2 Коринфлилер
8 Доганлар, биз сизиң Худайың Македониядакы йыгнаклара эден мерхемети хакда билмегиңизи ислейәрис. 2 Олар агыр сынаглар себәпли хорлук чекенлеринде, җуда гарыпдыкларына гарамаздан, улы шатлык ве җомартлык гөркездилер. 3 Олар муны өз ягдайына гөрә этселер-де, мен оларың ягдайларындан-да артык эдендиклерине шаятдырын. 4 Олар садака бермеги хормат сайып, мукаддеслере көмек этмек иследилер, мунуң үчин өзлери бизе йүрекден ялбардылар. 5 Олар бизиң гарашанымыздан хем көп зат этдилер. Йөне олар өзлерини Худайың ислеги боюнча илки билен Халыпамыза ве бизе табшырдылар. 6 Шол себәпли биз Титусы сизиң хөвес билен берен садакаларыңызы йыгнап, араңызда башлан ишини тамамламага хөвеслендирдик. 7 Муңа гарамаздан, сизиң әхли зада, ягны имана, сөзе, билиме, әхли ишде ыхласлы болмага ве бизиң сөйгимизе бай болшуңыз ялы, садака бермекде хем җомарт болуң.
8 Мен муны сизе табшырык хөкмүнде дәл-де, башгаларың чекйән агыр зәхмети ве ыхласы хакда билмегиңиз үчин айдярын. Мен сизиң хем пәк сөйгиңизи гөрмек ислейәрин. 9 Себәби сиз Халыпамыз Иса Месихиң эден мерхемети хакда билйәнсиңиз. Сиз онуң гарыплыгы аркалы баяп билер ялы, ол бай болса-да, сизиң үчин гарып болды.
10 Мениң пикиримче, сиз бу иши этмек билен, өзүңизе пейда гетирйәрсиңиз, себәби бир йыл мундан өң башлан ишиңизи йөне бир этмек билен чәкленмән, эйсем, ыхласлыдыгыңызы хем гөркездиңиз. 11 Инди болса бу иши нәхили ыхлас билен башлан болсаңыз, шонуң ялы эдип хем тамамлаң. 12 Худай йүрекден берлен садаканы кабул эдйәндир, себәби ол адамдан берип билмейән задына дәл-де, берип билйән задына гарашяндыр. 13 Мен башгаларың яшайшыны аңсатлашдырып, сизиңкини кынлашдырмак ислемейәрин. 14 Йөне сиз артыкмач задыңыз билен оларың етмезчилигини долдурың. Шонда олар хем артыкмач зады билен сизиң етмезчилигиңизи долдурып билерлер. Шейдип, араңызда деңлик болар. 15 Себәби шейле язылгыдыр: «Көп зат йыгнан адамың зады ченденаша көп дәлди, аз йыгнан адамың хем зады җуда аз дәлди».
16 Сиз хакда ыхласлы алада этмеги үчин, Титуса хем бизиңки ялы ислег берен Худая миннетдардырыс. 17 Себәби ол диңе бир бизиң хөвеслендирип айдан сөзлеримизи этҗек болман, эйсем, өз ислеги билен яныңыза барасы гелди. 18 Йөне биз онуң яны билен хош хабарың хатырасына эден ишлери үчин әхли йыгнакларда өвүлйән доганы хем иберйәрис. 19 Ол диңе мунуң үчин дәл, эйсем, бизиң билен сыяхат эдип, йыгналан садакалары пайламак үчин йыгнаклар тарапындан белленен догандыр. Биз ол садакалары Халыпамызың* шөхраты ве башгалара көмек этмәге тайындыгымызы гөркезмек үчин пайлаярыс. 20 Шейдип, йыгналан садакалары пайламак меселесинде хич бир адама бизден кемчилик тапмага себәп дөретмейәрис. 21 Себәби биз «диңе бир Ехованың* өңүнде дәл, эйсем, адамларың өңүнде хем әхли затда догручыл болмага чалышярыс».
22 Биз оларың яны билен башга бир доганы хем иберйәрис. Ол көп затда сынагдан гечди ве энчеме меселелерде эрҗеллик гөркезди. Ол сизиң хем догры ишлер этҗекдигиңизе долы ынанып, сизе хас-да көмек эдеси гелйәр. 23 Эмма Титус хакда сорасалар, онуң мениң ёлдашымдыгыны ве сизе көмек этмекде мениң ялы ишдешдигини айдың; я-да доганларымыз барада сорасалар, оларың йыгнакларда ресуллардыгыны ве Месихе шөхрат гетирйәндиклерини айдың. 24 Шейлеликде, йыгнаклара сөйгиңизиң пәкдигини ве сизе бидерек ере гуванмандыгымызы гөркезиң.