2 Петрус

1 Иса Месихиң гулы ве ресулы болан мен Симун Петрус, Худайымызың хем-де Халасгәримиз Иса Месихиң догрулыгы аркалы бизиң ялы гымматлы имана эе боланлара хат язярын.

2 Мен сизде мерхеметиң ве парахатлыгың хас-да артмагыны ислейәрин. Мунуң үчин Худай ве Халыпамыз Иса Месих барада догры билим алың. 3 Себәби Өз шөхраты хем ягшылыгы* билен чагыран Худайымыз барадакы догры билим бизе гүйч берйәр. Шейдип, биз Худая вепалы яшамак үчин герекли затлары алярыс*. 4 Ол бизе өз* шөхраты ве ягшылыгы аркалы гымматлы хем өрән улы вадалары берди. Шоңа гөрә-де сиз Худайың хәсиетлерине эе болуп, азгын дүнйәниң эрбет хөвеслеринден гача дурярсыңыз.

5 Шонуң үчин сиз бар гүйҗүңизи җемләп, иманыңызы ягшылык* билен, ягшылыгы билим билен, 6 билими өзүңе эрк этмек билен, өзүңе эрк этмеклиги чыдам билен, чыдамы Худая вепалылык билен, 7 Худая вепалылыгы доганлык сөйгүси билен, доганлык сөйгүсини әхли адамлара болан сөйги билен долдурың. 8 Эгер шу хәсиетлер сизде артыгы билен болса, онда Халыпамыз Иса Месих барадакы догры билими уланмакда говшак я-да нетиҗесиз* болмарсыңыз.

9 Эмма кимде бу хәсиетлер болмаса, ол көрдүр, ягтылыга серетмекден боюн гачыряндыр*. Ол өңки эден гүнәлеринден тәмизленендигини унудяндыр. 10 Доганлар, Худайың чагыранларының ве сайланларының арасында вепалы галмага җан эдиң*. Эгер сиз мундан бейләк хем бу хәсиетлери артдырсаңыз, хич хачан йыкылмарсыңыз. 11 Шонда сиз Халыпамыз ве Халасгәримиз Иса Месихиң эбеди Патышалыгына гирмек үчин бол берекетлер аларсыңыз.

12 Сиз бу затлары билсеңиз-де, хакыкатда берк дурсаңыз-да, мен олары сизе элмыдама ятладып дурмагы йүрегиме дүвдүм. 13 Эмма мен чадырымдан* гидйәнчәм, сизиң оя болмагыңыз үчин булары ятлатмагы макул билдим. 14 Мен тизден чадырымдан гитҗегими билйәрин, себәби муны Халыпамыз Иса Месих маңа аян этди. 15 Гиденимден соң хем сиз бу затларың әхлисини өзүңизе ятладып дурар ялы, мен хемише элимде барыны эдерин.

16 Биз сизе Халыпамыз Иса Месихиң гүйҗи ве гелмеги* барада гүррүң беренимизде, өкделик билен тосланып тапылан ялан хекаялары дәл-де, өз гөзүмиз билен гөрен задымызы, ягны онуң аҗайып шөхраты хакда айтдык. 17 Себәби улы шөхратың гөзбашы болан Худай: «Бу мениң сөйгүли Оглум, мен ондан разыдырын» диенде*, ол Ата Худайың хорматына ве шөхратына эе болупды. 18 Хава, биз бу сөзлери онуң билен мукаддес дагда болан вагтымыз эшидипдик.

19 Гөршүмиз ялы, бизде хас ынама мынасып пыгамберлик сөзи бар ве сиз оңа йүзленип догры эдйәрсиңиз. Гүн яшып, даң йылдызы чыкянча, ол сизиң йүрегиңиздәки гараңкылыга ышык кимин нур сачяндыр. 20 Сиз шу ваҗып зады, ягны Язгылардакы пыгамберликлериң кимдир бириниң пикирине эсасланып язылмандыгыны билйәнсиңиз. 21 Себәби пыгамберлик хич хачан адам ислеги билен айдылманды. Адамлар оны Худайың мукаддес рухуның көмеги билен айдярдылар*.