1 Коринфлилер
1 Худайың ислеги билен Месих Исаның ресулы болмага чагырылан мен Павлус, доганымыз Сосфен билен 2 Худайың Коринфдәки йыгнагына хат язярын. Сиз Месих Иса билен бирликде мукаддес эдилип, әхлимизиң Халыпамыз болан Иса Месихиң адыны хемме ерде чагырянлар билен билеликде мукаддес болмага чагырылдыңыз.
3 Ата Худайымыздан ве Халыпамыз Иса Месихден сизе мерхемет хем парахатлык болсун.
4 Мен Худайың Месих Иса аркалы сизе эден мерхемети үчин элмыдама Оңа миннетдардырын. 5 Себәби Худай сизи Месих Иса аркалы геплемәге долы укыплы эдип, билимде өсдүрмек үчин әхли зада бай этди. 6 Месих хакдакы шаятлык хем сизиң араңызда көк урды. 7 Шонуң үчин сиз Халыпамыз Иса Месихиң аян болмалы вагтына сабырсызлык билен гарашян дөврүңиз хич затда мәтәчлик чекйән дәлсиңиз. 8 Шейле-де Халыпамыз Иса Месихиң гүнүнде хич ким айыплап билмез ялы, Худай сизи ахырына ченли беркидер. 9 Худай өз сөзүне вепалыдыр, ол сизи өз Оглы, ягны Халыпамыз Иса Месих билен бирликде болмага чагырды.
10 Доганлар, мен сизе Халыпамыз Иса Месихиң ады билен әхли затда ылалашыклы болмагы, араңызда хич хили бөлүнишик болман, гайтам, аң-дүшүнҗеде ве пикирленмекде долы агзыбир болмагы үндейәрин. 11 Себәби, доганларым, Хлояның машгала агзаларының кәбири маңа араңызда бөлүнишигиң дөрәндигини хабар берди. 12 Айтҗак болян задым, араңызда кәбирлери: «Мен Павлусың шәгирди», «Мен Аполлосың шәгирди», «Мен Кифаның* шәгирди», «Мен болса Месихиң шәгирди» диййәрлер. 13 Эйсем, Месих бөлүндими? Сизиң үчин пүрсе Павлус чүйлендими нәме? Я-да сиз Павлусың ады билен сува чүмдүрилдиңизми? 14 Худая шүкүр, мен Криспус билен Гайдан башга хич хайсыңызы сува чүмдүрмедим. 15 Шонуң үчин хич ким сизиң мениң адым билен сува чүмдүрилендигиңизи айдып билмез. 16 Шейле-де мен Стефанисиң өй-ичерисини сува чүмдүрипдим. Йөне булардан башга бирини сува чүмдүрендигим ядыма дүшмейәр. 17 Себәби Месих мени сува чүмдүрмек үчин дәл-де, хош хабары ыглан этмек үчин иберди; акылдар сөзлер билен хем ибермеди, ёгсам Месихиң җебир пүрсүниң* пейдасы болмазды.
18 Себәби җебир пүрси хакдакы хабар хеләк болҗак адамлар үчин акылсызлыкдыр, халас боланлар үчин болса, ол Худайың гүйҗүни аян эдйәндир. 19 Чүнки шейле язылгыдыр: «Мен акылдар адамларың акылдарлыгыны ёк эдерин, билимли адамларың билиминден йүз өврерин». 20 Ханы, акылдар адам? Канунчы* ниреде? Ханы, бу дүнйәниң* давалашмагы халаян адамы? Эйсем, Худай дүнйәниң акылдарлыгыны акылсызлыга өвүрмедими нәме? 21 Бу дүнйә өз акылдарлыгына бил баглап, Худайы танамады. Вагыз эдилйән хабар акылсыз хасапланса-да, Худай иман эдйән адамлары ол аркалы халас этмеги макул билди.
22 Хава, ехудылар аламат гөркезилмегини ислейәр, греклер болса акылдарлыгы агтаряр. 23 Йөне биз пүрсе чүйленен Месихи вагыз эдйәрис. Ол ехудылар үчин бүдреме болса, башга халклар үчин акылсызлыкдыр. 24 Эмма чагырыланларың әхлисине, ягны ехудылара-да, греклере-де Худайың акылдарлыгы ве гүйҗи Месих аркалы аян болды. 25 Йөне Худайың акылсыз затлары адамларың акылдар хасаплаян затларындан-да пайхаслыдыр ве Худайың говшак затлары адамларың гүйчли хасаплаян затларындан-да гүйчлүдир.
26 Доганларым, Худай сизи чагыранда, ынсан гарайшы билен санлыҗаңыз акылдардыңыз, санлыҗаңыз гүйчлүдиңиз, санлыҗаңыз ат-абрайлы машгаладандыңыз. 27 Эмма Худай акылдарлары утандырмак үчин дүнйәниң акылсыз хасаплаянларыны сайлады; гүйчлүлери утандырмак үчин дүнйәниң говшак хасаплаянларыны сайлады. 28 Шейле-де Худай әхмиетли адамлары хич зада өвүрмек үчин дүнйәниң әхмиетсиз хасапланян, кемсидилйән ве әсгерилмейән адамларыны* сайлады. 29 Шоңа гөрә-де хич ким Худайың өңүнде өвнүп билмез. 30 Йөне сиз Худайың ислейши ялы, Месих Исаның шәгирди болдуңыз. Ол бизе Худайың акылдарлыгыны ве догрулыгыны аян этди. Адамлар Иса аркалы мукаддес болуп, онуң төлег гурбаны аркалы азат болуп билйәр. 31 Шейлеликде, Язгылардакы: «Гой, өвүнйән адам Ехова* билен өвүнсин» диен сөзлер берҗай болсун.