Mɔsɛ ambɔsɔna dia ntɛmɔla Jehowa

L’Edjibito, nkumbo ka Jakɔbɔ kakayeyamaka oko ase Isariyɛlɛ. L’ɔkɔngɔ wa nyɔi ka Jakɔbɔ la Yɔsɛfu, Farawɔ kekina akayotatɛ nɔmbɔla. Nde akoke wɔma lo woho wakayalekaka ase Isariyɛlɛ ase Edjibito wolo. Ɔnkɔnɛ, Farawɔ kɛsɔ akakonya ase Isariyɛlɛ mfumbe. Nde akaatshutshuya la wolo dia nsala atafadi ndo dia kambaka olimu wa wolo lo dikambɔ. Koko, lo yɛdikɔ yakaleke ase Edjibito mbatshutshuya dia nkamba olimu la wolo, mbakaleke lofulo l’ase Isariyɛlɛ mbudɛ. Lam’ele Farawɔ konanga dui sɔ, nde akadjanga dia ɔna pami tshɛ lakotɔka le ose Isariyɛlɛ tshɛ ndjakema. Onde wɛ koka mfɔnya wɔma wakahombe monga la ase Isariyɛlɛ?

Jɔkɛbɛdɛ, womoto ɔmɔtshi l’ose Isariyɛlɛ akote ɔna pami l’olangala efula. Dia mbokokɛ, nyango akawodje lo kisaka ndo akatokishɛ lo lɔlɛngɛ laki l’omamu wa ɔkɛdi wa Nilɛ. Miriamɛ, kadiyɛ ɔna ɔsɔ, akemala lo tshalola dia menda kɛnɛ kayotomba.

Ɔna Farawɔ la womoto akaye ndjɔka l’ɔkɛdi ndo akɛnyi kisaka kakɔ. L’etei nde akɛnyi ɔna alela ndo nde akawoke kandji. Miriamɛ akambola ate: ‘Onde dimi koka ntshɔ tokoyangɛ womoto ɔmɔtshi lakoka kɔlɔnyɛka ɔna ɔnɛ?’ Lam’aketawɔ ɔna Farawɔ la womoto, Miriamɛ akatoya la Jɔkɛbɛdɛ nyango ɔnakɔ. Ɔna Farawɔ la womoto akawotɛ ate: ‘Ɔsa ɔna ɔnɛ tɔnɔnyɛkende ndo dimi layokofuta.’

Etena kakole ɔnakɔ, Jɔkɛbɛdɛ akɔtɔlɛ le ɔna Farawɔ la womoto, nde akawɔlɛ Mɔsɛ ndo akawodia oko ɔnande hita. Mɔsɛ akole oko ɔna nkumekanga ndo akakoke monga la ɛngɔ tshɛ kakandalangaka. Koko, Mɔsɛ kombohɛ Jehowa. Nde akeyaka dia nde aki mɛtɛ ose Isariyɛlɛ, koko aha ose Edjibito. Nde akasɔnɛ dia kambɛ Jehowa.

Lam’akinde l’ɛnɔnyi 40, Mɔsɛ akɔshi yɛdikɔ ya nkimanyiya anto ande. Etena kakandɛnyi ose Edjibito akɔmɔla ose Isariyɛlɛ ɔmɔtshi laki mfumbe, Mɔsɛ akakɔmɔla ose Edjibito ɔsɔ wolo ko nde akavu. Mɔsɛ akashɛ odo ande lo ditshu. Lam’akeye Farawɔ dui sɔ, nde akalange ndjaka Mɔsɛ. Koko, Mɔsɛ akalawɔ l’ɛtshi ka nkɛtɛ ka Midiyana. Jehowa akokokɛka lɛkɔ.