1 Коринфлилер

7 Инди болса сизиң хат язып, менден соран затларыңыз хакда айдайын: эркек адам аяла янашмаса* говы болар. 2 Эмма ахлаксызлыгың* гиңден яйрандыгы себәпли, хер эркегиң өз аялы, аялың хем өз әри болсун. 3 Эркек адам аялының өңүндәки борҗуны* ерине етирсин. Шонуң ялы-да аял хем адамсының өңүндәки борҗуны ерине етирсин. 4 Аялың өз бедениниң үстүнден ыгтыяры ёкдур, бу ыгтыяр әриниңкидир; шонуң ялы-да эркек адамың хем өз бедениниң үстүнден ыгтыяры ёкдур, бу ыгтыяр аялыныңкыдыр. 5 Сиз бири-бириңизи ондан махрум этмәң, йөне дога этмек үчин өзара ылалашып, белли бир вагт айры болуп билерсиңиз. Соңра ене-де бирикмелисиңиз, ёгсам өзүңизе эрк эдип билмән, Шейтаның сынагына дүшәймәң. 6 Мен муны сизе табшырык дәл-де, маслахат хөкмүнде айдярын. 7 Йөне хеммелериң мениң ялы саллах болмагыны ислейәрин. Муңа гарамаздан, хер кесиң Худайдан алан өз сылагы бардыр: кәбири дурмуш гурса, кәбири гурмаяр.

8 Инди болса өйленмедик* ве дул галанлар хакда айдярын: олар мениң ялы саллах болуп галсалар говы болар. 9 Йөне өзлерине эрк эдип билмеселер, гой, дурмуш гурсунлар. Себәби ышк одуна янандан, дурмуш гуранлары говудыр.

10 Дурмуш гуран адамлара болса мен дәл-де, Халыпамыз шейле гөркезме берйәр: аял айры яшамак үчин әринден гитмесин. 11 Эмма гидәен ягдайында-да, башга бирине дурмуша чыкмасын я-да әри билен ярашсын; эркек адам хем аялыны ташламасын.

12 Эмма дурмуш гуранлара Халыпамыз дәл-де, мен диййәрин: эгер бир доганың иман этмейән аялы болуп, ол хем әри билен яшамага разы болса, гой, ол аялыны ташламасын. 13 Шейле-де бир уяның иман этмейән әри болуп, ол хем аялы билен яшамага разы болса, гой, ол әринден гитмесин. 14 Себәби иман этмейән әр аялы аркалы мукаддес эдилендир, иман этмейән аял хем доганымыз аркалы мукаддес эдилендир. Ёгсам, сизиң чагаларыңыз пәк болмазды, инди болса олар мукаддесдир. 15 Эмма иман этмейән адам айры яшамак үчин янёлдашындан гитмекчи болса, гой, гитсин; шейле ягдайда месихчи доган я-да уя янёлдашы билен галмага борчлы дәлдир, йөне Худай сизи парахат яшамага чагырандыр. 16 Эй аял, сен әриң билен галсаң, оны халас этмәге мүмкинчилигиң бардыгыны билмейәрмиң? Эй әр, сен аялың билен галсаң, оны халас этмәге мүмкинчилигиң бардыгыны билмейәрмиң?

17 Муңа гарамаздан, хер кесиң дурмушда өз ягдайы бардыр, Ехова* хем муңа ёл берендир. Шоңа гөрә-де, гой, хер кес Худайың чагырышы боюнча хем гезсин. Мен бу гөркезмәни әхли йыгнакларда берйәрин. 18 Кимдир бири Худайың чагыран вагты эййәм сүннетленен болса, гой, ол шейле-де галсын. Эгер адам чагырылан вагты сүннетленмедик болса, ол сүннетсиз галсын. 19 Аслында, сүннетленмек я сүннетленмезлик дәл-де, Худайың табшырыкларыны берҗай этмек ваҗыпдыр. 20 Ким нәхили ягдайда чагырылан болса, гой, ол шейле-де галсын. 21 Сен гул вагтың чагырылдыңмы? Бу хакда биынҗалык болма. Эгер азат болуп билсең, онда мүмкинчиликден пейдалан. 22 Себәби гул вагты Халыпамызың шәгирди болмага чагырылан адам азатлыга чыкып, Халыпамыза дегишли боляндыр. Азат адам хем чагырыланда, Месихиң гулы боляндыр. 23 Сиз гыммат баха сатын алындыңыз; шонуң үчин инди адамларың гулы болмаң. 24 Доганлар, ким нәхили ягдайда чагырылан болса, гой, ол Худайың өңүнде шейле-де галсын.

25 Инди болса дурмуш гурмадыклар* хакда язярын. Бу бабатда мен Халыпамыздан хич хили гөркезме алмасам-да, өз пикирими айдярын. Халыпамызың маңа рехим эдендиги үчин айтҗак сөзлериме ынанып билерсиңиз. 26 Мениң пикиримче, шу кын дөвүрде адамың шейле ягдайда галмагы өзи үчин хас говудыр. 27 Аялың бар болса, азат болҗак болуп ондан айрылма. Аялың ёк болса, онда аял гөзлеме. 28 Йөне сен дурмуш гуран болсаң-да, хич хили гүнә эден дәлсиң. Эгер дурмуш гурмакчы болсаң, шонда-да гүнә эдйән дәлсиң. Эмма машгала гурян адамларың дурмушында тәзе кынчылыклары дөрәр. Мен болса сизи олардан горасым гелйәр.

29 Шейле-де айтҗак задым, доганлар, вагт аз галандыр. Дурмуш гуранлар мундан бейләк машгала дурмушыны биринҗи орунда гоймасынлар. 30 Аглаянлар агламаянлар ялы, шатланянлар шатланмаянлар ялы болсун, сатын алянлар сатын алмадыклар ялы болсун. 31 Дүнйәден пейдаланянлар ондан долы пейдаланмаянлар ялы болсун; себәби дүнйәниң ягдайы үйтгәп дуряндыр. 32 Аслында, мен сизиң аладасыз яшамагыңызы ислейәрин. Дурмуш гурмадык адам Халыпамызы бегендирҗек болуп, онуң иши билен мешгулланяндыр. 33 Эмма дурмуш гуран адам аялының гөвнүни тапҗак болуп, дүнъеви ишлер билен башагайдыр. 34 Нетиҗеде, шейле адамың үнси бөлүнйәндир. Шейле-де дурмуш гурмадык аял я-да чыкмадык гыз беденини ве пикирини мукаддес саклаҗак болуп, Халыпамызың иши билен мешгулланяндыр. Эмма дурмуша чыкан аял әриниң гөвнүни тапҗак болуп, дүнъеви ишлер билен башагайдыр. 35 Мен бу затлары бойнуңыза йүп салмак үчин дәл-де, сизиң пейдаңыз үчин айдярын. Шонда сиз үнсүңизи бөлмән, Халыпамыза мынасып тәрде гуллук эдип билерсиңиз.

36 Эгер бири дурмуш гурмазлыгы ерликсиз хасаплаян болса ве яшлык хөвеслери хем гечен болса, гой, ол ислейши ялы-да этсин; ол гүнә эдйән дәлдир. Шейле адамлар дурмуш гурсунлар. 37 Йөне кимдир бири дурмуш гурмазлыгы йүрегине дүвүп, муны зерур хасапламаса ве гелен карарында берк дурса, ол говы эдйәндир. 38 Шонуң үчин дурмуш гурян адам хем говы эдйәндир, эмма дурмуш гурмаян адам хас говы эдйәндир.

39 Әри дирикә, аялы оңа баглыдыр. Эмма әри арадан чыкса, ол ислән адамына дурмуша чыкып билер. Йөне ол диңе Халыпамызың шәгирдине дурмуша чыкмалыдыр. 40 Эмма мениң пикиримче, ол дурмуша чыкмаса хас багтлы болар; мен болса өзүмде Худайың рухуның бардыгына ынанярын.