Vɔ Wakasale Lolango La Jehowa
Ambutshi Wambokondja Difuto oma lo Kɔlamelo Yawɔ
LE ASE Isariyɛlɛ, eotwelo k’ɔna pami aki dikambo di’ɔngɛnɔngɛnɔ efula. Eotwelo kakɔ akɛnyaka ɔnɛ ɔlɔndji wa nkumbo kɛsɔ ayotatetemalaka tsho ndo nkumbo kakɔ hatoshisha etenyi ka nkɛtɛ kakawakondja oko sango. Koko, oya l’ɔnɔnyi wa 1593 N.T.D., ondo mbota ɔna pami akayoyalaka oko tshondo ya mananu lo dihole di’ɔtshɔkɔ le Ase Hɛbɛru. Lande na na? Nɛ dia Farawɔ ka l’Edjibito akoke wɔma efula lo mɛna woho wakayafulanɛka Ase Juda esadi esadi lo wodja wakinde owandji, ko nde akatome dui dia ndjaka ana w’apami tshɛ wakawotaka.—Etumbelu 1:12, 15-22.
Lo nshi shɔ yakawonaka shila dioho di’anto oshiki, Amurama nde la wadiɛnde Jɔkɛbɛdɛ, vɔ akɔ ahende Ase Hɛbɛru, wakote yana ya hiami ya dimɛna efula. Kema wolo kanyiya woho wakayokadimɔka ɔngɛnɔngɛnɔ awɔ wɔma wa mamba lam’akawayohɔ didjango diakadje Farawɔ. Koko, lam’akakanaka Amurama nde la Jɔkɛbɛdɛ dikambo dia yana yawɔ ya hiami, vɔ wakakeketsha otema di’aha mbetawɔ mbokalɛ, oyadi kakɔna tshɛ kayoyakomɛ oma lo dikambo sɔ.—Etumbelu 2:1, 2; 6:20.
Woho Wakawɛnya Mbetawɔ Kawɔ
Amurama nde la Jɔkɛbɛdɛ wakashɛ yana yawɔ ngɔndɔ shato y’etondo. (Etumbelu 2:2) Koko, dikambo sɔ diaki wâle nɛ dia Ase Hɛbɛru l’Ase Edjibito wakasukana ngelo. Onto tshɛ lakawɛnaka ayanga dia mɔnyɔla didjango diakadje Farawɔ akahombaka nongola dilanya dia nyɔi—ndo ɔnande nto akahombaka ndjakema. Ko ambutshi asɔ woludi la ngandji akawahombe sala dia kokɛ lɔsɛnɔ l’ɔnawɔ ndo lɔsɛnɔ lawɔ hita na?
Jɔkɛbɛdɛ akatshumanya etande wa kongo. Lokongo ekɔ woho ɔmɔtshi wa lɔkɔmbɛ la wolo efula, lɔ fɔnaka la sɛmbɛ ndo lekɔ l’okendeka w’atshuku asato; okendeka akɔ nanga mbɛdima la lohita lo woke. Lokongo mbeyaka mbola otale polo ndo mɛtɛlɛ 6. Ase Edjibito wakɔsaka etombatomba kɛsɔ dia sala akatshi, atoho, sabata la wâto wa tosadisadi.
Jɔkɛbɛdɛ akɔshi etande wa kongo ko nde mbɛla shɛtɛshɛtɛ yakakoke ɔna ashashi mbɔtɔ. Oma lâsɔ ko nde ndjoyikita elongo la tshɔ dia shɛtɛshɛtɛ yakɔ keketala ndo di’aha ashi mbɔtɔ lɔkɔ. L’ɔkɔngɔ diko, Jɔkɛbɛdɛ akadje ɔnande lo shɛtɛshɛtɛ yakɔ ko nde ndjikitsha l’atei w’ɔngɔmbɛ l’omamu a Ndjale ka Nilɛ.—Etumbelu 2:3.
Wamboshola Yana Yakɔ
Miriyama, ɔnaki Jɔkɛbɛdɛ la omoto, akemala suke la lâwɔ dia menda kɛnɛ kayotomba. L’etena kɛsɔ, ɔnaki Farawɔ la omoto akaye lo Ndjale ka Nilɛ dia ndjɔka.a Ondo Jɔkɛbɛdɛ akeyaka ɔnɛ ɔnaki nkumekanga ɔsɔ akayaka mbala efula lo dihole sɔ ko nde akakitsha shɛtɛshɛtɛ yakɔ lo dihole diakakoke onto ndjiɛna esadi eto. Oyadi nde akeyaka kana bu, ɔnaki Farawɔ la omoto akayɛna shɛtɛshɛtɛ yakɔ l’atei w’ɔngɔmbɛ, ko nde akatɛ os’olimu ande ɔmɔtshi dia towɔsɛyɔ. Lam’akandɛnyi ɔna l’etei ka shɛtɛshɛtɛ yakɔ alela, nde akandama la kɛtshi. Nde akeye ate ɔnɛ ekɔ ɔnaki Ase Hɛbɛru. Onde nde akakoke ndjakisha yana ya dimɛna ya ngasɔ? Lâdiko w’otema w’ɔlɔlɔ watongaka l’onto, ondo ɔnaki Farawɔ la omoto akasɛngiyama la kanyi yaki l’Ase Edjibito efula ɔnɛ di’onto mbɔtɔ l’olongo, nde pombaka sala etsha w’ɛlɔlɔ lo nshi yekende la lɔsɛnɔ.b—Etumbelu 2:5, 6.
Miriyama akamɔ oma lɛnɛ akandemala tshalola dia mendaka ko akasukana oya le ɔnaki Farawɔ la omoto. Nde akayowombola ate: “Ntshu keli ntuketeli umuntu omotshi l’atei w’asi Heberu, dia ndjukolomiyaka ona?” Ko ɔnaki nkumekanga akôkadimola ate: ‘Ntshɔka!’ Miriyama akalawɔ dia teeta nyango. Oshimu kele edja, Jɔkɛbɛdɛ akayokoma la ntondo k’ɔnaki Farawɔ la omoto. Ɔnaki Farawɔ akawotɛ ate: “Utshu la on’one, utonomiyakendi, keli kankufutaki.” Ondo l’etena kɛsɔ ɔnaki Farawɔ la omoto akayeya ɔnɛ Jɔkɛbɛdɛ mbele nyango ɔnakɔ.—Etumbelu 2:7-9.
Jɔkɛbɛdɛ akalame ɔnande edja ndo lam’akandakile awɛlɛ.c Dikambo sɔ akawoshaka tena efula di’ohomba dia nde mbêtshaka awui wa Jehowa, Nzambi ka mɛtɛ. L’ɔkɔngɔ diko, Jɔkɛbɛdɛ akayokaloyɛka ɔnaki Farawɔ la omoto ɔna, ko nde akawɔlɛ lokombo ɔnɛ Mɔsɛ, kitshimudi ate: ‘Akashimbamɛ oma l’ashi.’—Etumbelu 2:10.
Wetshelo le So
Amurama nde la Jɔkɛbɛdɛ wakakambe la yema ya diaaso diakawakondja dia vɔ mbetshaka ɔnawɔ awui wendana l’ɔtɛmwɛlɔ wa pudipudi. Ekɔ ɔlɔlɔ di’ambutshi wa nshi nyɛ sala ngasɔ. Eelo, ekɔ ohomba efula di’ambutshi sala dikambo sɔ. Satana Diabolo ‘ekɔ lo kɛndakɛnda oko tambwɛ kadikita, kayanga onto la tɔ ndɛ.’ (1 Petero 5:8) Nde nangaka minda akɛnda—w’apami la wa amato—wanɛ wakoka ndjoyala ekambi w’ɛlɔlɔ waki Jehowa. Koyanga mbekewɔ akɛnda, Satana hawaoke kɛtshi! Lo menda dikambo sɔ, ambutshi wele la lomba mbetshaka anawɔ dia vɔ mboka Jehowa, Nzambi ka mɛtɛ, wɔma.—Tukedi 22:6; 2 Timote 3:14, 15.
Lo Heberu 11:23, woho wakayatshutshuya Amurama nde la Jɔkɛbɛdɛ dia mbishɛ ɔnawɔ ngɔndɔ shato y’etondo kɔndwamaka oko tshelo yakɛnyaka mbetawɔ kawɔ. Ambutshi asɔ ahende wakokaka Nzambi wɔma waki la mbetawɔ ɔnɛ Jehowa ekɔ la wolo wa shimbɛ onto, diɔ diakɔ diakiwɔ kombetawɔ kalɛ ɔnawɔ, ko wakayokondjaka ɛtshɔkɔ oma lo dikambo sɔ. Ndo sho lawɔ pombaka ndjelaka ɛlɛmbɛ wa Nzambi la awui ande tena tshɛ, ndo monga la mbetawɔ ɔnɛ oyadi kakɔna tshɛ kayotokomɛ oma lo lolango la Jehowa, edja l’edja tayoyokondja ɛtshɔkɔ la ɔngɛnɔngɛnɔ wa pondjo.—Romo 8:28.
[Footnotes]
a Ase Edjibito wakatɛmɔlaka Ndjale ka Nilɛ oko jambizambi ya diwutshi. Vɔ waketawɔka ɔnɛ ashi wa lɔkɔ wekɔ la wolo wa mbisha onto diwutshi efula koyanga taloya lɔsɛnɔ lande.
b Ase Edjibito waketawɔka ɔnɛ lam’avɔ onto, edimu kande ntshɔka la ntondo ka Osiris dia tota akambo wa nganɛ: “Dimi kosoya ndoko onto,” “Dimi konyima ɔna diwɛlɛ dia nde nɔma,” “Dimi lakashaka onto lele la ndjala diangɔ dia nde ndɛ ndo ashi wa nɔ le ɔnɛ laki la mposa.”
c Lo nshi y’edjedja, ana efula kokilaka awɛlɛ esadi oko nshi nyɛ. Ondo Samuɛlɛ akalɔmɛ ɛnɔnyi ndekana esato, ndo Isaka akayokila awɛlɛ lam’akinde oko l’ɛnɔnyi etanu.
[Caption]
[Footnotes]