Pasulungin ang Kakayahan sa Ministeryo—Pagpapakita ng Personal na Interes

Kung Bakit Mahalaga: Pinakitunguhan ni Jesus ang mga tao bilang mga indibiduwal, at nagpakita siya sa kanila ng maibiging personal na interes. Halimbawa, baka napansin ni Jesus ang pagkaasiwa ng isang lalaking bingi, kaya inilayo niya muna ito sa mga tao bago niya ito pagalingin nang sarilinan. (Mar. 7:31-35) Nagpakita siya ng konsiderasyon sa kaniyang mga alagad sa pamamagitan ng pagkilala sa kanilang mga limitasyon at hindi pagpapaulan sa kanila ng napakaraming impormasyon. (Juan 16:12) Kahit sa kaniyang posisyon sa langit, nagpapakita si Jesus ng personal na interes. (2 Tim. 4:17) Bilang mga tagasunod ni Kristo, gusto natin siyang tularan. (1 Ped. 2:21; 1 Juan 3:16, 18) At magiging mas epektibo tayo sa ating ministeryo kung magpapakita tayo ng konsiderasyon sa may-bahay at isasaalang-alang natin ang kaniyang kalagayan, mga hilig, at álalahanín. Mas malamang na makinig siya kung makikita niyang hindi lang tayo basta nagdadala ng mensahe o nag-iiwan ng literatura, kundi talagang interesado tayo sa kapakanan niya.

Kung Paano Ito Gagawin:

Maging handa. Maging relaks, ngumiti, at maging palakaibigan.
Maging mapagmasid. May nakikita ka bang palatandaan na may anak siya? na mahilig siyang mag-alaga ng mga halaman o hayop? na mayroon siyang relihiyosong mga paniniwala? Baka puwede mong ibagay ang iyong pambungad sa kaniyang kalagayan.
Hingin ang kaniyang opinyon, at makinig na mabuti nang hindi basta-basta sumasabad. Tumingin ka sa kaniya para ipakitang nakikinig ka. Pasalamatan siya sa kaniyang opinyon, at bigyan siya ng taimtim na komendasyon kung magagawa mo iyon. Iwasang makipagtalo.
Mag-adjust. Kung kinakailangan, ibagay ang iyong presentasyon para mapag-usapan ang kaniyang mga álalahanín. Madali itong gawin dahil ang ating mga tract, brosyur, at magasin ay tumatalakay ng iba’t ibang paksa. Kung dumalaw ka sa isang panahong di-kumbinyente sa kaniya, halimbawa, habang siya ay abala, unawain iyon at paikliin ang iyong presentasyon.

Subukan Ito Ngayong Buwan:

Magkaroon ng mga praktis sesyon sa inyong pampamilyang pagsamba. O marahil habang nasa ministeryo, huminto sandali at pag-usapan ninyong magkapartner kung paano maibabagay ang inyong presentasyon sa sinabi ng may-bahay na nakausap ninyo.
Sa mga pagtitipon para sa paglilingkod sa larangan, maaaring talakayin o ipakita ng brother na nangangasiwa ang mga paraan ng pagpapakita ng personal na interes.