Матта

27 Эртеси ирден улы руханылар ве халкың яшулулары Исаны өлдүрмек үчин өзара маслахатлашдылар. 2 Соңра Исаның эллерини даңып, алып гитдилер-де, хөкүмдар Пилатусың элине табшырдылар.

3 Оңа дөнүклик эден Иуда Иса өлүм җезасының берлендигини гөрүп, эден ишине өкүнди ве улы руханыларың, яшулуларың янына барып, алан 30 күмүш теңңесини ызына берди. 4 Ол: «Мен гүнә этдим. Бигүнә адамы сатып, ганына галдым» дийди. Олар: «Бизе нәме? Бу сениң өз ишиң!» дийдилер. 5 Шонда ол күмүш теңңелери ыбадатханада зыңып, ол ерден гайтды. Соңра гидип, өзүни асды. 6 Эмма улы руханылар күмүш теңңелери алып: «Муны ыбадатхананың хазынасына атмак нәдогры болар, себәби ол дөкүлен ганың бахасыдыр» дийдилер. 7 Соңра өзара маслахатлашып, бу пула гелмишеклери җайламак үчин, күйзегәриң ерини сатын алдылар. 8 Шейлеликде, ол ере шу гүнлере ченли «Ганлы мейдан» дийилйәр. 9 Шейдип, Худайың Еремия* пыгамбер аркалы айдан шу сөзлери берҗай болды: «Олар бир адама кесилен баханы, ягны 30 күмүш теңңәни алдылар. Бу Ысрайыл огуллары тарапындан кесилен бахады. 10 Ехованың* маңа табшырышы ялы, олар бу пула күйзегәриң ерини сатын алдылар».

11 Иса болса хөкүмдарың өңүнде дурды. Пилатус ондан: «Сен ехудыларың Патышасымы?» дийип сорады. Иса оңа: «Муны сениң өзүң айдярсың» дийип җогап берди. 12 Эмма улы руханылар ве яшулулар оны айыпланларында, Иса олара хич зат җогап бермеди. 13 Шонда Пилатус оңа: «Саңа гаршы айдылян затлары эшитмейәрмиң?» дийди. 14 Ол шонда-да хич зат җогап бермеди. Хөкүмдар муңа гаты гең галды.

15 Хер йыл Пасха байрамында хөкүмдар дәп боюнча халкың ислән адамыны туссаглыкдан азат эдип билйәрди. 16 Шол вагт Бараббас атлы иле белли җенаятчы туссаглыкда отырды. 17 Адамлар йыгнанышанда, Пилатус олардан: «Сизиң үчин кими азат эдейин: Бараббасымы я-да Месих дийилйән Исаны?» дийип сорады. 18 Аслында, Пилатус оларың Иса гөриплик эдип туссаг эдендиклерини билйәрди. 19 Шейле-де Пилатус хөкүм күрсүсинде отырка, аялы оңа шейле хабар ёллады: «Бу догручыл адама хич зат эдәйме, себәби мен шу гиҗе ол зерарлы горкунч дүйш гөрдүм». 20 Эмма улы руханылар ве яшулулар Бараббасы азат этдирмек, Исаны болса өлүме табшыртмак үчин халкы ырярдылар. 21 Хөкүмдар халка йүзленип: «Бу ики адамың хайсысыны азат этмегими ислейәрсиңиз?» дийди. Олар: «Бараббасы» дийип җогап бердилер. 22 Пилатус олардан: «Онда Месих дийилйән Исаны нәме эдейин?» дийип сорады. Олар бирагыздан: «Оны пүрсе чүйле!» дийдилер. 23 Ол: «Нәме үчин? Ол нәме яманлык этди?» дийди. Олар болса өңкүденем бетер гыгырып: «Пүрсе чүйле!» дийдилер.

24 Пилатус эдйән тагаллаларының хич хили говы нетиҗе бермейәндигини ве гох-галмагалың артяндыгыны гөренде, сув гетиртди-де, мәрекәниң өңүнде элини ювуп: «Мен бигүнә ганың дөкүлмегине гүнәкәр дәлдирин. Муңа сиз җогапкәрсиңиз» дийди. 25 Шонда мәреке: «Онуң өлүмине өзүмиз ве чагаларымыз җогапкәр болар» дийдилер. 26 Соңра ол Бараббасы азат этди, Исаны болса гамчыладып*, пүрсе чүйлемәге берди.

27 Соңра Пилатусың эсгерлери Исаны хөкүмдарың көшгүне гетирдилер. Шонда эсгерлериң әхлиси онуң дашына йыгнандылар. 28 Олар онуң эшигини чыкарып, эгнине гырмызы реңкли матаны атдылар. 29 Тикенекден тәч өрүп, келлесине гейдирдилер ве саг элине таяк бердилер. Соңра өңүнде дыза чөкүп: «Салам, ехудыларың Патышасы!» дийип, үстүнден гүлдүлер. 30 Олар оңа түйкүрдилер, элиндәки таягыны алып, келлесине уруп башладылар. 31 Үстүнден гүлүп боланларындан соң, эгнине атылан матаны айрып, онуң өз эшиклерини гейдирдилер ве пүрсе чүйлемәге алып гитдилер.

32 Олар ёлда киреналы Симун атлы адама душуп, оңа Исаның җебир пүрсүни* гөтермеги меҗбур этдилер. 33 Соңра олар Галгота, ягны «Келлечанак» дийилйән ере гелдилер. 34 Олар Иса аҗы шерап* бердилер. Эмма Иса дадансоң, оны ичмеди. 35 Оны пүрсе чүйләнлеринден соң, эшиклерини өзара пайлашмак үчин биҗе атдылар. 36 Соңра шол ерде отурып, оңа середип дурдулар. 37 Шейле-де олар Исаның нәмеде айыпланяндыгыны гөркезмек үчин бир тагтаның йүзүне: «Бу ехудыларың Патышасы Иса» дийип яздылар ве оны ёкарсына беркитдилер.

38 Соңра Исаның янында ики гаракчыны: бирини саг, бейлекисини чеп тарапында пүрсе чүйледилер. 39 Деңинден гечип барянлар башыны яйкап, оңа сөгйәрдилер. 40 Олар: «Эй, ыбадатхананы йыкып, оны үч гүнде салҗак адам, өзүңи халас эт! Эгер сен Худайың Оглы болян болсаң, җебир пүрсүнден* дүш!» дийдилер. 41 Шейле-де улы руханылар, канунчылар ве яшулулар онуң үстүнден гүлүп, шейле диййәрдилер: 42 «Башгалары халас эдип, өзүни халас эдип билмейәр! Эгер ол Ысрайылың Патышасы болян болса, гой, җебир пүрсүнден* дүшсүн, шонда биз оңа иман эдерис. 43 Ол Худая бил баглаярды. Эгер Худай ондан разы болса, гой, халас этсин, себәби ол „Мен Худайың Оглы“ диййәрди». 44 Хатда янында пүрсе чүйленен гаракчылар хем оңа сөгйәрдилер.

45 Бүтин ер йүзүне сагат алтыдан* докуза* ченли гараңкылык аралашды. 46 Сагат докуз төвереги Иса батлы сес билен: «Эли, Эли, лама сабахтани?» дийди. Бу сөзлер «Худайым, Худайым, мени нәме үчин ташладың?» диймеги аңладяр. 47 Шол ерде дуранларың кәбири бу сөзлери эшидип: «Ол Ылясы чагыряр» дийишдилер. 48 Шол бада оларың бири ылгап барып, пагтаны* алды-да, оны туршы шераба батырды. Соңра таяга беркидип, оны Иса ичмәге узатды. 49 Бейлеки адамлар болса: «Дуруң бакалы! Ханы, гөрели, Ыляс оны халас этмәге гелермикә?!» дийдилер. 50 Иса ене-де батлы сес билен гыгырды-да, җан берди*.

51 Ине, ыбадатхананың мукаддес ериндәки туты ёкардан ашаклыгына йыртылып, икә бөлүнди, ер титрәп, гаялар җайрылды. 52 Шонда мазарлар ачылып, өлүм укусында ятан энчеме мукаддес адамларың җесетлери ерден зыңлып чыкды. 53 Олары көп адамлар гөрдүлер. (Иса диреленден соңра, мазарчылыгың төверегинде болан адамлар мукаддес шәхере* барып, гөрен затларыны гүррүң бердилер). 54 Иса гөзегчилик эдип дуран гошун ёлбашчысы хем-де онуң янындакылар ертитремәни ве башга-да болан затлары гөрүп, өрән горкдулар. Олар: «Догрудан-да, ол Худайың Оглы экен» дийдилер.

55 Җелиледен бәри Исаның ызына дүшүп, оңа хызмат эдип гелйән энчеме аяллар болян затлара узакдан середип дурдулар. 56 Оларың арасында магдалалы Меръем, Якуп билен Ёсесиң эҗеси Меръем ве Зебедейиң огулларының эҗеси барды.

57 Агшамара Юсуп атлы ариматиялы бир бай адам гелди. Ол хем Исаның шәгирдиди. 58 Юсуп Пилатусың янына барып, ондан Исаның җеседини бермеги хайыш этди. Пилатус хем җеседи бермеги буюрды. 59 Юсуп Исаның җеседини алып, арасса ве ёкары хилли зыгыр мата долады. 60 Ол Исаны гаяда оюлып ясалан тәзе мазарда җайлады. Соңра мазарың агзына улы даш гоюп гитди. 61 Эмма магдалалы Меръем билен бейлеки Меръем мазарың янындан гитмән отырдылар.

62 Шол гүн Сабат гүнүне* тайярлык гөрүлйәрди. Эртеси гүн болса улы руханылар ве фарисейлер Пилатусың янына йыгнанышдылар. 63 Олар оңа шейле дийдилер: «Хөкүмдар, бу яланчы энтек дирикә, „Мен үч гүнден соң дирелерин“ диййәрди. 64 Шонуң үчин мазары үчүнҗи гүне ченли гаравулламагы буюр. Ёгсам, онуң шәгиртлери гелип-де, җеседи огурлап, „Ол дирелди!“ дийәймесинлер. Шонда соңкы айдылан ялан сөзлер өңкүден хем бетер болар». 65 Пилатус олара: «Эсгерлери алып, гидиң-де, мазары ислейшиңиз ялы горабериң» дийди. 66 Шонда олар барып, мазарың агзында дуран дашы мөхүрледилер-де, өңүнде гаравул гойдулар.