Яхя
18 Иса дога эдип болансоң, шәгиртлери билен Кидрон җүлгесинден гечди-де, бир бага гирди. 2 Иса дөнүклик эден Иуда хем ол ери билйәрди, себәби Иса көпленч шәгиртлери билен шол ерде боларды. 3 Шейлеликде, Иуда эллери чыралы ве яраглы биртопар эсгерлери хем-де улы руханыларың, фарисейлериң серкерделерини шол ере алып гелди. 4 Иса өзүне нәме болҗакдыгыны билйәрди, шонуң үчин бир әдим өңе чыкды-да: «Сиз кими гөзлейәрсиңиз?» дийип сорады. 5 Олар: «Назаретли Исаны» дийип җогап бердилер. Иса олара: «Мен шол» дийди. Иса дөнүклик эдйән Иуда хем оларың янында дурды.
6 Эмма Иса олара «Мен шол» диенде, олар ыза чекилдилер-де, ере йыкылдылар. 7 Иса ене-де: «Сиз кими гөзлейәрсиңиз?» дийип сорады. Олар: «Назаретли Исаны» дийдилер. 8 Иса олара: «Мен шол дийдим ахырын. Эгер мени гөзлейән болсаңыз, гой, булар гитсин» дийип җогап берди. 9 Бу Исаның: «Сениң маңа берен адамларыңдан бирини-де йитирмедим» диен сөзлериниң берҗай болмагы үчин болды.
10 Шонда Симун Петрус гылыҗыны чыкарды-да, баш руханының гулуны уруп, саг гулагыны кесди. Ол гулуң ады Малхусды. 11 Эмма Иса Петруса: «Гылыҗыңы гынына сал. Эйсем, мен Атамың берен кәсесинден* ичмеринми?» дийди.
12 Шонда эсгерлер, гошун серкердеси ве ехудыларың ёлбашчылары Исаны тутуп, эллерини даңдылар. 13 Олар Исаны башда Ханнаның янына әкитдилер. Ол шол йылкы баш руханы Каяфаның гайынатасыды. 14 Ехуды ёлбашчыларына халкың халас болмагы үчин бир адамың өлмеги говудыр дийип, маслахат берен хем Каяфады.
15 Шонда Симун Петрус билен ене бир шәгирт Исаның ызына дүшүп гитдилер. Баш руханы бу шәгирди танансоң, ол Иса билен биле баш руханының ховлусына гирди. 16 Петрус болса дервезәниң дашында дурды. Шонда баш руханыны танаян шәгирт дервезәниң агзында дурян хызматкәр гызың янына барды-да, онуң билен геплешип, Петрусы ичерик салды. 17 Шонда хызматкәр гыз Петруса: «Сен хем шол адамың шәгиртлериниң бири дәлми?» дийди. Ол: «Ёк, мен дәл» дийип җогап берди. 18 Хова совук боланы үчин, гуллар ве серкерделер от якып, онуң башында йылынып дурдулар. Петрус хем олар билен йылынып дурды.
19 Улы руханы* болса шол вагт Исадан шәгиртлери ве өвредйән затлары хакда сораярды. 20 Иса шейле җогап берди: «Мен адамлара ач-ачан өвредйәрдим. Элмыдама ехудыларың йыгнанышян ерлеринде, ягны синагогаларда* ве ыбадатханада өвретдим, гизлинликде хич зат айтмандым. 21 Сиз муны нәме үчин менден сораярсыңыз? Оны эшиден адамлардан сораң. Гой, шолар мениң нәме айдандыгымы айтсынлар». 22 Иса муны айданда, шол ерде дуран серкердәниң бири онуң йүзүне шарпык чалды-да: «Сен улы руханы билен нәдип геплешйәрсиң?» дийди. 23 Иса оңа: «Эгер айданым нәдогры болса айт; эгер догры болса, онда нәме үчин мени урярсың?» дийди. 24 Шонда Ханна онуң элини даңдырып, баш руханы Каяфаның янына иберди.
25 Симун Петрус болса йылынып дурды. Шонда янында дуранлар: «Сенем онуң шәгиртлериниң бири герек, шейле дәлми?» дийдилер. Ол боюн алман: «Ёк, мен дәл» дийди. 26 Баш руханының гулларының бири, ягны Петрусың гулагыны кесен адамының гарындашы: «Мен сени онуң билен багда гөрмәнмидим?» дийди. 27 Эмма Петрус ене-де боюн алмады, эдил шол вагт хем хораз гыгырды.
28 Даң атан бадына, олар Исаны Каяфаның өйүнден алып, Яхуданың хөкүмдары Пилатусың көшгүне элтдилер. Эмма оларың өзлери гирмеди, себәби Пасха нахарыны иймек үчин өзлерини хапаламак ислемейәрдилер. 29 Пилатус оларың янына чыкды-да: «Бу адамы нәмеде айыплаярсыңыз?» дийип сорады. 30 Олар: «Эгер ол җенаятчы болмадык болса, оны сениң элиңе бермездик» дийип җогап бердилер. 31 Пилатус олара: «Оны алың-да, кануныңыза гөрә өзүңиз хөкүм чыкарың» дийди. Ехудылар болса: «Бизе адамы җезаландырмага ругсат берилмейәр» дийдилер. 32 Бу затлар Исаның нәхили өлүм билен өлҗекдиги хакда айдан сөзлериниң берҗай болмагы үчин болды.
33 Шонда Пилатус көшгүне гирди-де, Исаны янына чагырып: «Сен ехудыларың Патышасымы?» дийип сорады. 34 Иса оңа: «Сен муны өзүң сораярмың я-да башгаларың диени үчин?» дийди. 35 Пилатус оңа: «Мен нәме, ехудымы? Өз халкың ве улы руханылар сени мениң элиме табшырдылар. Сен нәме иш этдиң?» дийип сорады. 36 Иса оңа: «Мениң Патышалыгым бу дүнйәден дәл. Патышалыгым шу дүнйәден болан болсады, онда шәгиртлерим мени ехудыларың элине бермеҗек болуп гөрешердилер. Йөне патышалыгым бу ерден дәл» дийип җогап берди. 37 Пилатус: «Диймек, сен патыша-да?» дийди. Иса оңа: «Мениң патышадыгымы сениң өзүң айдярсың. Мен хакыката шаятлык этмек үчин догулдым, шонуң үчин хем дүнйә гелдим. Хакыкатың тарапдары болан хер кес айдянларыма гулак асяр» дийип җогап берди. 38 Пилатус оңа: «Хакыкат диййәниң нәме?» дийди.
Соңра ол ехуды ёлбашчыларының янына чыкды-да: «Мен оны гүнәкәрләр ялы, хич зат тапмадым. 39 Шейле-де дәбиңизе гөрә Пасха байрамы мынасыбетли мен сизе бир адамы бошатмалы. Сиз ехудыларың Патышасыны бошатмагымы ислейәрсиңизми?» дийди. 40 Олар: «Оны дәл, Бараббасы бошат!» дийип гыгырышдылар. Бараббас болса гаракчыды.