Яхя
7 Иса Җелиледе вагыз этмегини довам эдйәрди. Ол Яхуда бармак ислемейәрди, себәби ехудылар* оны өлдүрҗек болярдылар. 2 Ехудыларың Чатма байрамы* голайлапды. 3 Шонда Исаның доганлары оңа: «Шәгиртлериң сениң эдйән гудратлы ишлериңи гөрүп билер ялы, Яхуда гит. 4 Себәби өзүни хеммелере аян этмек ислейән адам хич зады гизлин эдйән дәлдир. Гой, сениң хем эдйән ишлериңи хеммелер* гөрсүн» дийдилер. 5 Аслында, доганлары оңа иман этмейәрди. 6 Иса олара шейле дийди: «Мениң гитмели вагтым хениз гелмеди, йөне сиз байрамчылыга ислән вагтыңыз гидип билерсиңиз. 7 Дүнйә сизи йигренмейәр, чүнки муңа хич хили себәп ёк. Эмма ол мени йигренйәр, себәби мен дүнйәниң эдйән ишлериниң эрбетдигини айдярын. 8 Сиз байрамчылыга гидибериң, йөне мен энтек гитҗек дәл. Себәби мениң вагтым хениз гелип етмеди». 9 Ол муны айдып, Җелиледе галды.
10 Эмма доганлары байрамчылыга гиденсоң, Иса-да гитди. Йөне ач-ачан дәл-де, гизлин гитди. 11 Байрамчылыга гелен ехудылар: «Ол ниреде?» дийип, Исаны гөзләп башладылар. 12 Мәреке өз арасында ол хакда пышырдашып гүррүң эдйәрди. Кәбирлери: «Ол говы адам» дийсе, башгалары: «Ёк, ол мәрекәни терс ёла саляр» диййәрди. 13 Йөне хич ким ол хакда адамларың өңүнде гүррүң эдип билмейәрди, себәби ехудылардан* горкярдылар.
14 Байрамчылыгың такмынан дөрдүнҗи гүни Иса ыбадатхана гелип, адамлара өвредип башлады. 15 Ехудылар муңа гең галып: «Ол дини мекдепде окамаса-да, Язгылары ниреден билйәр?» диййәрдилер. 16 Иса олара шейле җогап берди: «Өвредйән затларым өзүмиңки дәл-де, мени иберен Худайыңкыдыр. 17 Худайың ислегини берҗай этмек ислейән адам өвредйән затларымың Худайдандыгыны я-да өз пикирими айдяндыгымы билйәндир. 18 Өз пикирини айдян адам өзүне шөхрат агтаряндыр; йөне өзүни иберениң шөхратыны агтарян догручылдыр, онда нәдогрулык ёкдур. 19 Муса сизе Канун берипди, шейле дәлми? Онда нәме үчин сиз Кануна гулак асмаярсыңыз? Нәме үчин сиз мени өлдүрмек ислейәрсиңиз?» 20 Мәреке оңа: «Сен җынлы. Ким сени өлдүрҗек боляр?» дийип җогап берди. 21 Иса олара шейле дийди: «Мен сизе Сабат гүни* бирҗе гудрат гөркездим, муңа-да гең галярсыңыз. 22 Шу барада ойланып гөрүң: Муса сизе сүннетленмек хакда канун берди, йөне бу табшырык Мусаның дөврүнден дәл-де, ата-бабаларымызың дөврүнден бәри гелйәр ве сиз Сабат гүни огланлары сүннетлейәрсиңиз. 23 Эгер огланлар Сабат гүни сүннетленип-де, Мусаның кануны бозулмаян болса, онда нәме үчин мениң Сабат гүни бир адамы сагалдандыгыма бейле гахарланярсыңыз? 24 Дашкы гөрнүше гөрә хөкүм этмегиңизи бес эдиң, адалата лайык хөкүм чыкарың».
25 Шонда Иерусалимиң яшайҗыларының кәбири шейле дийип башладылар: «Эйсем, кәбирлериниң өлдүрҗек болуп гөзлейән адамы шу дәлми? 26 Ине, ол хеммелериң өңүнде гепләп дур велин, оңа зат диййән ёк-ла! Белки-де, ёлбашчыларымыз онуң Месихдигине гөз етирендир? 27 Биз бу адамың нирелидигини билйәрис; йөне Месих геленде, онуң нирелидигини хич ким билмез». 28 Иса ыбадатханада өвредип дурка, батлы сес билен шейле дийди: «Сиз мени ве мениң нирелидигими билйәрсиңиз. Мен өз-өзүмден гелмедим, мени Иберен хакыкатдан-да бардыр, йөне сиз оны танамаярсыңыз. 29 Мен оны танаярын, себәби мен онуң векили хөкмүнде гелдим. Мени Ол иберди». 30 Шонда олар оны тутҗак болуп, пурсат гөзләп башладылар, эмма хич ким муны эдип билмеди, себәби хениз онуң вагты гелмәнди. 31 Муңа гарамаздан, көп адамлар оңа иман этдилер. Олар: «Эйсем, Месих геленде, шу адамың гөркезен гудратларындан артык эдерми нәме?» диййәрдилер.
32 Фарисейлер мәрекәниң Иса хакда пышырдашяндыгыны эшиденлеринде, улы руханылар билен фарисейлер оны туссаг этмек үчин, ыбадатхананың гаравулларыны ибердилер. 33 Шонда Иса шейле дийди: «Мен өзүми Иберениң янына гидйәнчәм, ене бираз вагт яныңызда боларын. 34 Сиз мени гөзләрсиңиз, йөне тапмарсыңыз, сиз мениң гитҗек ериме-де барып билмерсиңиз». 35 Ехудылар болса өз араларында шейле дийишдилер: «Биз тапып билмез ялы, ол нирә гитҗек болярка? Ол греклериң арасында яшаян ехудыларың янына гидип, греклере-де өвретҗек болян-а дәлдир? 36 „Сиз мени гөзләрсиңиз, йөне тапмарсыңыз, сиз мениң гитҗек ериме-де барып билмерсиңиз“ диймек билен, ол нәмәни гөз өңүнде тутярка?»
37 Байрамчылыгың соңкы, ягны ваҗып гүни Иса еринден турды-да, батлы сес билен шейле дийди: «Ким сувсаян болса, гой, яныма гелсин, мен оңа ичмәге сув берерин. 38 Ким маңа иман этсе, Язгыларда айдылышы ялы: „Онуң ичинден яшайыш сувы акып дурар“». 39 Аслында, Иса иман эден адамларың алҗак мукаддес рухы хакда айдярды; олар энтек мукаддес рухы алмандылар, себәби Иса хениз шөхратланманды. 40 Мәрекәниң ичинде дуранларың кәбири муны эшиденде: «Бу адам, догруданам, Пыгамбер» дийди. 41 Башгалар болса: «Ол Месих» дийдилер. Эмма кәбири: «Эйсем, Месих Җелиледен гелмелими? 42 Язгылара гөрә Месих Давудың неслинден хем-де онуң обасы Бейтуллахамдан гелмели дәлми нәме?» дийдилер. 43 Шейлеликде, мәрекәниң арасында бөлүнишик дөреди. 44 Оларың кәбири Исаны туссаг этмек ислесе-де, хич ким муны башармады.
45 Гаравуллар доланып геленде, улы руханылар билен фарисейлер олара: «Сиз оны нәме үчин тутуп, шу ере алып гелмедиңиз?» дийдилер. 46 Гаравуллар: «Хич ким хич хачан бу адамыңкы ялы геплемәнди» дийдилер. 47 Шонда фарисейлер олара шейле дийдилер: «Сиз хем оңа алдандыңызмы? 48 Эйсем, ёлбашчылардан я-да фарисейлерден оңа иман эден бармы? 49 Йөне оны диңлейән мәреке Кануны асла билмейәр, олар нәлетленен адамлардыр». 50 Йөне өң Исаның янына баран ве фарисейлериң бири болан Никодим: 51 «Канунымыза гөрә биз адамы хөкүм этҗек болсак, илки оны диңләп, нәме эдендигини билмели дәлми нәме?» дийди. 52 Олар оңа җогап берип: «Сен хем җелилелими? Язгылары ока-да, барлап гөр, хей-де, Җелиледен пыгамбер чыкармы?» дийдилер.*