1 Селаниклилер

1 Мен Павлус, Силванус* ве Тимотеос билен Ата Худайымыз хем-де Халыпамыз Иса Месих билен бирликде болан Селаникдәки йыгнага хат язярын.

Гой, Худайың мерхемети ве парахатлыгы сизиң билен болсун.

2 Биз дога эденимизде, сизиң әхлиңиз үчин Худая элмыдама миннетдарлык айдярыс. 3 Себәби биз сизиң иман билен эдйән ишлериңизи, сөйги билен чекйән зәхметиңизи ве Ата Худайымызың өңүнде Халыпамыз Иса Месихе болан умыт аркалы гөркезйән чыдамлылыгыңызы хемише ятлаярыс. 4 Доганлар, биз Худайың сизи сөййәндигини ве сайландыгыны билйәрис. 5 Себәби бизиң сизе вагыз эден хош хабарымыз диңе бир сөз аркалы дәл, эйсем, гүйч, мукаддес рух ве берк ынам билен гелип етендир. Сизиң пейдаңыз үчин араңызда нәхили адамлар боландыгымызы өзүңиз хем билйәнсиңиз. 6 Сиз бизиң ве Халыпамызың гөрелдесине эерип, җуда кын ягдая гарамаздан, Худайың сөзүни мукаддес рухуң берйән шатлыгы билен кабул эдипдиңиз. 7 Шейдип, сиз Македониядакы ве Ахаядакы әхли имандашларымыза гөрелде болдуңыз.

8 Македонияда ве Ахаяда яшаян адамларың бары сиз аркалы Ехованың* сөзүни эшитдилер. Йөне Худая болан иманыңыз хакдакы хабар хемме ерлере-де яйрады. Шонуң үчин бу барада хич зат айтмак хем герек дәл. 9 Себәби оларың өзлери-де сизиң билен илкинҗи душушыгымызы энтегем ятлаярлар; сизиң бутлардан йүз өврүп, дири хем хак Худайың гуллары боландыгыңыз хакда хенизем гүррүң берйәрлер. 10 Шейле-де олар Худайың етип гелйән газабындан халас эдйән Оглуна, ягны өлүмден дирелен Исаның гөкден гелмегине гарашяндыгыңызы хабар берйәрлер.