ƆKƆNDƆ 28
Woho wakake Mɔsɛ eke ashashi
ENDA yana y’ashashi ndjo yalela ndo yokime lohita l’osekaseka ɔmɔtshi. Toko Mɔsɛ. Onde wɛ mbeyaka osekaseka wa dimɛna ɔnɛ ende? Nde ekɔ ɔn’aki nkumekanga k’Edjibito, ɔn’aki Farawɔ.
Nyango Mɔsɛ akashɛ ɔnande polo ndo lakandakotsha ngɔndɔ shato nɛ dia nde konanga Ase Edjibito mbodiaka. Koko nde akeyaka dia wayoyɛna Mɔsɛ, omalɔkɔ nde akasale ɔnkɔnɛ dia mbotsha.
Nde akɔsɛ kisaka ko nde kikita mukubu woho w’aha ashi mbɔtɔ lɔkɔ. Ko nde akadje Mɔsɛ lɔkɔ ndo akatokitsha kisaka l’adiyo w’etale wele l’omamu w’Ɔkɛdi wa Nilɛ. Enondo wa Mɔsɛ la omoto, le Miriama, akemala suke ndo akendaka dia mbeya dikambo diayotomba.
Kem’edja ɔn’aki Farawɔ la omoto amboholɔ l’Ɔkɛdi wa Nilɛ la ndjɔ̂ka. Ɛnyi nganɛ ko kisaka l’adiyo w’etale. Nde akelɛ ose olimu ande ɔmɔtshi wa omoto ate: ‘Ntshɔka tɔmbɔsɛ kisaka kengo.’ Lam’akadihola ɔna nkumekanga kisaka, nde akɛnyi ɔsɔ aha ɛmɛnamɛna k’ɔna! Ya Mɔsɛ yakasekumaka la delo ko ɔna nkumekanga akawoke kɛtshi. Nde konanga vɔ mbodiaka.
Ko Miriama mbayande. Wɛ hawɛnyi l’osato. Miriama akambola ɔna Farawɔ ate: ‘Ntshu tokoyange omoto ɔmɔtshi l’Ose Isariyɛlɛ kele akɔlɔnyɛnde?’
‘Lam’alangɛ tshɔka esadi,’ mbakate ɔna nkumekanga.
Ko Miriama akalawɔ esadi dia totɛ nyango. Lam’akaye nyango Mɔsɛ le ɔna nkumekanga, ɔna nkumekanga akawotɛ ate: ‘Ɔsa ɔn’ɔnɛ kele ɔnɔnyɛkende ko Dimi layokofuta.’
Ɔnkɔnɛ nyango Mɔsɛ akakokɛka ɔnande hita. L’ɔkɔngɔ, etena kakôle Mɔsɛ, nde akatowosha ɔn’aki Farawɔ la omoto, ɔnɛ lakawodja oko ɔnande hita. Woho ɔsɔ mbakayolaka Mɔsɛ lo luudu laki Farawɔ.