1 Коринфлилер

2 Доганлар, мен сизе Худайың мукаддес сырыны ыглан этмәге баранымда, овадан сөзлерим я-да акылдарлыгым билен сизи хайран галдырҗак болмандым. 2 Себәби мен сизиң үнсүңизи диңе Иса Месихе ве онуң пүрсе чүйленмегине чекмеги йүрегиме дүвүпдим. 3 Мен сизиң яныңыза эҗиз халда, горкуда ве гүйчли сандырама билен барыпдым. 4 Сизиң билен гүррүңдеш боланымда, ынандырыҗы ве пайхаслы сөзлер билен вагыз этмән, эйсем, Худайың рухуны хем-де гүйҗүни гөркезмәге чалшыпдым. 5 Мен муны иманыңызың ынсан акылдарлыгына дәл-де, Худайың гүйҗүне эсасланмагы үчин эдипдим.

6 Биз рухы тайдан етишенлериң арасында акылдарлык барада гепләнимизде, не шу дүнйәниң*, не-де дүнйәниң ёк болуп гитҗек хөкүмдарларының акылдарлыгы хакда геплейәрис. 7 Биз мукаддес сыр, ягны Худайың гизлин акылдарлыгы барада геплейәрис. Худай оны бизиң шөхратымыз үчин дүнйә* дөредилмезден өң ниетләпди. 8 Ол акылдарлыга дүнйәниң* хич бир хөкүмдары дүшүнмеди. Эгер дүшүнен болсадылар, онда олар шөхратлы Халыпамызы пүрсе* чүйлемездилер. 9 Язгыларда айдылышы ялы: «Худайың Өзүни сөййәнлер үчин тайярлан затларыны ынсан гөзи гөрен дәлдир, гулагы-да эшиден дәлдир, йүрегине-де етен дәлдир». 10 Эмма Худай олары рухы аркалы бизе аян этди. Себәби рух әхли зады, хатда Худайың чуңңур акылдарлыгыны-да ачяндыр.

11 Адамың пикирини өзүнден* башга хич ким билйән дәлдир. Шонуң ялы-да Худайың пикирини хем Онуң өз рухундан башга хич ким билйән дәлдир. 12 Биз Худайың сөйги билен берен затларына дүшүнип билмегимиз үчин, дүнйәниң рухуны дәл-де, Худайың рухуны аландырыс. 13 Шейле-де биз ынсан акылдарлыгындан өвренен сөзлеримиз билен геплемейәрис. Гайтам, рухы затлары рухуң көмеги билен дүшүндирип, Худайың мукаддес рухундан өвренен сөзлеримиз билен геплейәрис.

14 Тен ислегине гөрә яшаян адам Худайың рухы аркалы ачан затларыны кабул эдип билмейәр. Бу затлар онуң үчин акмаклыкдыр. Ол оңа дүшүнип хем билмейәр, себәби олара дүшүнмек үчин Худайың мукаддес рухы герекдир. 15 Йөне Худайың рухуның гөркезмесине эерйән адам әхли зада дүшүнйәндир ве оны хич ким язгарян дәлдир. 16 Себәби Язгыларда: «Ехова* гөркезме берер ялы, онуң пикирини билен бармы?» дийилйәр. Биз болса Месихиң пикир эдиши ялы, пикир эдйәндирис.