Матта

26 Иса бу сөзлери айдып боландан соңра, шәгиртлерине шейле дийди: 2 «Сиз ики гүнден Пасха байрамының болҗакдыгыны ве Ынсан оглуның душманларың элине берлип, пүрсе чүйленҗекдигини билйәрсиңиз».

3 Шол вагт улы руханылар ве халкың яшулулары Каяфа атлы баш руханының ховлусында йыгнандылар. 4 Олар Исаны мекирлик* билен туссаг эдип, өлдүрмек үчин дил дүвүшйәрдилер. 5 Эмма олар: «Адамлар гопгун турузмаз ялы, оны байрамчылык гүни туссаг этмәлиң» диййәрдилер.

6 Иса Бетанияда өң хейвере кесели болан Симуның өйүндекә, 7 бир аял ичине якымлы ыслы яг гуйлан габы* алып гелди-де, нахар ийип отуран Исаның башына гуюп башлады. 8 Муны гөрен шәгиртлер өз араларында нәгиле болуп, шейле дийдилер: «Бу ягы бидерек харчламак нәмә герек? 9 Оны гыммат сатып, пулуны гарыплара пайласа боларды». 10 Иса оларың нәме хакда гүррүң эдйәндигини билип, шейле дийди: «Сиз нәме үчин бу аялы ынҗадярсыңыз? Ол маңа ягшылык этди ахырын. 11 Гарыплар хемише сизиң яныңызда боларлар, эмма мен сизиң яныңызда хемише болмарын. 12 Ол бедениме якымлы ыслы яг гуюп, мени җайламага тайярлады. 13 Сизе догрусыны айдярын, хош хабар дүнйәниң ниресинде вагыз эдилсе, аялың бу эден иши хакда хем айдылар*».

14 Шонда 12 ресулың бири Иуда Искариот улы руханыларың янына барды. 15 Ол: «Эгер мен оны сизиң элиңизе табшырсам нәме берерсиңиз?» дийди. Олар хем 30 күмүш теңңе берҗекдигини айтдылар. 16 Шондан соң ол Исаны сатмак үчин аматлы пурсат гөзләп башлады.

17 Петир* байрамының биринҗи гүни* шәгиртлер Исаның янына гелип: «Сениң үчин Пасха нахарыны ниреде тайярлалы?» дийдилер. 18 Иса шейле дийди: «Шәхере гириң-де, пылан адамың янына барып: „Мугаллым шейле диййәр: Мениң өлдүрилҗек вагтым голайлады; шәгиртлерим билен Пасха байрамыны сениң өйүңде беллемекчи“ дийиң». 19 Шонда олар Исаның айдышы ялы эдип, Пасха байрамына тайярлык гөрдүлер.

20 Агшам дүшенде, Иса 12 шәгирди билен сачак башында отурды. 21 Олар нахар ийип отыркалар, Иса: «Сизе догрусыны айдярын, сизиң араңыздан бири маңа дөнүклик эдер» дийди. 22 Ресуллар бу сөзлере җуда гынандылар ве хеммеси: «Мугаллым, мен-ә дәлдирин?» дийишдилер. 23 Ол шейле дийди: «Мениң билен бир табага чөрегини батырян адам маңа хайынлык эдер. 24 Догрудан-да, Язгыларда айдылышы ялы, Ынсан оглы өлдүрилмек үчин сизден гидип баряр. Йөне Ынсан оглуна дөнүклик эдйән адамың вай гүнүне! Ол дүнйә инмедик болса говы боларды». 25 Оңа хайынлык этҗек болян Иуда Искариот: «Мугаллым*, мен дәл герек?» дийип сорады. Иса оңа: «Сен муны өзүң айдярсың» дийип җогап берди.

26 Олар нахар ийип отыркалар, Иса чөреги алды-да, дога эдип, оны бөлүшдирди ве шәгиртлерине берип: «Алың, ийиң. Бу мениң беденими аңладяндыр» дийди. 27 Соңра кәсәни алып, Худая дога эдип, миннетдарлык билдирди-де, шейле дийди: «Мундан хеммәңиз ичиң. 28 Бу көп адамларың гүнәлериниң өтүлмеги үчин дөкүлҗек „әхт ганыны“ аңладяндыр. 29 Сизе диййәрин: мен Атамың Патышалыгында сизиң билен тәзе шерапдан ичйәнчәм, мундан бейләк шерап ичмерин». 30 Соңра олар Худая өвгүли айдымлар* айтдылар ве Зейтун дагына гитдилер.

31 Соңра Иса олара шейле дийди: «Шу гиҗе сизиң хеммәңиз менден йүз өврерсиңиз*. Себәби Язгыларда: „Мен чопаны өлдүрерин, сүриниң гоюнлары хем даргар“ дийилйәр. 32 Йөне мен диреленимден соңра, сизден өңүрти Җелилә барарын». 33 Эмма Петрус оңа: «Хеммелер сенден йүз өвүрсе-де, мен хич хачан сенден йүз өвүрмерин!*» дийди. 34 Иса оңа: «Саңа догрусыны айдярын, шу гиҗе хораз гыгырманка, сен менден үч гезек йүз дөндерерсиң» дийди. 35 Петрус оңа: «Сениң билен өлмели болсам-да, сенден асла йүз дөндермерин» дийди. Бейлеки шәгиртлер хем шейле дийдилер.

36 Соңра Иса олар билен Гетсеман диен ере гелди. Ол шәгиртлерине: «Мен гидип дога эдйәнчәм, шу ерде отурың» дийди. 37 Иса янына Петрусы ве Зебедейиң ики оглуны алып гитди. Ол агыр гама батып, җуда хасрат чекип башлады. 38 Иса олара: «Мен* өрән хасрат чекйәрин, гайгыдан яңа өлүп барярын. Шу ерде галып, мениң билен биле оя болуң» дийди. 39 Өзи болса бираз өңе йөреди-де, ере йүзин йыкылып: «Атам, мүмкин болса, бу кәсәни* менден айыр. Йөне мениң ислегим дәл-де, сениң ислегиң болсун» дийип дога этди.

40 Ол үч шәгирдиниң янына доланып геленде, оларың уклап ятандыгыны гөрүп, Петруса шейле дийди: «Мениң билен екеҗе сагат хем оя болуп билмедиңми? 41 Сынага дүшмез ялы, оя болуп, дынгысыз дога эдиң. Догруданам, йүрек* ыхласлы болса-да, беден* эҗиздир». 42 Соңра икинҗи гезек гелип, шейле дога этди: «Атам, мүмкин болса, маңа бу кәседен ичирме. Йөне сениң ислегиң болсун». 43 Иса ене-де шәгиртлериниң янына баранда, уклап ятандыкларыны гөрди, себәби олары укы басярды. 44 Соңра ол гитди-де, үчүнҗи гезек хем шол сөзлерини айдып дога этди. 45 Ол шәгиртлериниң янына доланып, шейле дийди: «Сиз шейле ваҗып вагтда ятып, дынч алярсыңыз! Ине, Ынсан оглуның гүнәкәрлериң элине табшырылҗак сагады голайлашды. 46 Туруң, гиделиң. Ине, маңа дөнүклик эдйән адам голайлашяр». 47 Ол хениз гепләп дурка, ине, 12 ресулың бири Иуда улы руханыларың ве халкың яшулуларының иберен улы мәрекеси билен гелди. Олар гылычлы ве таяклыды.

48 Шонда оңа дөнүклик эден шәгирт нәхили ышарат этҗекдигини айдып: «Кими огшасам, ол сизиң гөзлейән адамыңыздыр; шоны туссаг эдиң» дийипди. 49 Соңра ол гөни Исаның янына барып: «Салам, Мугаллым!*» дийди-де, оны мәхирли огшады. 50 Эмма Иса оңа: «Сен нәме үчин гелдиң?» дийди. Шонда олар гелип, Исаны туссаг этдилер. 51 Ине, Исаның янында дуранларың бири гылыҗыны чыкарды-да, баш руханының гулуны уруп, гулагыны кесди. 52 Шонда Иса оңа шейле дийди: «Гылыҗыңы гынына сал, чүнки гылыч гөтерен гылычдан хем өлер. 53 Я-да мен Атамдан хәзириң өзүнде 12 легиондан* хем көп перишде ибермегини хайыш эдип билмерин өйдйәрмиң? 54 Эгер мен шейле этсем, онда Язгыларда айдыланлар нәдип берҗай болар?» 55 Соңра Иса гелен мәрекә йүзленип, шейле дийди: «Бир гаракчының гаршысына чыкан ялы, сиз мени тутмак үчин гылычдыр таяк билен гелдиңизми? Хер гүн ыбадатханада отурып, адамлара өвредйән вагтым-а мени туссаг этмедиңиз. 56 Эмма пыгамберликде язылан затларың әхлиси берҗай болмалыдыр». Шонда шәгиртлериң хеммеси оны ташлап, гачып гитдилер.

57 Исаны туссаг эденлер оны баш руханы Каяфаның өйүне гетирдилер. Ол ерде канунчылар ве яшулулар йыгнанышыпды. 58 Петрус болса эсли аралыкдан онуң ызына дүшүп, баш руханының ховлусына гелип етди. Соңра бу затларың нәме билен тамамланҗакдыгыны билмек үчин ичери гирип, өй хызматкәрлери билен отурды.

59 Улы руханылар ве бүтин Меҗлис* болса Иса өлүм җезасыны берҗек болуп, оңа гаршы ялан шаятлык агтарярдылар. 60 Эмма көп ялан шаятлар гелсе-де, оларың сөзлери бири-бирине габат гелмейәрди. Ахырсоңы, икиси тапылды. 61 Олар шейле дийди: «Бу адам „Мен Худайың ыбадатханасыны йыкып, оны үч гүнде гуруп билерин“ дийди». 62 Шонда баш руханы еринден туруп: «Сениң айдара задың ёкмы? Оларың саңа гаршы шаятлык эдйәндигини эшитмейәрмиң?» дийди. 63 Эмма Иса дымып дурды. Баш руханы болса: «Дири Худайдан ант ич. Бизе айт, сен Худайың Оглы Месихми?» дийди. 64 Иса оңа: «Муны сениң өзүң айдярсың. Йөне шуны билип гоюң: мундан бейләк сиз Ынсан оглуның Гудратыгүйчлиниң сагында* отураныны ве гөкдәки булутлар билен гелйәнини гөрерсиңиз» дийди. 65 Шонда баш руханы донуны йыртып, шейле дийди: «Ол Худая дил етирйәр! Бизе башга шаят нәмә герек? Онуң Худая дил етирйәндигини өзүңиз эшитдиңиз ахырын. 66 Сиз бу барада нәме пикир эдйәрсиңиз?» Олар: «Ол өлүме мынасыпдыр» дийип җогап бердилер. 67 Соңра олар Исаның йүзүне түйкүрип, оны юмруклаярдылар. Башгалары болса йүзүне шарпык чалдылар. 68 Олар: «Эй Месих, сени ким урды? Пыгамбер болян болсаң, айт ханы» диййәрдилер.

69 Петрус болса шол вагт ховлуда отырды. Шонда онуң янына бир хызматкәр гыз гелип: «Сенем җелилели Исаның янындадың!» дийди. 70 Ол болса хеммелериң өңүнде муны боюн алман: «Мен сениң нәме хакда айдяныңа асла дүшүнмейәрин» дийди. 71 Ол дервезәниң янына баранда, башга бир гыз оны гөрүп: «Бу адам назаретли Исаның янындады» дийди. 72 Ол ене-де боюн алман: «Мен ол адамы танамаярын!» дийип ант ичди. 73 Бираз вагт геченсоң, шол ерде дуран адамлар гелип, Петруса: «Сен, догруданам, шоларың бири, бу сениң геплейшиңден* билдирйәр» дийдилер. 74 Шонда ол өз-өзүне гаргап: «Мен бу адамы танамаярын!» дийип, ант ичип, авы ялап башлады. Эдил шол вагт хораз гыгырды. 75 Шонда Исаның: «Хораз гыгырманка, сен менден үч гезек йүз өврерсиң» диен сөзлери Петрусың ядына дүшди. Ол дашарык чыкды-да, мөңңүрип аглады.