1 Коринфлилер

8 Инди болса бутлара хөдүрленен затлар* хакда айдайын: элбетде, бу бабатда хеммәмизиң билимимиз бар. Йөне билим текепбир эдйәр, сөйги болса абатлаяндыр. 2 Эгер бири нәмедир бир зады билйәндирин өйтсе, аслында, ол оны хениз билмелиси ялы билйән дәлдир. 3 Эмма бири Худайы сөййән болса, Худай оны танаяндыр.

4 Бутлара хөдүрленен затлары иймек хакында айтсам, биз бутуң дүнйәде хич затдыгыны ве еке-тәк бир Худайың бардыгыны билйәрис. 5 Догрудан-да, гөкде я ерде болсун, адамларың таңры дийип хасаплаян энчеме «худайлары» ве энчеме «халыпалары» бар. 6 Йөне биз еке-тәк хак Худайың бардыгыны билйәрис, ол бизиң гөкдәки Атамыздыр. Әхли зады ол яратды, биз хем онуң үчин яшаяндырыс. Халыпамыз хем бирдир, ол Иса Месихдир. Әхли зат ол аркалы ярадылды ве биз ол аркалы яшаяндырыс.

7 Йөне муны хеммелер билйән дәлдир. Кәбирлери өң бутлара сежде эдендиклери үчин, олара хөдүр эдилен затлары иенлеринде, оңа бутлара гурбан эдилен зат хөкмүнде гараярлар. Шейдип, оларың говшак ынсабы хапаланяр. 8 Эмма иймит бизи Худая якынлашдырян дәлдир; биз иймесек-де, хич зат йитирмейәрис, ийсек-де, хич зат газанмаярыс. 9 Йөне ислән задыңызы иймәге хакыңыз болса-да, ынсабы говшаклара бүдреме дашы болмакдан әгә болуң. 10 Эйсем, ынсабы говшак адам сениң шу затлары билип-де, бутларың ыбадатханасында нахар иййәндигиңи гөрсе, онда ол хем бутлара хөдүрленен иймитден иймәге хөвесленмезми? 11 Шейдип, сен билимли болуп хем, ынсабы говшак доганыңың иманыны юмурярсың. Онуң үчин болса Месих җаныны гурбан эдипди. 12 Шейтмек билен, сен доганыңа гаршы гүнә эдип, онуң говшак ынсабыны яралаярсың ве Месихе гаршы гүнә эдйәрсиң. 13 Ине, шонуң үчин хем иймит доганымы бүдредйән болса, онда мен гайдып хич хачан эт иймерин. Шонда доганым мен себәпли бүдремез.