гүнә эден доганымы нәче гезек багышламалы? Еди гезекми?» дийип сорады. 22 Иса оңа: «Саңа диййәрин, еди гезек дәл, 77 гезек*» дийди.
23 «Гөкдәки Патышалыгы гулларындан алгыларыны йыгнаян патыша меңзетсе болар. 24 Ол алгыларыны йыгнап башланда, 10 мүң талант* бергиси болан гулуны янына гетирдйәр. 25 Эмма онуң төлемәге хич зады болмансоң, патыша оны, аялыны, чагаларыны ве бар задыны сатып, пулуны алмагы буюряр. 26 Шонда гул дыза чөкүп: „Хоҗайын, ене бираз гараш. Мен әхли бергими гайтарып берерин“ дийип ялбаряр. 27 Патышаның рехими инип, бар бергисинден гечйәр-де, оны гойберйәр. 28 Эмма гул дашары чыканда, өзүне 100 динар* бергиси болан гулы тапып, оны тутяр-да: „Бергиңи бер“ дийип богуп башлаяр. 29 Гул хем дыза чөкүп: „Бираз гарашай, бергими берерин“ дийип ялбаряр. 30 Эмма ол диңлемек ислемән, оны түрмә басдырып, тә бергисини берйәнчә сакладяр. 31 Бейлеки гуллар муны гөрүп, өрән гынанярлар. Олар патыша әхли болан затлары гүррүң берйәрлер. 32 Шонда патыша оны янына чагырдып, шейле диййәр: „Эй залым гул, сен ялбараныңда, мен сениң әхли бергилериңи гечипдим. 33 Мениң саңа рехим эдишим ялы, сен-де ёлдашыңа рехим этмели дәлмидиң?“ 34 Патышаның гахары гелип, оны гаравуллара табшыряр. Олар хем оны түрмә басып, тә бергисини берйәнчә саклаярлар. 35 Шейлеликде, эгер сиз доганыңызы йүрекден багышламасаңыз, гөкдәки Атам хем сизи багышламаз».