Nakabilanggo Dahil sa Kanilang Pananampalataya—Eritrea

Sa loob ng maraming taon, inaaresto at ibinibilanggo ng gobyerno ng Eritrea ang mga Saksi ni Jehova—kasama na ang mga babae at may-edad—nang hindi nililitis o sinasampahan ng kaso. Sa presidential decree na may petsang Oktubre 25, 1994, inalisan ni President Afwerki ng pagkamamamayan ang mga Saksi dahil hindi sila bumoto noong 1993 sa reperendum tungkol sa kalayaan at tumatanggi silang magsundalo dahil sa konsensiya. Bago nito, nagbibigay ang Eritrea ng alternatibong paglilingkod para sa mga tumatangging magsundalo. Maraming Saksi ang nakibahagi sa ganitong paglilingkod sa ilalim ng iba’t ibang pamamahala. Nagbibigay ang gobyerno ng “Certificate of Completed National Service” at pinupuri nito ang mga nakikibahagi sa ganitong paglilingkod. Pero dahil sa presidential decree na iyon, ibinibilanggo, tino-torture, at hina-harass na ng mga pulis at mga sundalo ng Eritrea ang mga Saksi ni Jehova para mapilitan silang itakwil ang kanilang pananampalataya.

Sa ngayon, 64 na Saksi ni Jehova ang nakakulong (37 lalaki at 27 babae). Noong Setyembre 2024, biglang dumami ang bilang na ito nang puwersahang pinasok ng mga pulis ang isang bahay kung saan may payapang nagtitipon para sa pagsamba. Dito, 24 na indibidwal ang inaresto. Di-nagtagal, may pinalayang dalawang menor-de-edad. Makalipas ang ilang araw, inaresto ang 85-taóng-gulang na babaeng Saksi. Lahat ng 23 Saksi ay dinala sa Mai Serwa Prison. Noong Disyembre 7, 2024, pinalaya ang isang Saksi na si Saron Ghebru. Siyam na buwan na siyang buntis sa magiging panganay niya. Pinalaya din noong Enero 15, 2025 si Mizan Gebreyesus na 82 taóng gulang.

Noong Nobyembre 1, 2024, sinalakay uli ng mga pulis ang mga Saksi. Inaresto nila ang apat na Saksi na nag-aaral pa, na nasa edad 16 hanggang 18. Pinagtatanong ang mga ito at dinala sa Mai Serwa Prison. Noong Nobyembre 22, dinampot ng mga pulis ang anak na babae ni Almaz Gebrehiwot sa paaralan nito at dinala sa istasyon ng mga pulis. Nang puntahan ni Almaz ang anak niya dito, pinalaya ang anak niya pero siya naman ang idinitine. Kasalukuyang nasa 5th Police Station sa Asmara si Almaz.

Mahirap na Kalagayan sa Bilangguan

Napakahirap ng kalagayan ng mga Saksi sa Mai Serwa at sa iba pang bilangguan. Napakaliit ng mga selda kaya siksikan ang mga bilanggo at halos hindi sila makahiga. Kapag natutulog sila, nakatagilid lang sila at siksikan. Wala ring mga pasilidad para sa sanitasyon. Lalaki man o babae, dalawang beses lang sa isang araw—sa itinakdang oras—sila puwedeng magbawas o umihi habang binabantayan ng mga sundalo. Wala ring sapat na medikal na tulong, at suplay ng pagkain at tubig.

Dahil sa mga kalagayang ito, apat na Saksi ang namatay habang nakabilanggo sa Eritrea, at tatlong may-edad na Saksi ang namatay pagkatapos nilang mapalaya dahil sa napakahirap na kalagayang dinanas nila habang nakakulong.

Noong 2011 at 2012, dalawang Saksi ang namatay dahil sa di-makataong pagtrato sa kanila sa Meitir Prison Camp. Si Misghina Gebretinsae, 62 anyos, ay namatay noong Hulyo 2011 dahil sa matinding init habang nasa lugar ng pagpaparusa na tinatawag na “underground.” Si Yohannes Haile naman, 68 anyos, ay namatay noong Agosto 16, 2012, matapos mabilanggo nang halos apat na taon sa gayon ding kalagayan.
Tatlong may-edad na Saksi, sina Kahsai Mekonnen, Goitom Gebrekristos, at Tsehaye Tesfamariam, ang namatay matapos palayain dahil sa hirap na dinanas nila habang nasa Meitir Camp.
Noong 2018, dalawang Saksi ang namatay matapos ilipat sa Mai Serwa Prison. Si Habtemichael Tesfamariam ay namatay sa edad na 76 noong Enero 3, at si Habtemichael Mekonnen naman ay namatay sa edad na 77 noong Marso 6. Ibinilanggo ng mga awtoridad sa Eritrea ang dalawang lalaking ito noong 2008 kahit walang isinasampang kaso.

Walang-Katiyakang Haba ng Pagkabilanggo

Hindi alam ng karamihan sa mga Saksi na nakakulong kung kailan sila makakalaya; posibleng makulong sila hanggang mamatay o malapit nang mamatay. At dahil walang legal na proseso o solusyon para sa kanila, lumilitaw na ang kanilang pagkabilanggo ay panghabambuhay na.

Bilanggo Dahil sa Pagsunod sa Konsensiya

Henok Ghebru

Si Henok Ghebru, isang Saksi na 42 taóng gulang, ay nabilanggo mula noong Enero 24, 2005 dahil sa pagtangging magsundalo dahil sa konsensiya. Siya na ang pinakamatagal na nakabilanggo sa Eritrea. Naaresto siya noong naghahanap ang militar ng mga kabataan na puwedeng sanaying magsundalo.

Ipinanganak si Henok noong Agosto 10, 1982 sa isang pamilyang Saksi. Pinag-aralan niya ang Bibliya at nakumbinsi siya sa mga natutuhan niya. Inialay niya ang sarili niya sa Diyos na Jehova at nabautismuhan noong Pebrero 2004. Wala pang isang taon pagkatapos nito, nabilanggo siya. Ang tatay niya na si Ghebru Berhane ay apat na beses nang nabilanggo dahil sa pananampalataya (dalawang beses noong 1970’s, noong 2006-2008, at noong 2014-2020). Maraming beses ding inaresto ang kapatid niyang babae na si Saron Ghebru. Pero nakalaya na ito kamakailan.

Bago makulong si Henok, tumutulong siya sa hanapbuhay ng pamilya nila. Tinutulungan niya ang tatay niya sa pag-aalaga ng mga baka. Gusto niyang maging electrician at gustong-gusto niyang maglaro ng mga sport, lalo na ang soccer. Gusto rin niyang mas gamitin ang oras niya sa paglilingkod sa Diyos na Jehova.

Dahil sa mano-manong trabaho sa bilangguan, nagkaroon ng problema sa likod si Henok. Sa loob ng pitong taon, nakaramdam din siya ng napakatinding kirot dahil sa isang malalang sakit. Hindi siya pinayagang magpatingin sa doktor o tumanggap ng mga gamot mula sa mga kaibigan o kamag-anak niya. Pero naisaayos din na maoperahan siya para mawala ang sakit na nararamdaman niya.

Kahit nakakulong si Henok, patuloy pa rin niyang pinapatibay ang pananampalataya niya. Madalas niyang bulay-bulayin ang paborito niyang teksto, ang Awit 100:5. Napapatibay nito ang pagtitiwala niya sa Diyos.

Binale-wala ang mga Rekomendasyon ng mga Ahensiya Para sa Karapatang Pantao

Patuloy na binabale-wala ng Eritrea ang internasyonal na mga pamantayan para sa karapatang pantao. Tinuligsa ng malalaking ahensiyang nagpapatupad ng karapatang pantao ang pagkakait ng Eritrea ng pangunahing mga karapatan at nanawagan silang baguhin nito ang sitwasyon.

Noong 2016, sinabi ng Commission of Inquiry on Human Rights in Eritrea na nakagawa ang mga awtoridad sa Eritrea ng “krimen laban sa pagkamakatao” dahil sa “pag-uusig batay sa relihiyon at lahi” ng mga Saksi ni Jehova at ng iba pa.
Noong 2017, sinabi ng African Committee of Experts on the Rights and Welfare of the Child (ACERWC) na nababahala ito na sa kabila ng mga batas at probisyon, “ang mga anak ng mga Saksi ni Jehova” ay napagkakaitan ng mga karapatan at dumaranas ng masamang pagtrato. Inirekomenda ng ACERWC sa Eritrea na “kilalanin at lubusang ipatupad ang karapatan ng isang bata sa Kalayaan ng Kaisipan, Konsensiya, at Relihiyon nang walang pagtatangi.”
Noong 2018, inirekomenda ng African Commission on Human and Peoples’ Rights na “kumilos agad [ang Eritrea] para hindi na mapagkaitan ng pangunahing mga karapatan ang lahat ng nakabilanggo, kasama na ang . . . mga miyembro ng relihiyon ng mga Saksi ni Jehova” at sinabi rin nitong dapat imbestigahan ang pagkamatay ng mga Saksi habang nasa bilangguan. Idiniin nito na dapat tiyakin ng Eritrea na “naiingatan ang karapatan bilang mamamayan” ng mga Saksi ni Jehova.
Noong Mayo 2019, hinimok ng UN Human Rights Committee (CCPR) ang Eritrea na tiyaking naiingatan ang kalayaan sa relihiyon at paniniwala at “palayain ang lahat ng inaresto o ibinilanggo nang dahil sa relihiyosong mga gawain, kasama na ang mga Saksi ni Jehova.” Sinabi rin ng CCPR sa Eritrea na “tiyaking kikilalanin ng batas ang pagtangging magsundalo dahil sa konsensiya at [na dapat itong] magbigay ng alternatibong paglilingkod na walang kaugnayan sa militar para sa mga tumatangging magsundalo dahil sa konsensiya.”
Sa isang report para sa UN Human Rights Council na may petsang Mayo 7, 2024, sinabi ng UN Special Rapporteur para sa karapatang pantao sa Eritrea: “Nakakaranas ang mga Saksi ni Jehova ng matitinding pag-uusig, gaya ng pagkulong at hindi pagbibigay ng kanilang pagkamamamayan, dokumento, pati na ng karapatan at serbisyo na para sa kanila.” Hiniling nila sa gobyerno ng Eritrea na “palayain agad nang walang-kondisyon ang lahat ng ilegal at walang-katarungang ikinulong” at na “itigil ang di-makatarungang pag-aresto at pagbibilanggo nang walang legal na basehan.”

Time Line

Marso 17, 2025

May 64 na Saksing nakabilanggo.
Nobyembre 22, 2024

Inaresto si Almaz Gebrehiwot dahil tumanggi siyang makibahagi sa politikal na partido ng bansa.
Nobyembre 1, 2024

Apat na estudyanteng Saksi ang inaresto at dinala sa Mai Serwa Prison.
Setyembre 27, 2024

Inaresto at dinala sa Mai Serwa Prison ang 23 Saksi; dalawa sa kanila ang pinalaya din.
Pebrero 1, 2021

Pinalaya ang tatlong Saksi.
Enero 29, 2021

Pinalaya ang isang Saksi.
Disyembre 4, 2020

Pinalaya ang 28 Saksi.
Marso 6, 2018

Namatay si Habtemichael Mekonnen, edad 77, matapos ilipat sa Mai Serwa Prison.
Enero 3, 2018

Namatay si Habtemichael Tesfamariam, edad 76, matapos ilipat sa Mai Serwa Prison.
Hulyo 2017

Lahat ng Saksing nakabilanggo sa Meitir Camp ay inilipat sa Mai Serwa Prison sa labas ng Asmara.
Hulyo 25, 2014

Pinalaya ang karamihan sa inaresto noong Abril 14, pero 20 sa mga inaresto noong Abril 27 ang nakakulong pa rin.
Abril 27, 2014

Inaresto ang 31 Saksi habang nagtitipon para sa pag-aaral sa Bibliya.
Abril 14, 2014

Mahigit 90 Saksi ang inaresto habang nagtitipon para sa taunang Memoryal ng kamatayan ni Kristo.
Agosto 16, 2012

Namatay si Yohannes Haile, 68 anyos, habang nakabilanggo sa ilalim ng mahirap na kalagayan.
Hulyo 2011

Namatay si Misghina Gebretinsae, 62 anyos, habang nakabilanggo sa ilalim ng mahirap na kalagayan.
Hunyo 28, 2009

Ni-raid ng mga awtoridad ang bahay ng isang Saksi habang may pagtitipon doon para sa pagsamba at inaresto ang lahat ng 23 Saksing naroon, edad 2 hanggang 80.
Abril 28, 2009

Maliban sa isa, lahat ng Saksi ni Jehova na nakabilanggo sa mga presinto ay inilipat ng mga awtoridad sa Meitir Prison Camp.
Hulyo 8, 2008

Nagsimula ang pag-raid ng mga awtoridad sa mga bahay at lugar ng trabaho para arestuhin ang 24 na Saksi, na karamihan ay naghahanapbuhay para sa pamilya nila.
Mayo 2002

Ipinagbawal ng gobyerno ang lahat ng relihiyon na wala sa ilalim ng apat na relihiyong aprobado ng gobyerno.
Oktubre 25, 1994

Sa bisa ng isang presidential decree, ang mga Saksi ni Jehova ay inalisan ng pagkamamamayan at saligang karapatang sibil.
Setyembre 17, 1994

Sina Paulos Eyassu, Isaac Mogos, at Negede Teklemariam ay ibinilanggo nang hindi nililitis o sinasampahan ng kaso.
1950’s

Itinatag ang unang mga grupo ng mga Saksi ni Jehova sa Eritrea.