2 Петрус

3 Эзиз доганларым, мен инди сизе икинҗи хатымы язярын. Биринҗи хатымдакы ялы хәзирем сизе кәбир затлары ятладып, сагдын пикирленмәге хөвеслендирйәрин. 2 Мукаддес пыгамберлериң айдан велиликлерини ве Халыпамызың хем Халасгәримизиң өз ресуллары аркалы берен табшырыгыны унутмаң. 3 Илки билен, сиз шуны билмелисиңиз: соңкы гүнлерде яңсылайҗы адамлар пейда болар. Олар ягшы затларың үстүнден гүлүп, өз ислегине гөрә эрбет ишлери эдерлер. 4 Олар: «Ханы, гелҗек дийип вада берен ниреде? Ата-бабаларымызың дөврүнден бәри хич зат үйтгемеди, дүнйә ярадыланы бәри, хемме зат өңкүлигине дур» диерлер.

5 Себәби олар гадымы дөвүрде асманың ве Худайың сөзи аркалы сувдан хем-де сувуң ортасындан чыкан ер гатлагының боландыгыны билселер-де, муңа совук-сала гараярлар. 6 Шонда бүтин ер йүзүни сув алып, шол дөврүң адамларыны ёк эдипди. 7 Эмма хәзирки асман ве ер шол сөз аркалы от үчин сакланып, хөкүм гүни гелйәнчә хем-де худайсыз адамлар ёк эдилйәнчә гарашяндыр.

8 Эзиз доганларым, йөне шуны унутмаң: Ехованың* өңүнде бир гүн мүң йыл, мүң йыл хем бир гүн ялыдыр. 9 Кәбир адамларың пикир эдиши ялы, Ехова* берен вадасыны ерине етирмәге эгленйән дәлдир, ол сизиң үчин сабыр эдйәндир. Себәби ол хич кимиң хеләк болман, хеммелериң тоба этмегини ислейәндир. 10 Эмма Ехованың* гүни огры кимин гелер, шонда гүйчли гүммүрди болуп, асман* йылдырым чалтлыгында ёк эдилер. Асмандакы ве ердәки затлар болса гүйчли гызгынлыкдан яңа эрәр. Ер йүзи ве онуң ишлери паш эдилер.

11 Эгер буларың әхлиси шейле даргаҗак болса, онда сиз нәхили адамдыгыңыз ве этмели ишлериңиз барада ойланмалысыңыз. Худая вепалы болуп, өзүңизи мукаддес алып барың. 12 Ехованың* гелҗек гүнүне гарашың ве ондан үнсүңизи совмаң*. Себәби шол гүн асман от билен ёк эдилер ве ондакы затлар гүйчли гызгынлыкдан яңа эрәр. 13 Биз Худайың вадасына гөрә тәзе гөклере ве тәзе ере гарашярыс, оларда элмыдама догрулык болар.

14 Эзиз доганларым, сиз болса бу затлара гарашып, ахырсоңы Худайың өңүнде пәк, языксыз хасапланар ялы, онуң билен говы гатнашыкда болмак үчин элиңизде барыны эдиң. 15 Шейле-де Халыпамызың сабырлылыгына халас болмага мүмкинчилик хөкмүнде гараң. Сөйгүли доганымыз Павлус хем Худайың берен акылдарлыгы аркалы бу хакда языпды. 16 Ол муны әхли хатларында агзап гечйәр. Эмма онуң язан кәбир затларына дүшүнмек кындыгы себәпли, билимсиз ве иманы говшак адамлар Язгыларың башга китапларыны ёюшлары ялы, олары-да ёйярлар. Шейдип, өзлерини хеләкчилиге сезевар эдйәрлер.

17 Эзиз доганларым, бу затлары билйәндигиңиз үчин канунсыз адамларың нәдогры пикирлерине алданып, олар билен биле азашмакдан ве берк дуран догры ёлуңыздан совулмакдан сересап болуң. 18 Йөне мундан бейләк-де Халыпамыз ве Халасгәримиз Иса Месихиң мерхеметине эе болмага хем-де ол барада билимиңизи артдырмага чалшың. Оңа хәзир ве эбедилик шөхрат болсун. Омын.