2 Коринфлилер
5 Эгер бизиң ердәки өйүмиз, ягны беденимиз болан чадыр ёк болмалы болса, онда биз гөкде Худайдан ынсан эллери билен гурулмадык эбеди өй алҗакдыгымызы билйәрис. 2 Себәби биз хәзирки өйүмизде* ах чекип, бизи эгин-эшик кимин өртҗек гөкдәки өйүмизи* алмагы йүрекден ислейәрис. 3 Оны аланымызда, биз ялаңач хасапланмарыс. 4 Аслында, биз бу чадырда гүйчли аладалардан яңа ах чекйәрис, себәби биз хәзирки өйүмизи чыкармагы дәл-де, башгасыны геймек ислейәрис. Шонда өлйән беденимизе дерек бакы яшайшы аларыс. 5 Себәби шейле яшайшы тайярлан Худай гелҗекки берекетлериң кепили хөкмүнде бизе мукаддес рухуны берендир.
6 Шонуң үчин биз элмыдама долы ынамлы гезйәрис ве беденде яшаян дөврүмиз Халыпамыздан айры яшаяндыгымызы билйәрис. 7 Себәби биз гөрүнйән затлар аркалы дәл-де, иман аркалы яшаярыс. 8 Эмма биз долы ынамлы гезйәрис ве ынсан беденинде дәл-де, Халыпамыз билен биле яшамак ислейәрис. 9 Шол себәпли өйүмиз онуң билен болсун я-да ондан айры болсун, бизиң максадымыз — онуң гөвнүнден турмакдыр. 10 Себәби хер кес ынсан беденинде яшан дөври эден ягшы я-да эрбет иши үчин сылагыны алар ялы, әхлимиз Месихиң хөкүм күрсүсиниң өңүнде дурмалыдырыс.
11 Биз Халыпамыздан горкуп гезмелидигимизе дүшүнйәрис. Хава, биз адамлары өвредйән затларымыза ынандырмага чалышярыс, йөне Худай бизиң кимдигимизи говы билйәндир. Эмма мен сизиң ынсабыңыз бизиң нәхили адамлардыгымыза дүшүнмәге көмек эдер дийип умыт эдйәрин. 12 Биз сизе өзүмизиң кимдигимизи гайтадан айтҗак болмаярыс, йөне бизе хормат гоюп, гуванмага хөвеслендирйәрис. Шонда сиз йүрегиндәки затлара дәл-де, даш кешбине буйсанян адамлара җогап гайтарып билерсиңиз. 13 Себәби биз акылымыздан азашан болсак, бу Худай үчиндир; эгер сагдын дүшүнҗели болсак, онда сизиң үчиндир. 14 Бизи муңа Месихиң сөйгүси итерйәндир. Себәби биз шейле нетиҗе чыкардык: бир адам хеммелер үчин өлди; чүнки оларың бары эййәм өлүпди. 15 Адамлар инди өзлери үчин дәл-де, оларың угрунда өлен ве дирелен үчин яшасынлар дийип, ол хеммелер үчин өлди.
16 Инди бизиң адамлара болан гарайшымыз оларың даш кешбине эсасланмаяр. Хатда Месихе болан гарайшымыз хем онуң ынсан беденине эсасланан болса-да, инди биз оңа шейле гарамаярыс. 17 Шейлеликде, Месих билен бирликде болан адам тәзе ярадылыш хасапланяндыр; көне затлар гечип гитди; ине, тәзе затлар гелип етди. 18 Эмма әхли зат Худайдандыр. Ол бизи Месих аркалы өзи билен ярашдырды ве бизе ярашдырма гуллугыны берди. 19 Ягны Худай адамларың языкларыны хасаба алман, оларың әхлисини Месих аркалы өзи билен ярашдыряр, бизе болса адамлара Худай билен ярашып билйәндиклерини айтмагы табшырды.
20 Шейлеликде, биз Месихе дерек белленен векиллердирис. Аслында, Худай биз аркалы ялбаряндыр ве биз Месихе дерек: «Худай билен ярашың» дийип ялбарярыс. 21 Иса хич хачан гүнә этмеди. Йөне биз ол аркалы Худайың өңүнде догры адам болуп билер ялы, Худай оны бизиң гүнәлеримиз үчин хөдүрледи.