2 Селаниклилер
2 Эмма, доганлар, Халыпамыз Иса Месихиң гелмеги ве бизиң онуң билен болмак үчин йыгнанмагымыз бабатда сизден шуны хайыш эдйәрис: 2 Кимдир бириниң Ехованың* гүнүниң голайлашандыгы бабатда айдян ылхамлы сөзлери* я-да хабары себәпли, я-да бизден хат алдык диййән адамлар зерарлы пикириңиз булашмасын, алҗыраңңылыга хем дүшмәң.
3 Сизи хич ким алдаймасын, себәби имандан дәнмеклик башланмаса ве биканун адам, ягны хеләкчилик оглы аян болмаса, ол гүн гелмез. 4 Биканун адам душмандыр ве өзүни «худай» хасаплаян я-да өзүне сежде этдирйәнлериң үстүнден агалык эдйәндир. Хава, ол Худайың ыбадатханасында отурып, адамлара өзүни худай эдип гөркезйәндир. 5 Эйсем, мен яныңыздакам, шу затлары айдандыгым ядыңыза дүшмейәрми нәме?
6 Сиз биканун адамың өз вагтында аян болмагы үчин, оңа хәзир кимиң бөвет боляндыгыны билйәнсиңиз. 7 Аслында, биканун адамың эдйән эрбетлиги сыр болса-да, ол эййәм херекет эдйәндир. Йөне башда оңа бөвет болян өңүнден айрылмалыдыр. 8 Соңра биканун адам пейда болар ве Халыпамыз Иса гелендигини* аян эдип, агзындан чыкян гүйчли сөзи* аркалы оны ёк эдер. 9 Йөне биканун адам Шейтаның тәсири билен херекет эдйәндир. Шейтан оңа гудратлы ишлери этмәге, аламатлары ве гөрнүшлер гөркезмәге гүйч берйәр. 10 Ол хеләк болҗак адамлары хер хили ялан затлар ве хиле билен алдаяр. Себәби олар халас болмак үчин хакыкаты кабул этмедилер, оны сөймедилер. 11 Шол себәпли Худай ялана ынанмаклары үчин, олара алдавың тәсирине дүшүп, азашмакларына ёл берйәр. 12 Олар хакыката ынанман, гайтам, эрбетликден леззет алдылар. Шонуң үчин хем оларың бары хөкүм эдилер.
13 Доганлар, Ехова* сизи сөййәндир ве биз оңа сизиң үчин элмыдама миннетдарлык айтмага борчлудырыс. Себәби Худай сизи халас эдер ялы өңүнден сайлады ве хакыката иман эдендигиңиз үчин Өз рухы аркалы сизи мукаддес этди. 14 Худай сизи бизиң ыглан эден хош хабарымыз аркалы чагырды. Ол муны Халыпамыз Иса Месихиңки ялы шөхрата эе болмагыңыз үчин этди. 15 Шейлеликде, доганлар, берк дуруң ве бизден сөз я-да хат аркалы өвренен затларыңыза гайым япышың. 16 Ата Худайымыз бизи сөййәр ве мерхемети аркалы бизе эбеди теселли хем-де умыт берйәр. Гой, Ол ве Халыпамыз Иса Месих 17 йүреклериңизе теселли берсин. Элмыдама ягшы ишлери эдип, говы затлар хакда гүррүң этмегиңиз үчин сизи беркитсин.