Ulag sürmegi bes etmelimi?

Sizde-de şeýle ýagdaý boldumy? Siz ulag sürmek babatda nädip dogry karara gelip bilersiňiz?

Käbir ýurtlarda belli bir ýaşa ýeten sürüjilerden ulag sürüp bilýändigi barada lukmandan hat almak talap edilýär. Şeýle ýurtda ýaşaýan mesihçiler hökümetiň kada-kanunlaryna gulak asýarlar (Rim. 13:1). Belki, siziň ýurduňyzda şeýle kanun ýokdur. Emma aşakdaky maslahatlar size-de ulag sürmek babatda dogry karara gelmäge kömek eder.

ULAG SÜRMÄGE UKYPLY ÝA DÄLDIGIŇIZI BARLAŇ

Bir gurama garry adamlara özüne aşakdaky soraglary bermegi maslahat berýär.

• Maňa ýol belgilerini okamak ýa-da gije görmek kynmy?

• Yzyny görkezýän aýnalara seretmek we gapdaldan gelýän ulaglary görmek üçin kellämi öwürmek kyn bolýarmy?

• Aýagymy derrew gazdan aýryp tormoza basyp ýetişýärinmi?

• Men ulagy haýal sürüp, ýolda päsgelçilik döredýärinmi?

• Soňky döwür howply ýagdaýlar köp boldumy ýa-da ulagym bilen bir zat kakdymmy? Ulagda çyzylan ýer ýa tigirlerinde çiş barmy?

• Ulagy gowy sürmeýändigim üçin polisiýa işgäri sakladymy?

• Ulag sürüp barýarkam uklaýarynmy?

• Ulag sürmäge päsgel berýän dermanlary içýärinmi?

• Maşgala agzalarym we dost-ýarlarym ulag sürýändigim üçin alada edýändigini aýdýarlarmy?

Siz şu soraglaryň birki sanysyna «hawa» diýip jogap berseňiz, onda muňa sowuk-sala seretmäň. Meselem, siz ulagy öňküden azyrak sürüp bilersiňiz ýa-da gije ulag sürmersiňiz. Ulag sürşiňizi barlap duruň. Maşgala agzalaryňyzdan ýa-da dostuňyzdan ulagy sürşiňiz hakda pikirini soraň. Şeýle-de ulagy has gowy sürmegi öwrenmek üçin tälim alyp bilersiňiz. Emma siz ýokardaky soraglaryň köpüsine «hawa» diýip jogap berseňiz, onda ulag sürmegi bes etseňiz gowy bolara.

MUKADDES KITABYŇ MASLAHATY

Belki, size ulagy öňki ýaly gowy sürmeýändigiňizi boýun almak kyn düşýändir. Mundan beýläk ulag sürmeli däl diýen pikiriň özi sizi ruhdan düşürýändir. Mukaddes Kitabyň iki maslahaty size sagdyn pikirlenmäge we dogry karara gelmäge kömek eder.

Pespäl boluň (Nak. 11:2). Garradygyça adamyň gözi kütelýär, gulagy agralýar we hereketi haýallaýar. Meselem, köp adamlar ýaşy gitdigiçe sportuň käbir görnüşleri bilen meşgullanmagy bes edýärler, sebäbi olara aňsatlyk bilen şikes ýetip bilýär. Ulag sürmek meselesinde hem şeýle diýse bolýar. Pespäl adam janyna howp abanýan bolsa, ulag sürmegini bes edýär (Nak. 22:3). Şeýle-de başgalar onuň aladasyny edýändigini aýdanda diňleýär (2 Şamuwel 21:15—17-nji aýatlary deňeşdiriň).

Adamlaryň ganyna galmaň (5 Mus. 22:8). Eger sürüji ulagy seresap sürmese, adamlara zyýan ýetirip bilýär. Sürüji ulagy gowy sürmese-de ony sürmegi dowam etse, özüniň ýa-da başga biriniň janyna howp salýar. Hatda biriniň ganyna galyp bilýär.

Ulag sürmegi bes etseňiz, adamlar sizi sylamaz öýdüp gorkmaň. Ýehowa sizi gowy görýär. Ol siziň çägiňizi bilýändigiňize, pesgöwünli bolup, adamlaryň janyny alada edýändigiňize begenýär. Ol size kömek etjekdigini we göwünlik berjekdigini söz berýär (Işa. 46:4). Ýehowa hemişe aladaňyzy eder. Şonuň üçin dogry karara geler ýaly, Ondan akyldarlyk diläň we Mukaddes Kitabyň kada-kanunlaryna eýerer ýaly kömek soraň.