Ɛtɛkɛta wa mbɔtwɛlɔ

Nyu wanɛ woka Jehowa ngandji,

Yeso akate ate: “Nyu nyayeya akambu wa mete, ku akambu wa mete wayunyutshungula.” (Joani 8:32) Ɔsɔ ekɔ ɛtɛkɛta wakeketsha mɛtɛ! Eelo, sho kokaka mbeya akambo wa mɛtɛ kânga mbasɛnaso lo ‘nshi nyɛ y’ekomelo’ ya pâ efula yambofulanɛ akambo wa kashi. (2 Timote 3:1) Onde wɛ mbohɔka etena kakayeke akambo wa mɛtɛ wa lo Ɔtɛkɛta wa Nzambi? Ɔsɔ aki etena ka dimɛna efula!

Koko, kânga mbele ekɔ ohomba kondja ewo k’oshika k’akambo wa mɛtɛ ndo kiewoyaka anto akina mbala la mbala, dikambo dioleki ohomba ele monga la lɔkɛwɔ lɔtɔnɛ l’akambo wa mɛtɛ. Dia sala dikambo sɔ, sho pombaka tshikala lo ngandji ka Nzambi. Kakɔna kahombaso sala? L’otsho wa la ntondo ka nyɔi kande, Yeso akasha okadimwelo lo dimbola sɔ. Nde akatɛ apɔstɔlɔ ande wa kɔlamelo ate: “Naka nyu nyambukitanyia elembe ami, nyu nyayuyala lu ngandji kami, uku akamakitanyia elembe a Papa, wemi lu ngandji kandi.”—Joani 15:10.

Tolembete dia Yeso akatshikala lo ngandji ka Nzambi lo kitanyiya ɛlɛmbɛ wa She. Ngasɔ mbediɔ lo dikambo diaso ɛlɔ kɛnɛ. Dia tshikala lo ngandji ka Nzambi, sho pombaka kambaka la akambo wa mɛtɛ wekaso lo lɔsɛnɔ laso la lushi la lushi. La dikɔlɔ diakɔ diâmɛ sɔ, Yeso akate ate: ‘Naka nyu nyambeya akambo anɛ, nyayoyala l’ɔngɛnɔngɛnɔ naka nyu mbakotsha.’—Joani 13:17.

Tekɔ lo nongamɛ l’otema ɔtɔi dia dibuku nɛ diayoleka nyokimanyiya dia nyu tetemala kamba l’akambo wa mɛtɛ lo lɔsɛnɔ lanyu la lushi la lushi ndo tshikala ‘lo ngandji ka Nzambi l’elongamelo ka ndjokondja lɔsɛnɔ la pondjo.’—Jude 21.

Olui-walɔmbɔla w’Ɛmɛnyi wa Jehowa