1 Коринфлилер
9 Мен ислән задымы этмәге хаклы дәлми? Эйсем, мен ресул дәлми нәме? Мен Халыпамыз Исаны гөрмәнмидим? Сиз Халыпамыза эдйән гуллугымың мивеси дәлми? 2 Мен башгалар үчин ресул болмасам-да, сизиң үчин ресулдыгыма хич хили шүбхәм ёкдур! Себәби Халыпамызың ресулыдыгыма сизиң өзүңиз субутнама* болуп дурярсыңыз.
3 Мени гүнәкәрлейәнлериң өңүнде өзүми горамак үчин шулары айдярын: 4 Эйсем, башгаларың берйән задыны иймәге ве ичмәге хакымыз* ёкмы? 5 Бизиң хем бейлеки ресуллар, Халыпамызың доганлары ве доганымыз Кифа* ялы өйленип, иман эдйән аялымызы янымыз билен алып гитмәге хакымыз ёкмы? 6 Я-да экленмек үчин дүнъеви ишде ишлемекден боюн гачырмага диңе Барнабас икимизиң хакымыз ёкмы? 7 Хайсы эсгер гуллук эденде, чыкдаҗысыны өзи чекйәр? Ким үзүм экип-де, мивесинден иймейәр? Я-да хайсы чопан бакян сүрүсиндәки малың сүйдүнден ичмейәр?
8 Мен булары ынсан гарайшы билен айдярынмы? Бу затлар Канунда-да айдылмаярмы нәме? 9 Мусаның канунында: «Харман дөвйән* өкүзиң агзыны багламаң» дийилйәр. Эйсем, Худай өкүзлериң аладасыны эдйәрми? 10 Ол шол сөзлери бизиң үчин айтманмыды? Элбетде, бизиң үчин айтды. Себәби ер сүрйән адам хем, харман дөвйән адам хем ийҗек пайыны аларын дийип умыт эдйәр.
11 Эгер биз араңызда рухы затлары экен болсак, онда зерурлыкларымыз үчин сизден кәбир затлары алсак, нәдогры болармы? 12 Эгер башгаларың сизден бир затлары талап этмәге хакы бар болса, онда бизиң хас көп хакымыз болмалы дәлми нәме? Муңа гарамаздан, биз бу ыгтыярдан пейдаланман, гайтам, Месих барадакы хош хабары яйратмага хич зат бөвет болмаз ялы, әхли ягдайлара чыдаярыс. 13 Сиз мукаддес борчларыны берҗай эдйән адамларың ыбадатханадакы затлардан иййәндиклерини ве гурбанлык сыпасының өңүнде элмыдама гуллук эдйәнлериң гурбанлык сыпасындан пайыны аляндыкларыны билмейәрсиңизми? 14 Халыпамыз хем хош хабары вагыз эдйәнлере хош хабар аркалы яшамагы табшырыпды.
15 Йөне мен ыгтыярымың хич хайсысындан-да пейдаланмадым. Аслында, маңа шейле эдилсин дийип хем язмандым. Себәби шейле эденимден өленим хем говудыр. Мен хош хабары хич кимден зат дилемән вагыз эдйәндигиме буйсанярын, мундан мени хич ким махрум эдип билмез! 16 Эгер мен хош хабары вагыз эдйән болсам, өвүнмәге хакым ёкдур, себәби ол мениң борҗумдыр. Эгер хош хабары вагыз этмесем, вай гүнүме! 17 Бу иши хөвес билен эдйән болсам, сылаг аларын; эмма ислегиме гаршы гидип, гөвнемән этсем, шонда-да бу җогапкәрчилик маңа ынаныландыр. 18 Онда мениң сылагым нәме? Сылагым шудур: хош хабары вагыз эденимде, хош хабар билен баглы ыгтыярымдан ченденаша пейдаланмаз ялы, вагыз ишини мугт ерине етирйәрин.
19 Себәби хич киме борчлы болмасам-да, мүмкин болдугындан, көп адамлары Месихиң ёлуна гетирмек үчин өзүми хеммелере гул этдим. 20 Ехудылары Месихиң ёлуна гетирҗек болуп, ехудылар үчин ехуды ялы болдум; канун астында болмасам-да, канун астындакылары гетирҗек болуп, канун астындакылар үчин канун астындакы адам ялы болдум. 21 Худайың өңүнде канунсыз болмасам-да, Месихиң өңүнде канун астында болуп, канунсыз адамлары Месихиң ёлуна гетирҗек болуп, канунсызлар үчин канунсыз адам ялы болдум. 22 Эҗизлери гетирҗек болуп, эҗизлер үчин эҗиз адам ялы болдум. Иң болманда, кәбирлерини халас этҗек болуп, хер кес үчин хер зат болдум. 23 Мен булары хош хабары башгалар билен пайлашып билер ялы, хош хабарың хатырасы үчин эдйәрин.
24 Сиз ылгав ёлунда хеммелериң ылгап, йөне екеҗе адамың байрак аляндыгыны билйән болсаңыз герек. Шонуң үчин ылганыңызда, байрак алар ялы эдип ылгаң. 25 Ярыша гатнашян хер бир түрген әхли затда өзүне эрк эдйәндир. Олар муны солян тәҗи алмак үчин этселер, биз солмаян тәҗи алмак үчин эдйәрис. 26 Шол себәпли мен максатсыз ылгамаярын; хованы юмруклаян ялы, бош ери урмаярын. 27 Йөне башгалара вагыз эдип, өзүм Худайың мерхеметинден махрум болмаз ялы, беденими хорлап*, оны гул эдйәрин.