2 Коринфлилер
7 Шоңа гөрә-де, эзиз доганлар, бизе шейле вадаларың берлендиги үчин, гелиң, бедени ве йүреги* хапалаян ислендик затдан өзүмизи арассалалың, Худайдан горкуп, хас-да мукаддес болалың.
2 Бизи йүрекден кабул эдиң*. Биз хич киме яманлык этмедик, хич киме зыян етирмедик, хич кими өз пейдамыз үчин уланмадык. 3 Мен булары сизи язгармак үчин айтмаярын. Себәби өң айдышым ялы, сизиң билен өлмели болса-да, яшамалы болса-да, сиз бизиң йүрегимиздесиңиз. 4 Мен сизе чекинмән* йүзленип билйәрин, сизе дийсең гуванярын, калбым җуда рахатдыр; әхли бетбагтчылыкларымызда йүрегим шатлыкдан доляр.
5 Догрудан-да, биз Македония геленимизде, җанымыз* рахатлык тапмады, гайтам, әхли ягдайларда хорлук чекипдик. Адамлар бизи ызарлаярды, йыгнаклар хакда-да аладамыз кәнди. 6 Йөне гөвни сыныклара теселли берйән Худай Титусың гелмеги ве янымызда болмагы билен бизе гөвүнлик берди. 7 Биз диңе бир онуң янымызда болмагы билен дәл-де, сизден алан теселлиси аркалы хем теселли тапдык. Ол сизиң мени йүрекден гөрмек ислейәндигиңизи, гүйчли хасрат чекйәндигиңизи ве мен хакда ыхлас билен алада эдйәндигиңизи хабар берди; мен муңа дийсең бегендим.
8 Эгер мен хатым билен сизи гынандыран болсам-да, муңа өкүнмейәрин. Эгер мен язан хатым себәпли сизи бираз вагтлык гынандырандыгым үчин башда өкүнен хем болсам, 9 хәзир бегенйәрин. Йөне сизи гынандырандыгыма дәл-де, гынанмагыңызың сизи тоба этмәге итерендигине бегенйәрин. Себәби биз зерарлы зыян чекмез ялы, сиз Худайың ислейши ялы гынандыңыз. 10 Худайың ислегине лайык гынанмаклык гутулыша элтйәндир, хич хили өкүнч гетирйән дәлдир; эмма дүнйә махсус болан гынанч өлүме элтйәндир. 11 Себәби сизиң Худайың ислегине лайык гынанмагыңыз, гөр, нәхили нетиҗе берди! Бу сизе өзүңизи арассаламак ислегини, эрбетлиге болан йигренҗи, Худайдан горкыны, тоба этмәге гүйчли ислеги, өзгермәге болан ыхласы ве ялңышыңы дүзетмек ислегини берди. Сиз бу меселеде өзүңизи хемме тараплайын айыпсыз алып бардыңыз. 12 Мен сизе хатымы эрбет иш эден я-да эрбетликден зыян чекен адам үчин язмандым. Гайтам, бизе гулак асмак үчин гөркезен ыхласыңыз Худайың өңүнде аян болсун дийип яздым. 13 Ине, шонуң үчин хем биз теселли тапдык.
Шейле-де биз Титусың шатлыгына хас-да бегендик, себәби сизиң әхлиңиз онуң калбына* рахатлык бердиңиз. 14 Мен Титусың өңүнде сизе гуванан болсам, онда айданларым үчин утанҗа галан дәлдирин; бизиң сизе айданларымызың әхлисиниң хакыкат болшы ялы, Титусың өңүнде сизе гуванмагым хем хакыкат болуп чыкандыр. 15 Шейле-де ол сизиң оны чуңңур хормат билен кабул эдендигиңизи ве әхлиңизиң гулак асышыңызы ятлаяр. Шейдип, онуң сизе болан сөйгүси хас-да артяр. 16 Мен хер бир ягдайда сизе ынанып* билйәндигиме бегенйәрин.