1 Коринфлилер
11 Мениң Месихден гөрелде алшым ялы, сиз хем менден гөрелде алың.
2 Мени хемише ятлап, өвреден затларымы табшырышым ялы, берк ерине етирйәндигиңиз үчин, сизи өвесим гелйәр. 3 Эмма мен сизиң шуны билмегиңизи ислейәрин: хер эркегиң башы Месих, аялың башы эркек, Месихиң башы хем Худайдыр. 4 Башыны өртүп дога я-да пыгамберлик эдйән эркек адам өз башыны масгара эдйәндир. 5 Башыны өртмән дога я-да пыгамберлик эдйән аял хем өз башыны масгара эдйәндир. Себәби шейтмек билен, ол башы сырылан аял ялы боляндыр. 6 Эгер аял башыны өртмесе, онда ол сачыны гыркдырсын. Эгер аял үчин сачыны гыркдырмак я-да сырдырмак утанч болса, онда ол башыны өртсүн.
7 Эркек адам башыны өртмели дәлдир, себәби Худай оны өз кешбинде ярадандыр ве ол Худайың шөхратыдыр. Аял болса эркек адамың шөхратыдыр. 8 Эркек аялың беденинден дәл-де, аял эркегиң беденинден ярадыландыр. 9 Галыберсе-де, эркек аял үчин дәл-де, аял эркек үчин ярадыландыр. 10 Ине, шол себәпли-де перишделере аламат болар ялы, аял әрине табын боляндыгыны гөркезмек үчин башыны өртмелидир.
11 Муңа гарамаздан, Халыпамызың йыгнагында аялың эркек адамсыз, эркек адамың хем аялсыз болмагы мүмкин дәлдир. 12 Себәби аял эркек адамың беденинден ярадыландыр, эркек адам болса аялдан догландыр; йөне әхли зады Худай ярадандыр. 13 Өзүңиз ойланып гөрүң: аял башыны өртмән, Худая дога этсе ерликли болармы? 14 Эйсем, ынсан тебигатына гөрә эркек адамың сачының узын болмагы онуң үчин утанч дәлми? 15 Йөне аялың сачының узын болмагы онуң шөхраты дәлми нәме? Себәби сач аяла өртгә дерек берлендир. 16 Эмма кимдир бири мунуң билен ылалашман, башга дәбе эерҗек болса, онда ол бизде-де, Худайың йыгнагында-да мундан башга дүзгүниң ёкдугыны билсин.
17 Мен шейле гөркезмелери бермек билен, сизи өвҗек болмаярын, себәби душушыкларыңыз сизе пейда бермән, зыян етирйәр. 18 Йыгнага гелениңизде, араңызда бөлүнишик дөрейәндигини эшитдим, мен муңа азда-кәнде ынанярын. 19 Себәби Худая ярамлы адамлар белли болар ялы, араңызда бөлүнишиклер хем хөкман болаймалыдыр.
20 Сиз Халыпамызың агшам нахарына йыгнанышаныңызда, оны мынасып тәрде иймейәрсиңиз. 21 Себәби оны иймели вагты геленде, кәбири эдил өң янындан агшамлык нахарыны иййәр. Шейлеликде, бири ач болса, бейлекиси серхош боляр. 22 Эйсем, сизиң ийип-ичмәге өйүңиз ёкмы? Я-да сиз Худайың йыгнагына хормат гойман, зады ёклары утандырҗак болярсыңызмы? Онда мен сизе нәме диейин? Сизи өвейинми? Ёк, мен мунуң үчин сизи өвүп билҗек дәл.
23 Себәби мен сизе Халыпамыздан алан задымы өвредипдим. Халыпамыз Иса туссаг эдилмели гиҗеси чөреги алды-да, 24 дога эденинден соң, оны бөлүшдирип: «Бу мениң сизиң үчин берйән беденимдир. Муны мени ятламак үчин берҗай эдиң» дийди. 25 Шейле-де агшамлык нахарыны иенлеринден соң, бир кәсәни алды-да: «Бу кәсе мениң ганым билен беркидилен тәзе әхти аңладяр. Хер гезек оны ичениңизде, мени ятламак үчин муны берҗай эдиң» дийди. 26 Себәби хер гезек шу чөрекден иениңизде ве бу кәседен ичениңизде, Халыпамыз гелйәнчә, онуң өлүмини ыглан эдйәрсиңиз.
27 Шонуң үчин кимдир бири Халыпамызың чөрегинден иенде я-да онуң кәсесинден иченде, муны мынасып тәрде этмесе, Халыпамызың беденине ве ганына гаршы гүнә эдйәндир. 28 Адам илки билен өз йүрегини барласын. Диңе шондан соң ол чөрекден ийип, кәседен ичсин. 29 Себәби бедениң нәме аңладяндыгына дүшүнмән иййән ве ичйән адам өз-өзүне хөкүм чыкаряндыр. 30 Ине, шонуң үчин хем көпүңиз эҗиз ве яравсыз, кәбири болса өлүм укусына* гидендир. 31 Эмма биз өзүмизиң кимдигимизе дүшүнен болсадык, онда хөкүм эдилмездик. 32 Йөне биз хөкүм эдиленимизде, шу дүнйә билен билеликде хөкүм чыкарылмаз ялы, Ехованың* теммисини алярыс. 33 Шол себәпли, доганларым, оны иймек үчин йыгнанышаныңызда, бири-бириңизе гарашың. 34 Эгер бири ач болса, гой, ол өйүнде ийсин. Шонда сиз йыгнанышаныңызда, үстүңизден хөкүм чыкарылмаз. Галан затлары болса өзүм баранымда чөзерин.