Лука
15 Исаны диңлемек үчин, салгытчыларың ве гүнәкәрлериң әхлиси онуң дашына үйшйәрдилер. 2 Фарисейлер ве канунчылар болса нәгилелик билдирип: «Бу адам гүнәкәрлери говы гаршылап, олар билен ийип-ичйәр» дийишйәрди. 3 Шонда Иса олара шу мысалы гүррүң берди: 4 «Сизиң хайсыңыз 100 гойнуңыз болуп-да, бири йитсе, 99-ны чөлде гоюп, йитен гойнуны гөзлемәге гитмез? 5 Эгер ол йитен гойнуны тапса, бегенҗинден яңа оны эгнине алар. 6 Өйүне геленде болса достларыны ве гоңшуларыны чагырып: „Бегенҗими пайлашың, себәби мен йитен гойнумы тапдым“ диер. 7 Шонуң үчин сизе диййәрин, тоба этмәге мәтәч болмадык 99 саны догры адама гараныңда бир тоба эден гүнәкәр үчин гөкде улы шатлык боляндыр.
8 Я-да бир аялың 10 саны күмүш теңңеси* болуп, бирини йитирсе, ол чыраны якар-да, өйүни сүпүришдирип, оны тапянча, үнсли гөзлемезми? 9 Оны тапанда, җораларыны ве гоңшуларыны чагырып: „Бегенҗими пайлашың, себәби мен йитирен теңңәми тапдым“ диер. 10 Сизе диййәрин, шонуң ялы-да тоба эден бир гүнәкәр үчин Худайың перишделериниң арасында улы шатлык боляндыр».
11 Соңра Иса шейле дийди: «Бир адамың ики оглы барды. 12 Онуң кичи оглы какасына: „Кака, эмләгиңден маңа дегишли бөлегини бер“ дийди. Шонда какасы эмләгини ики оглуна бөлүп берди. 13 Бары-ёгы бирнәче гүнден соң, кичи оглы әхли затларыны йыгнап, узак юрда гитди ве акылсыз яшап, бар эмләгини еле совурды. 14 Әхли пулуны сованда, онуң яшаян юрдунда гүйчли ачлык дүшүп, ол мәтәчлик чекип башлады. 15 Ол хатда шол юрдуң яшайҗыларының бириниң янына барды-да, оңа хызмат эдип башлады. Ол хем оны мейданындакы доңузларыны бакмага иберди. 16 Ол доңузлара берилйән иймитден* гарныны доюрмак ислейәрди, йөне оңа хич ким бермейәрди.
17 Ол акылына айлананда, шейле дийди: „Какамың хакына тутан ишчилериниң бол чөреги бар, мен болса бәрде ачлыгымдан өлүп барярын! 18 Говусы гидип, какамың янына барайын-да, оңа: „Кака, мен гөкдәки Худая ве саңа гаршы гүнә этдим. 19 Мен сениң оглуң дийилмәге-де мынасып дәлдирин. Мени хакына тутулан ишчилериң бири эдәй“ диейин“. 20 Шейдип, ол турды-да, какасының янына гитди. Ол хениз узакдака, какасы оны гөрүп, йүреги гыйылды ве ылгап барды-да, оны гуҗаклап*, мәхирли огшады. 21 Шонда ол какасына: „Кака, мен гөкдәки Худая ве саңа гаршы гүнә этдим. Мен сениң оглуң дийилмәге-де мынасып дәлдирин“ дийди. 22 Эмма какасы гулларына шейле дийди: „Ханы, чалтрак гидиң-де, иң говы узын доны гетирип, оңа гейдириң, бармагына йүзүк дакың, аягына-да аякгап бериң! 23 Шейле-де бакылан өкүзи гетирип союң. Гелиң, ийип-ичелиң-де, той туталың. 24 Себәби мениң оглум өлүди, инди дирелди; ол йитипди, инди болса тапылды“. Шейдип, олар шатланмага башладылар.
25 Шонда онуң улы оглы экин мейданындады. Ол доланып, өйүне голай геленде, айдым-сазың ве танс эдйәнлериң сесини эшитди. 26 Ол хызматкәрлериң бирини янына чагырып, ондан болян затлары сорады. 27 Хызматкәр оңа: „Сениң доганың доланып гелди. Онуң саг-аман доланып гелендиги үчин, какаң бир семиз өкүзи сойдурды“ дийди. 28 Ол гахарланып, өе-де гирмеди. Шонда какасы дашарык чыкып, оңа ялбарып башлады. 29 Ол хем какасына шейле җогап берди: „Ине, мен энчеме йыл бәри саңа хызмат эдип гелйәрин ве элмыдама саңа гулак асярын. Йөне сен достларым билен шатланмагым үчин маңа екеҗе овлак хем бермәндиң. 30 Эмма эмләгиңи бозук аяллара совран оглуң гелди велин, сен онуң үчин семиз өкүз сойдуртдың“. 31 Шонда какасы оглуна: „Оглум, сен элмыдама мениң билендиң, затларымың барысы сениңки ахырын. 32 Бизиң шатланып той тутмагымызың себәби, доганың өлүди, инди дирелди; ол йитипди, инди болса тапылды“ дийди».