Ngɔndɔ ka dikumi

Jehowa mbele Kiɔkɔ ya lomba ndo la lokaho tshɛ nde mbishaka anto akina lomba lakɔ. Yoho mɔtshi yakondjaso lomba ele, lo mbetawɔ ohokwelo wa Nzambi. Nsala dui sɔ tokokɛka diaha nsala akambo wa kɔlɔ ndo tokimanyiyaka dia ntetemala ndjasukanya la Jehowa. (Tok. 2:10-12) Etombelo wayonga la dui sɔ ko, “[tayotshikala lo ngandji ka Nzambi . . . [t]ele l’elongamelo ka lɔsɛnɔ la pondjo. (Judɛ 21) L’ɔtɛ weso keema kokele kana l’ɔtɛ wa woho wakatodiama, lo tena dimɔtshi mongaka tshondo y’okakatanu dia mbetawɔ ohokwelo kana mbɔɔsa oko dui dia dimɛna. Koko etena kakondjaso wahɔ oma l’ohokwelo wa Nzambi lo lɔsɛnɔ laso, sho shihodiaka dia nde tolangaka efula. Tokedi 3:11, 12 totɛka ɔnɛ: “Ɔnami, totonake ohokwelo wa Jehowa.” Oma laasɔ diɔ mbutaka ɔnɛ: “Nɛ dia Jehowa pangwɛka wanɛ wokande ngandji.” Tonge l’eshikikelo dia Jehowa nangaka kɛnɛ koleki ɔlɔlɔ le so. (Hɛb. 12:5-11) Lam’ele Nzambi teyaka dimɛna, mbala tshɛ ohokwelo ande mongaka dimɛna ndo la wɛdimo. w18.03 28 od. 1-2

Ɔpɔstɔlɔ Petero akafundɛ tshumanelo efula dia l’Asie Mineure kɛnɛ kakawahombe nsala la ntondo “k’ekakatanu.” Kakɔna kakakoke nkimanyiya Akristo wa l’ahole tshɛ dia mbikikɛ lo tena dia paa sɔ? (1 Pe. 1: 1; 4:4, 7, 12) Koko Petero akakeketsha anango l’akadiyɛnde dia nongɔnaka “lam’asa[wɔ],” kaanga mbakaweyanaka ndo mbakawasalaka akambo kaamɛ. Wahɔ akɔna wakawakoke nkondja lo nongɔnaka? Dui sɔ diakahombe mbakimanyiya dia monga kaamɛ. Ko wɛ? Onde wɛ mbohɔka ɔngɛnɔngɛnɔ waki la yɛ etena kakakelɛ onto ɔmɔ lakande? Lo toho takɔna takokaso nongɔnaka “lam’asaso”? Kakɔna kakoka toshimba dia nongɔnaka, ndo ngande wakokaso ndjalowanya? Yoho ya dimɛna ya mbeya anangɛso l’akadiyɛso ele mbalongola. Akristo wa lo nshi ya Petero wakahombe ndeka monga kaamɛ etena kakatalekaka akambo ntshɔ otsha lo kɔlɔ. Lo “nshi y’ekomelo” nyɛ, sho pombaka nsala woho akɔ waamɛ.​—2 Tim. 3:1. w18.03 14-15 od. 1-3

Bible tɛkɛtaka dikambo di’anto wambotshunda lo nyuma. Rɔmɔ 8:6 mɛnyaka dia lɔsɛnɔ laso nemanɛka la nkanyiya woho wakanyiya Jehowa, diɔ mbutaka ɔnɛ: “Nkanyiya akambo wa lo demba nembetshiyaka nyɔi, koko nkanyiya akambo wa lo nyuma nembetshiyaka lɔsɛnɔ ndo wɔladi.” Diakɔ diele, naka sho ntshunda lo nyuma, kete sho koka monga la wɔladi la Nzambi, wɔladi shoamɛ ndo sho koka monga l’elongamelo ka lɔsɛnɔ la pondjo. Koko, tekɔ lo nsɛna l’andja wa waale efula. Lam’ele sho dingama l’anto wahakanyiya woho wakanyiya Nzambi, nɔmbamaka mbidja welo dia nkokɛ timba taso. Naka hatolodisha timba taso la tokanyi ta Nzambi, kete andja ɔnɛ wayolodia timba taso la waonga ndo tokanyi ta lo demba. Judɛ akate di’anto wa lo demba koka kaanga nshisha nyuma ka Jehowa.​—Judɛ 18, 19. w18.02 19 od. 5, 7; 20 od. 8

Adɔkɔtɛlɛ ndo enganga efula kambaka olimu lo dihole diele anto wele la hemɔ yasambemɛ. Vɔ ndjakiyanyaka lo dikambo di’ɛkɔnyi awɔ nɛ dia vɔ nangaka mbakimanyiya. Koko, vɔ pombaka nto ndjakokɛ diaha vɔ sambemɛ la hemɔ yasakawɔ. Woho akɔ waamɛ mbele, efula ka l’atei aso wekɔ lo mbidjasɛ ndo wekɔ lo nkamba l’anto wele la kɛwɔ ndo waonga wotshikitanyi tshɛ lo tshɛ la waonga wa Nzambi. Dui sɔ koka monga okakatanu le so. Lo nshi y’ekomelo ka dikongɛ nɛ, anto wahalange Nzambi minyaka yimba lo atɔndɔ ande wendana la ɔlɔlɔ la kɔlɔ. Ɔpɔstɔlɔ Pɔɔlɔ akatɛkɛta dia waonga awɔ wa kɔlɔ etena kakandafundɛ Timɔte mukanda. (2 Tim. 3:1-5) Kaanga mbakoka waonga wa kɔlɔ asɔ tonyangiya, sho koka sɛngiyama oma lo yoho yakanyiya, yatɛkɛta ndo yasala anto wotodingi akambo. (Tok. 13:20) Diakɔ diele, sho pombaka ndjakokɛ diaha waonga wa kɔlɔ monga la shɛngiya le so etena kakimanyiyaso anto dia mbeya Jehowa. w18.01 27 od. 1-2

L’ɔnɔnyi wa 33, yema tshitshɛ l’ɔkɔngɔ wa nde mbolɔ, Yeso akɛnama le anto ndekana 500, apami, wamato, ondo ndo ana. Ondo l’etena kɛsɔ kakandate ɛtɛkɛta ɛsɔ. (1 Kɔr. 15:6) Eelo, menamaka dia ambeki ande nkama waki laawɔ etena kakasha Yeso ɔkɛndɛ wa mbetɛ anto ambeki. (Mat. 11:29, 30) Dia kambɛ Nzambi lo yoho y’ɔngɛnyangɛnya, onto pombaka mbetawɔ ɔnɛ Nzambi ekɔ lo nkamba la Yeso dia nkotsha sangwelo Diande. Oma laasɔ mbakoka onto batizama ko mbetawɔma le Nzambi. Bible toshaka tolembetelo efula tɛnya dia ambeki wa Yeso wa ntondo wakeyaka ohomba wa batisimu. Vɔ kɔfɔnyaka dia vɔ pombaka nkonga dia ndjobatizama yema l’ɔkɔngɔ.​—Ets. 2:41; 9:18; 16:14, 15, 32, 33 w18.03 5 od. 8

Ɛlɔ kɛnɛ, tekɔ lo nsɛna lo andja wambolola tɔɔ l’akambo wa mindo ndo ɛtɛmwɛlɔ wa kashi. Anto sɛngiyamaka oma le Babilɔna ka woke, tshunda di’ɛtɛmwɛlɔ wa kashi wa l’andja w’otondo dielɛ Bible ɔnɛ “edjaselo k’ɛdiɛngɛ.” (Ɛny. 18:2) Etombelo wele la dui sɔ ko, anto mɛnaka dia sho ntshikitana efula la wɔ ndo vɔ tɔsɔkaka. (Makɔ 13:13) Koko, l’ɛnyɛlɔ ka Danyɛlɛ, nyɛsɔ toyasukanya la Nzambi kaso, Jehowa. Naka sho monga l’okitshakitsha, ndjaɛkɛ le Jehowa ndo mbokitanyiya, kete nde ayotɔsa sho lawɔ oko anto w’ohomba. (Han. 2:7) Ambutshi koka nkondja wetshelo w’ohomba oma le ambutshi wa Danyɛlɛ. Lo ngande? Etena kaki Danyɛlɛ dikɛnda la Juda, anto efula wakoodinge waki kɔlɔ efula, koko nde akodiama dia nanga Jehowa. Ambutshi ande wakawetsha akambo wendana la Jehowa. (Tok. 22:6) Kaanga lokombo Danyɛlɛ lalembetshiya “Nzambi kele Shushi yami,” mɛnyaka di’ambutshi ande wakalangaka Jehowa. (Dan. 1:6, nɔtɛ) Ambutshi le, tanyohekɔke mbetsha ananyu akambo wendana la Jehowa la solo dia lotutsha tshɛ. (Ɛf. 6:4) Nyɔlɔmbake kaamɛ la wɔ ndo nyɔlɔmbake lo dikambo diawɔ. Nyodje welo w’efula dia mbaetsha dia nanga kɛnɛ kata Jehowa dia kekɔ ɔlɔlɔ ndo Jehowa ayonyɔtshɔkɔla efula.​—Os. 37:5. w18.02 5 od. 12; 6 od. 14-15

Sho mbishaka Jehowa, nɛ dia ɔsɔ ekɔ yoho mɔtshi ya mbɔtɛmɔla. Lo ɛnɛlɔ kɛmɔ, ɔpɔstɔlɔ Joani akoke ekambi wa Jehowa wa l’olongo wata ɔnɛ: “Wɛ Jehowa Nzambi kaso, wɛ kasungana nongola lotombo, kɛnɛmɔ ndo wolo, nɛ dia wɛ kakatonge diangɔ tshɛ, ndo oma lo lolango layɛ mbakadionge ndo mbakadiatongama.” (Ɛny. 4:11) Eelo, Jehowa kasungana nongola lotombo tshɛ ndo kɛnɛmɔ, diakɔ diele sho nangaka mbosha kɛnɛ koleki ɔlɔlɔ. Lo tshimbo ya Mɔsɛ, Jehowa akadjangɛ wodja w’Isariyɛlɛ dia salaka fɛtɛ shato l’ɔnɔnyi. Etenyi kɛmɔ k’ɔtɛmwɛlɔ awɔ lo fɛtɛ shɔ kakendanaka la nkimɔ weshasha lo dikambo dia Jehowa. Wakatɛ anto diaha “mɛnama la ntondo ka Jehowa anya hwe.” (Eoh. 16:16) Ndo ɛlɔ kɛnɛ, etenyi kɛmɔ k’ohomba k’ɔtɛmwɛlɔ aso mendanaka la nkimɔ weshasha l’otema ɔtɔi. Lo nsala ngasɔ, sho mɛnyaka dia tekɔ lo mbɔsa olimu wasala okongamelo wa Jehowa la nɛmɔ ndo mbosukɛka. w18.01 18 od. 4-5

Yeso akate ate: “Nyɛmbɛ osembe ami . . . Nɛ dia osembe ami wekɔ dimɛna ndo oshikɔ ami wekɔ osadi.” (Mat. 11:29-30) Dui sɔ diekɔ mɛtɛ! Lo tena dimɔ, sho mbeyaka nɛmba etena kamɔso oma lakaso dia tɔtɔ nsanganya kana dia tosambisha. Ko ngande wayotokaka etena kakalolaso? Sho mongaka la wolo ndo ndjaokaka dia tamboyalɔngɔsɔla dimɛna dia ntondoya ekakatanu aso. Lo mɛtɛ, osembe wa Yeso wekɔ dimɛna. Kadiyɛso kɛmɔ kelɛwɔ Kayla akadiɛnɛka la hemɔ k’ɔlɛmbɛlɔ wahashile, ɔkɔmwɛlɔ ndo ɔtɛ wa wolo. Tena dimɔ, aki tshondo y’okakatanu dia nde mbɔtɔ lo nsanganya. Koko, l’ɔkɔngɔ wa nde nsala la wolo dia mbɔtɔ lo losanganya lɔmɔtshi, nde akafunde ate: “Sawo diakɔ diakatɛkɛtaka dikambo di’ɔkɔmwɛlɔ. Sawo diakɔ diakashama lo yoho ya dimɛna ndo diakamunanda ko lakakɛdia asɔyi. Lakohɔ dia lo nsanganya mbele dihole diakamahombaka monga.” Nde aki l’ɔngɛnɔngɛnɔ w’efula ndo akasale la wolo dia mbɔtɔka lo nsanganya! w18.01 8-9 od. 6-7

Akokayɛ nsala naka ɔnayɛ ambotatɛ monga la taamu dikambo di’akambo wa mɛtɛ l’ɔkɔngɔ wa batizama? Ɛnyɛlɔ, mbeyaka monga ko ɔnayɛ ambokotwama lo akambo wa l’andja ɔnɛ. Kana mbeyaka monga ko ɔnayɛ ambotatɛ ndjambola dia kana ndjela atɔndɔ wa lo Bible ekɔ mɛtɛ yoho ya lɔsɛnɔ yoleki dimɛna. (Os. 73:1, 3, 12, 13) Yoho yayoyosala akambo koka mbɔsɛngiya dia ntetemala kambɛ Jehowa kana bu. Tokakatanake l’ɔnayɛ l’ɔtɛ wa dui sɔ, oyadi nde eke dikɛnda efula kana aya mangase. Koko, nsala la wolo dia mbokimanyiya dia nde mbeya dia wɛ mbolangaka ndo nangaka mbokimanyiya. Onto lakabatizama akayakimɔ le Jehowa. Nde akatshike dɔkɔlɔkɔ dia mbokambɛka ndo mbolangaka oleki oseka ɛngɔ tshɛ. (Makɔ 12:30) Jehowa mbɔsaka ndjakimɔ oko dɔkɔlɔkɔ di’ohomba efula ndo sho lawɔ pombaka diɔsa ngasɔ.​—Ond. 5:4, 5. w17.12 22 od. 16-17

L’ɛnyɛlɔ ka Maata, ekambi wa Jehowa wa kɔlamelo wakeyaka ɔnɛ eolwelo kayonga lo nshi yayaye. Ohokana yimba la kɛnɛ kakalɔmbɛ Jehowa Abrahama dia nsala la Isaka, ɔna lakandakonge edja efula. Jehowa akate ate: “Lam’alangayɛ, ɔsa ɔnayɛ, tshɔi y’ɔnayɛ yalangayɛ, mbuta ate Isaka, . . . towolambole olambo wa lotshumba.” (Eta. 22:2) Ngande wafɔnyayɛ wakayaoke Abrahama etena kakandoke didjango sɔ? Jehowa akalake dia lo tshimbo ya tokanula t’Abrahama, wedja tshɛ wayɔtshɔkwama. (Eta. 13:14-16; 18:18; Rɔmɔ 4:17, 18) Ndo nto, Jehowa akate dia ɛtshɔkɔ ɛsɔ wakahombe monga lo tshimbo ya “Isaka.” (Eta. 21:12) Ko ngande wotosalema dui sɔ otondonga Abrahama akalambola ɔnande? Pɔɔlɔ akasambiyama dia nembetshiya ɔnɛ Abrahama aki la mbetawɔ ɔnɛ Nzambi ekɔ l’akoka wa mbolola Isaka. (Hɛb. 11:17-19) Abrahama kokoka mbeya etena kakahombe ɔnande mbolɔ. Koko nde aki la mbetawɔ dia Jehowa ayolola Isaka. w17.12 5-6 od. 12-14

L’ɛnyɛlɔ ka Pɔɔlɔ, sho la wɔ pombaka mbɔsa lɔsɛnɔ oko waliɔsa Jehowa. Nde “nangaka di’onto tshɛ ndjatshumoya” dia ndjɔsɛna pondjo pondjo. (2 Pe. 3:9) Onde ndo wɛ? Mboka anto akina kɛtshi ayototshutshuya dia nsambisha l’ohetoheto ndo tayonga l’ɔngɛnɔngɛnɔ lo nsala dui sɔ. Dia mbɔsa lɔsɛnɔ oko waliɔsa Jehowa, sho pombaka monga nto la ekanelo k’ɔlɔlɔ lo kɛnɛ kendana l’ekokelo. Sho pombaka mbewɔ waale etena katatakɛndjakɛndja, kakambaso olimu, etena kakaso, kalɔngɔsɔlaso kana katatatshu otsha lo dihole di’ɔtɛmwɛlɔ. Anto, ekokelo ndo yoonge ya demba mbele akambo woleki ohomba la ntondo ka nama wonya kana falanga. Nzambi kaso salaka tena tshɛ kɛnɛ kele ɔlɔlɔ. Ndo sho nangaka monga oko nde. Dikumanyi lo yoho ya laande pombaka mbidja yimba lo ekokelo, oyadi kakiwɔ kana k’anto akina. (Tok. 22:3) Naka ekumanyi kɛmɔ ambokotola yambalo yayɛ lo ɛlɛmbɛ kana atɔndɔ wendana l’ekokelo, hokamɛnde. (Ngal. 6:1) Ɔsa lɔsɛnɔ oko waliɔsa Jehowa “mbaha[y]atonga la onongo wa dikila.”​—Eoh. 19:10. w17.11 16 od. 11-12

L’ɛnyɛlɔ k’ɔpɔstɔlɔ Pɔɔlɔ, ɛlɔ kɛnɛ Akristo w’akitami wekɔ l’elongamelo ka diambo ka nongola “difuto dia leeta la Nzambi.” (Flpɛ. 3:14) Vɔ wayotolɛ kaamɛ la Yeso Kristo lo Diolelo diande ndo wayokamba la nde dia nkimanyiya anto dia monga kokele. (Ɛny. 20:6) Elongamelo kɛsɔ kekɔ ka diambo! Ɛkɔkɔ ekina wekɔ lo nongamɛ difuto diotshikitanyi. Vɔ wekɔ lo nongamɛ dia nsɛna pondjo pondjo lo Paradiso ka la nkɛtɛ ndo elongamelo kɛsɔ mbashaka mɛtɛ ɔngɛnɔngɛnɔ! (2 Pe. 3:13) Dia nkimanyiya asekande Akristo w’akitami dia ntshikala la kɔlamelo ndo nkondja difuto, Pɔɔlɔ akaakeketsha ate: “Nyokanyiyake nshi tshɛ akambo wa la diko.” (Kɔl. 3:2) Vɔ pombaka mbidja yimba l’elongamelo kawɔ ka diambo ka ntshɔ l’olongo. (Kɔl. 1:4, 5) Nkana yimba lo ɛtshɔkɔ wa Jehowa kimanyiyaka okambi wa Nzambi tshɛ dia mbika washo lo difuto.​—1 Kɔr. 9:24. w17.11 25 od. 1-2

Esambo efula wele lo dibuku Tembee Jehowa la ɔngɛnɔngɛnɔ wekɔ oko alɔmbɛlɔ. Esambo ɛsɔ koka kokimanyiya dia mbutɛ Jehowa woho wayaokayɛ. Esambo ekina wayotokimanyiya dia ntshutshuyana “lo ngandji ndo lo etsha w’ɛlɔlɔ.” (Hɛb. 10:24) Ekɔ ohomba sho mbeya wendjo, woho wadɛ ndo wakitakita mishiki ndo ɛtɛkɛta wa l’esambo aso. Yoho mɔ yakokaso nsala dui sɔ ele pokamɛka esambo wakadjama l’eshinga wa lo jw.org. Etena kekayɛ esambo lakayɛ, eka dia mbaemba l’eshikikelo ndo l’ɔngɛnɔngɛnɔ. Tatohɛke dia wembelo w’esambo ekɔ etenyi kɛmɔ k’ohomba k’ɔtɛmwɛlɔ aso. Ɔsɔ ekɔ yoho mɔ y’ohomba efula ya mɛnya Jehowa ɔnɛ sho mbolangaka ndo ɔnɛ tekɔ la lowando lo kɛnɛ tshɛ kasalande lo dikambo diaso. (Isa. 12:5) Etena kembayɛ la wangasanu tshɛ, wɛ keketshaka anto akina dia nsala woho akɔ waamɛ. Onto tshɛ la l’etshumanelo, oyadi ɔlɔngɔlɔngɔ, opalanga, anto weke kodieyaka akambo wa mɛtɛ koka ntɛmɔla Jehowa lo yoho shɔ. Ɔnkɔnɛ tengengake dia memba oma k’ɛse otema. Ɔnkɔnɛ, emba l’ɔngɛnɔngɛnɔ!​—w17.11 7 od. 18-19

Ɛlɔ kɛnɛ, ase dawo efula ndjaka oma lo wedja wele olimu aso w’esambishelo wakashimbama. Diɛsɛ la Ɛmɛnyi wa Jehowa wele l’ohetoheto wa lo wedja walongola ase dawo, nunu di’ase dawo wekɔ lo mboka “ɔtɛkɛta wa Diolelo” mbala ka ntondo. (Mat. 13:19, 23) Anto efula “wele la wetsho” wekɔ lo nkondja ekeketshelo ka lo nyuma lo nsanganya yaso ndo mbetawɔka esadi eto ɔnɛ: “Nzambi ekɔ mɛtɛ l’atei anyu.” (Mat. 11:28-30; 1 Kɔr. 14:25) Sho pombaka monga la lomba ndo la “yewo” etena kasambishaso ase dawo. (Tok. 22:3) Hokamɛ ekiyanu awɔ la solo dia lotutsha tshɛ, koko tɔkɛtshanyake la wɔ awui wa pɔlitikɛ. Yela ɛlɔmbwɛlɔ k’oma lo biro ka filialɛ ndo k’oma le ewandji wa lo ngelo diaha ndjoyadja ndo ndjodja anto akina lo waale. Lam’ele ase dawo ndjaka oma l’ɛtɛmwɛlɔ ndo mbekelo yotshikitanyi, sho pombaka mbeya ndo nɛmiya tokanyi tawɔ. Ɛnyɛlɔ, anto w’oma lo wedja ɛmɔ ndjakiyanyaka efula dia wamato ndɔta dimɛna. Ɔnkɔnɛ, etena kasambishaso ase dawo, tɔlɔtɛ lo yoho yahakoke mbanyangiya. w17.05 7 od. 17-18

Sho koka nɔmba Jehowa nyuma kande k’ekila dia tokimanyiya dia sho monga la memakana ndo ɔlɔlɔ otsha le ewotɔ aso wele bu ambetawudi. Hatohombe mana la wɔ l’ɔtɛ wa waetawɔ awɔ wa kashi. Naka tambonyanga l’ɔtɛ wa dui dimɔ diambowota kana diambowosala, sho koka mbokoya apɔstɔlɔ. Pɔɔlɔ akate ate: “Etena katɔtɛngawɔ, sho mbatshɔkɔlaka. Etena katɔhɛnyahɛnyawɔ, sho mbikikɛka la solo dia lotutsha tshɛ. Etena katomamatanyɛwɔ akambo, sho mbakadimolaka la memakana.” (1 Kɔr. 4:12, 13) Kaanga mbele ntɛkɛta la memakana koka tokimanyiya dia ntetemala monga lo wɔladi la ewotɔ aso, lɔkɛwɔ laso la dimɛna koka ndeka monga la shɛngiya y’efula. (1 Pe. 3:1, 2, 16) Nsala di’ewotɔ ayɛ mɛna oma l’ɛnyɛlɔ kayɛ di’Ɛmɛnyi wa Jehowa wekɔ l’ɔngɛnɔngɛnɔ l’awala awɔ, kokɛka anawɔ dimɛna, sɛnaka lo yoho yɔtɔnɛ l’atɔndɔ wa lo Bible ndo wekɔ la lɔsɛnɔ lele l’oyango. Kaanga naka ewotɔ aso hawetawɔ akambo wa mɛtɛ, sho koka monga l’ɔngɛnɔngɛnɔ lo mbeya ɔnɛ lɔkɛwɔ laso la dimɛna ngɛnyangɛnyaka Jehowa. w17.10 15 od. 13-14

Bu dui dia diambo dia mboka ɔnɛ anto efula wekɔ lo nsala etshikitanu wa weke etena kekawɔ akambo wa mɛtɛ. Anangɛso l’akadiyɛso wa lo ntambe ka ntondo waki l’elongamelo ka tɔsɛna l’olongo wakasale etshikitanu wa ngasɔ. (1 Kɔr. 6:9-11) Etena kakatɛkɛta Pɔɔlɔ lo dikambo dia wanɛ wahatokita Diolelo dia Nzambi, nde akakotsha ate: “Ngasɔ mbaki amɔtshi wa l’atei anyu.” Ɔtɛkɛta wa Nzambi ndo nyuma kande k’ekila kakakimanyiya anto asɔ dia ntshikitana. Koko, kaanga l’ɔkɔngɔ wa vɔ monga Akristo, amɔ l’atei awɔ wakayosala munga ya weke yakonge la shɛngiya lo diɔtɔnganelo diasawɔ la Jehowa. Ɛnyɛlɔ, Bible shilaka ɔnangɛso ɔmɔ l’okitami lakatshanyema. Nde akayosala etshikitanu, ko akayokaloyama l’etshumanelo k’Akristo. (1 Kɔr. 5:1-5; 2 Kɔr. 2:5-8) Ekɔ dui di’ekeketshelo l’ɔtɛ wakonge anangɛso l’akadiyɛso l’akoka wa nsala etshikitanu efula diɛsɛ la wolo wele l’Ɔtɛkɛta wa Nzambi. Sho mɛtɛ nangaka nsala la wolo dia nkamba la wɔ dimɛna efula. w17.09 23-24 od. 2-3

Ngandji ka a·gaʹpe kohikami lo atɔndɔ w’amɛna ndja oma le Jehowa. Jehowa mbele Kiɔkɔ yatɔ. (1 Jni. 4:7) Ngandji kɛsɔ koka mendana la nanga ndo monga la nsaki k’efula otsha le onto ɔmɔ, koko tɔ mendanaka ndo l’awui efula laadiko dia monga tsho la nsaki. Tɔ mɛnamaka lo salɛ anto akina akambo aha la lokaki. Yoho ya ngandji shɔ toshaka ɔngɛnɔngɛnɔ ndo lɔsɛnɔ laso mongaka l’oyango. Jehowa akɛnya anto ngandji kande kaanga la ntondo ka nde ntonga Adama la Eva. Nde akatonge nkɛtɛ dia tɔ monga l’ɛngɔ tshɛ kele la so ohomba dia nsɛna. Laadiko dia laasɔ, nde akakitonge dia tɔ monga dihole diakokaso mbidjasɛ dia sho monga l’ɔngɛnɔngɛnɔ wa mɛtɛ lo lɔsɛnɔ. Jehowa kosala dihole sɔ lo dikambo diande. Nde akadisale lo dikambo diaso. L’ɔkɔngɔ wa nde nɔngɔsɔla dihole dia sho mbidjasɛ, nde akatonge anto ndo akawasha elongamelo ka nsɛna pondjo pondjo lo paradiso ka la nkɛtɛ. w17.10 7 od. 1-2

Jakɔba akakotsha ate: “Naka nyayotetemala monga la shɔnɔdi, kete nyekɔ lo nsala pɛkato.” (Jak. 2:8, 9) Naka sho nangaka anto, kete hatotonga la shɔnɔdi y’onto l’ɔtɛ wa kalasa kakandɔtɔ, lokoho lande la demba kana dihole diele la nde lo tshunda. Hatokoke nsala akambo tsho dia mɛnya dia sho bu la shɔnɔdi. Aha monga la shɔnɔdi pombaka monga lo lonto laso. Ngandji ekɔ nto la “solo dia lotutsha ndo ɔlɔlɔ” ndo “hayadiya.” (1 Kɔr. 13:4) Sho pombaka monga la solo dia lotutsha, ɔlɔlɔ ndo l’okitshakitsha dia ntetemala nsambisha asukanyi aso lokumu l’ɔlɔlɔ. (Mat. 28:19) Laadiko dia laasɔ, waonga asɔ tokimanyiyaka dia mbokana l’anangɛso l’akadiyɛso tshɛ wa l’etshumanelo. Naka sho tshɛ monga la ngandji ka ngasɔ, kete etshumanelo kaso kayonga kaamɛ ndo kayotombola Jehowa. Anto akina wayɛna kaamɛ kɛsɔ ndo wayokotwama oya l’akambo wa mɛtɛ. Ekɔ ngasɔ nɛ dia elembetshielo washa Bible lo dikambo dia lonto l’oyoyo komɛka ɔnɛ: “Laadiko dia akambo asɔ tshɛ, nyɔlɔtɛ ngandji, nɛ dia tɔ kele dimama dia kokele.”​—Kɔl. 3:14. w17.08 26 od. 18-19

Woho akɔ waamɛ mbele, sho pombaka mboka wanɛ wahateye Jehowa koko wakoka ndjatshumoya ndo monga angɛnyi ande kandji. Jehowa halange kaanga onto ɔtɔi ndjolanyema lo kilombo kayaye. (2 Pe. 3:9) Ɔnkɔnɛ kam’ekeso l’etena, nyɛsɔ tosambisha anto tshɛ wakokaso nsambisha losango lande l’ɔhɛmwɛlɔ ndo nkimanyiya anto efula dia nkondja wahɔ oma lo woho wawaoka Jehowa kandji. Yeso aki ɛnyɛlɔ ka dimɛna efula k’onto lakokanaka kandji. Nde akoke anto kɛtshi nɛ dia nde akawaɛnyi dia “vɔ wakahɛnyahɛnyamaka ndo komonga la okimanyedi oko ɛkɔkɔ waha la olami.” Ko kakɔna kakandasale? “Nde akatatɛ mbaetsha akambo efula.” (Mat. 9:36; Makɔ 6:34) Lo yoho yotshikitanyi, Afarisɛ kombokaka anto kandji ndo konangaka mbakimanyiya. (Mat. 12:9-14; 23:4; Jni. 7:49) L’ɛnyɛlɔ ka Yeso, onde wɛ ekɔ la nsaki k’efula ka nkimanyiya anto akina ndo mbaetsha akambo wendana la Jehowa? w17.09 9 od. 6; 10 od. 9

Etena kakinde lo luudu la lokanu l’Edjibito, Yɔsɛfu kokoka nkanyiya dia nde ayoyonga lo dihole dia hende l’Edjibito kana dia Jehowa akakoke nkamba la de dia nshimbɛ nkumbo kande oma lo ndjala. (Eta. 40:15, nɔtɛ; 41:39-43; 50:20) Aha la taamu, akambo wakasale Jehowa wakaleke kɛnɛ tshɛ kakalongamɛka Yɔsɛfu. Tokane yimba nto lo dikambo dia Sara, nyango tshɛnde la Yɔsɛfu. Onde Sara laki aya osombe akalongamɛka dia Jehowa ayetawɔ dia nde mbota ɔna pami? Eotwelo ka Isaka aki dui diakaleke kɛnɛ kakakoke Sara nkanyiya. (Eta. 21:1-3, 6, 7) Hatolongamɛ dia Jehowa ayonya ekakatanu aso tshɛ lo yoho ya dihindo ntondo ka sho monga l’andja w’oyoyo. Ndo hatɔlɔmbɛ Jehowa dia nde nsala akambo wa diambo lo nsɛnɔ yaso. Koko sho mbeyaka dia Jehowa akakimanyiya ekambi ande wa kɔlamelo wa lo nshi y’edjedja lo toho ta diambo. Ndo nde atatshikitana. (Isa. 43:10-12) Dui sɔ tokimanyiyaka dia ndjaɛkɛ le nde. Sho kokaka monga l’eshikikelo ɔnɛ nde ayotosha wolo wele la so ohomba dia nsala lolango lande. (2 Kɔr. 4:7-9) Jehowa kokaka tokimanyiya kaanga l’etena keso l’ekakatanu woleki wolo naka sho ntetemala monga la kɔlamelo le nde. w17.08 11-12 od. 13-14

Olimu wa lo tena tshɛ wayokokimanyiya dia monga Okristo wambotshunda lo nkamba kaamɛ l’ekambi ekina wa lo tena tshɛ. Ndo nto, anangɛso efula wakɛnyi dia nkamba olimu wa lo tena tshɛ etena kekewɔ ɛlɔngɔlɔngɔ akayowakimanyiya lo awala awɔ. Mbala efula, wanɛ wakakambe olimu w’ombatshi mboka ntondo ka ntshukana wekɔ lo ntetemala nkamba oko ambatshi mboka kaamɛ oko atshukanyi. (Rɔmɔ 16:3, 4) Osambo 20:4 mbutaka lo dikambo dia Jehowa ɔnɛ: “[Nde] akokotshe nsaki y’otema ayɛ ndo asale dia kɛnɛ tshɛ kakongɛyɛ ndowana.” Etena kakongɛyɛ kɛnɛ kayoyosala lo nshi yayaye, kana yimba lo kɛnɛ kalangayɛ mɛtɛ nsala la lɔsɛnɔ layɛ. Kana yimba lo kɛnɛ kasala Jehowa etena kɛnɛ ndo kɛnɛ kakokayɛ nsala l’olimu ande. Oma laasɔ nkongɛ dia nsala kɛnɛ kɔɔngɛnyangɛnya. Naka wɛ nkamba la lɔsɛnɔ layɛ dia kambɛ Jehowa tshɛ lo tshɛ ndo mbotombola, kete wɛ ayonga l’ɔngɛnɔngɛnɔ w’efula. Wɛ “[ayɔ]ngɛnangɛna lo yɛdikɔ y’efula le Jehowa, ko nde ayokokotshɛ nsaki y’otema ayɛ.”​—Os. 37:4. w17.07 26 od. 15-18

Mbala efula sho tombolaka onto ɔmɔ naka nde ambosala kana ambota dui dimɔtshi diambotambiya. Ande woho watshutshuyamaso dia ndeka ntombola Jehowa Nzambi lee! Sho mbotombolaka nɛ dia nde ekɔ la wolo efula, dui sɔ mɛnamaka l’etongelo kande ka dimɛna efula ndo sho mbotombolaka nɛ dia nde tokaka ngandji efula, dui sɔ mɛnamaka oma l’oshinga w’etshungwelo w’Ɔnande. Etena kadiaso Osambo 147, sho mbokaka hwe dia ofundji awɔ aki la nsaki k’efula ka ntombola Jehowa. Nde akakeketsha ndo anto akina dia ntombola Nzambi kaamɛ la nde. (Os. 147:7, 12) Hateye onto lakafunde Osambo 147. Koko ondo ofundji awɔ akasɛnaka l’etena kakakalola ase Isariyɛlɛ otsha la Jɛrusalɛma l’ɔkɔngɔ wa Jehowa mbatshungola oma la Babilɔna. (Os. 147:2) Omembi w’osambo ɔsɔ akatombola Jehowa nɛ dia wodja Ande wakakoke mbɔtɛmɔla nto lo wodja awɔ hita. Oma laasɔ, omembi w’osambo akɛnya ɛkɔkɔ ekina efula wa ntombola Jehowa. Naa ɛkɔkɔ akɔ? Ndo ɛkɔkɔ akɔna wele la yɛ wa mbuta ɔnɛ: “Aleluya!,” kana “nyotombole Jah!”?​—Os. 147:1, nɔtɛ. w17.07 17 od. 1-3

Yeso akeyaka ɔnɛ l’ɛnyɛlɔ k’olami wakahomana l’okakatanu wa wolo la shashimoya, ambeki ande efula wayonga l’okakatanu w’efula dia nsɛna l’andja waha la losembwe ɔnɛ. Kaanga mbele Yeso konembetshiya lande na kakandate dia lomombo la l’emunyi lekɔ “kɔlɔ,” Bible mɛnyaka hwe dia nyanga dia nkondja falanga efula oma lo diangɔ komonga lo sangwelo dia Nzambi. Ɛnyɛlɔ, la lokaho tshɛ Jehowa akasha Adama la Eva diangɔ dioleki nɛ diaki la wɔ ohomba l’ekambɔ k’Ɛdɛna. (Eta. 2:15, 16) L’ɔkɔngɔ diko, etena kakasha Nzambi akitami ande nyuma kande k’ekila, “ndooko onto lakataka dia ɛngɔ kaki la nde kaki kande ndamɛ. Vɔ wakasanganyaka diangɔ tshɛ kaamɛ.” (Ets. 4:32) Omvutshi Isaya akate dia ayonga etena kɛmɔ kele anto tshɛ wayɔngɛnangɛna la diangɔ di’oma lo nkɛtɛ. (Isa. 25:6-9; 65:21, 22) Koko l’etena kɛnɛ, ambeki wa Yeso wekɔ l’ohomba wa “lomba l’oshika.” Vɔ pombaka nsɛna lo nkamba la lomombo la kɔlɔ la l’andja ɔnɛ ko l’etena kakɔ kaamɛ nsala la wolo dia ngɛnyangɛnya Nzambi.​—Luka 16:8. w17.07 8 od. 4-6

Ekɔ ohomba dia sho monga l’ekanelo k’ɔlɔlɔ lo kɛnɛ kendana la lowandji la Jehowa. Sho koka mɛna dui sɔ lo mbadiaka dibuku dia Jɔbɔ, diele dibuku dimɔ l’atei w’abuku wa lo Bible wakafundama ntondo. Lɔkɔ sho mbadiaka dia Satana akate ɔnɛ naka Jɔbɔ nsowa efula, kete nde ayotona Nzambi. Satana akalɔmbɛ Nzambi dia Jɔbɔ soyama. Jehowa kosala dui sɔ, koko nde akatshike dia Satana mpemba Jɔbɔ. Yema tshitshɛ oma laasɔ, Jɔbɔ akashisha ekambi ndo diangɔ diande. Oma laasɔ, nde akoke dia anande dikumi wakavwe. Satana akasale dia mɛnama oko Nzambi mbaki lo kiɔkɔ ya mpokoso shɔ. (Jɔbɔ 1:13-19) L’ɔkɔngɔ wa laasɔ, Satana akatatsha Jɔbɔ hemɔ ka paa efula ndo ka wɔnɔnyi. (Jɔbɔ 2:7) Dia ndeka mbetɛ akambo wolo, wadi aki Jɔbɔ ndo angɛnyi ande asato wa kashi wakawotɛ akambo wa lonyangu efula ndo wakɔkɔmɔla. (Jɔbɔ 2:9; 3:11; 16:2) Etombelo akɔna waki la dui sɔ? Kaanga mbakadiɛnɛ Jɔbɔ la mpokoso ya wolo, ndooko lushi lakandatone Jehowa.​—Jɔbɔ 27:5. w17.06 24 od. 9-10

Jehowa akasha ewandji wa nkumbo ɔkɛndɛ wa nsɛnya nkumbo yawɔ. Vɔ pombaka nkamba olimu efula dia nkotsha ɔkɛndɛ ɔsɔ. Koko, lo nshi y’ekomelo nyɛ, olimu wa l’emunyi koka mbela ekiyanu efula. Tena efula anto wele l’ohomba w’elimu ndeka ndo elimu watanema efula. L’ɔtɛ wa dui sɔ mbele anto wekɔ lo ndɔ tshondo ya ta dia ntana olimu. Anto efula fɔnyaka dia vɔ pombaka nkamba ndo lo wenya wa laadiko, mbala efula nɛ dia difuto bu kambe. Ase okanda wekɔ lo nsala la wolo dia ntondja diangɔ efula lo nkamba l’ase olimu yema tshitshɛ ndeka woho wakiwɔ ntondo. Diakɔ diele ase olimu koka monga la ekiyanu efula, nɛmba ndo kaanga ntata hemɔ. Anto efula ndjakiyanyaka ɔnɛ wayoshisha elimu awɔ naka hawosale kɛnɛ tshɛ kaalɔmba owandji awɔ w’olimu. Oko weso Akristo, sho mongaka la kɔlamelo y’efula le Jehowa oleki le onto akɔna tshɛ kana ɛngɔ kekina tshɛ, mbidja ndo olimu aso. (Luka 10:27) Olimu aso wa l’emunyi mbatokimanyiya dia nkotsha ehomba aso ndo dia nsukɛ olimu w’esambishelo. Koko naka hatongi la yewo, kete olimu aso wa l’emunyi koka todjɛ wekamu l’ɔtɛmwɛlɔ aso. w17.05 23 od. 5-7

Lo tena dimɔtshi, eyoyo koka tɔlɔmba dia mbakimanyiya dia mbetsha anawɔ akambo wendana la Jehowa. Etena katɔlɔmba ombutshi ɔmɔtshi dia mbeka l’ɔnande Bible, ekɔ ohomba mbohɔ ɔnɛ sho bu la lowandji la woho akɔ wamɛ lele la ombutshi. (Ɛf. 6:1-4) Lo tena dimɔ sho kokaka mbeka kaanga l’ɔna lele ambutshi ande bu Ɛmɛnyi wa Jehowa. Etena kekaso l’ana wele bu waso, ayonga dui dia lomba mbeka la wɔ lawakawɔ etena kele ambutshi awɔ kana Ɔmɛnyi wa Jehowa okina wambotshunda ekɔ suke kana mbeka la wɔ lo sɛkɛ. Lo nsala ngasɔ, ndooko onto layonga la kanyi ya kɔlɔ. Ndo ondo l’ɔkɔngɔ w’etena kɛmɔtshi, ambutshi vɔamɛ wayokoka mbetsha anawɔ akambo wendana la Jehowa. w17.06 8 od. 15-16

Naka ana hawolange monga la mbekelo yakɔ yaamɛ yele la ambutshi awɔ, kete vɔ koka ntona mbeka ɔtɛkɛta w’ambutshi awɔ ndo awui w’ɔtɛmwɛlɔ. Ambutshi w’Akristo mbetshaka lonyuma l’anawɔ la ntondo ka nango yawɔ. (1 Kɔr. 10:24) Ɔnangɛso lelɛwɔ Samuel mbutaka ɔnɛ: “Dimi la wadɛmi sɛdingolaka anaso dia mbeya lo ɔtɛkɛta akɔna wakoka akambo wa mɛtɛ munanda etema awɔ ndo sho nɔmbaka dia nkondja lomba. . . . Koko etena kakatɛnyi dia wekɔ lo nkondja wahɔ yema tshitshɛ lo nsanganya ya l’etshumanelo ka l’ɔtɛkɛta aso, takɔshi yɛdikɔ ya monga l’etshumanelo ka l’ɔtɛkɛta wa lo dihole diakiso. Sho tshɛ takayotatɛ mbɔtɔ mbala la mbala lo nsanganya ndo nsambisha kaamɛ. Ndo nto, takelɛka angɛnyi aso wa lo dihole diakiso dia ndjɔlɛ la wɔ yangɔ ndo mɛngɔla yema. Awui asɔ tshɛ wakakimanyiya anaso dia mbeya anangɛso ndo Jehowa, aha tsho oko Nzambi kawɔ koko oko Shɛwɔ la Ɔngɛnyi awɔ. Takɔsaka di’awui asɔ waki ohomba efula ndeka wekelo awɔ w’ɔtɛkɛta aso.” w17.05 10 od. 11-13

Keema edja, onto tshɛ la la nkɛtɛ ayɔngɛnangɛna lowandji la Jehowa oleki mandji nkina tshɛ. Ande woho wakongɛso etena kɛsɔ lee! Sho ndjaokaka oko Dɛbɔra la Baraka, wanɛ wakembe ɔnɛ: “Jehowa le, atunyi ayɛ tshɛ walanyeme, koko wanɛ wakolanga wayale oko wonya lam’ahotɔwɔ la lotombo lawɔ.” (Emb. 5:31) Dui sɔ diayosalema etena kayokomiya Jehowa andja wa kɔlɔ waki Satana ɔnɛ. Etena kayotatɛ ta dia Aramangɛdɔna, Jehowa hatonga l’ohomba w’anto wayakimɔ la lolango dia ndanya atunyi. Koko, sho ‘tayotshikala ki’ ko ‘mɛna panda kayotosha Jehowa.’ (2 Ɛk. 20:17) Etena kakatakonge dui sɔ, tekɔ la waaso wa diambo efula wa nsukɛ lowandji la Jehowa la dihonga ndo l’ohetoheto. “Lam’ele anto wakayakimɔ la lolango, nyotombole Jehowa!” (Emb. 5:1, 2) Woho akɔ waamɛ mbele, etena kakambɛso Jehowa lo yoho tshɛ yahombama, anto akina nto mbeyaka keketshama dia ‘ntombola Jehowa!’ w17.04 32 od. 17-18

L’edja k’ɛnɔnyi 13 wakandadiɛnɛ l’akambo waha la losembwe, Yɔsɛfu akɛnya dia nde akɛnaka akambo oko wawaɛna Jehowa. (Eta. 45:5-8) Kɛnɛ koleki ohomba ele, nde kombetawɔ dia munga ndo etsha wa kɔlɔ w’anto akina mbanganya la Jehowa. Kɔlamelo ya Yɔsɛfu akawosha diaaso dia nde mɛna woho wakalɔngɔsɔla Jehowa akambo waha la losembwe ko mbɔtshɔkɔla nde la nkumbo kande. Woho akɔ waamɛ mbele, sho pombaka nkokɛ ndo mbɔsa diɔtɔnganelo diasaso la Jehowa la nɛmɔ. Hatohombe pondjo mbetawɔ dia munga y’anangɛso tokakitola la Nzambi kokaso ngandji ndo katɛmɔlaso. (Rɔmɔ 8:38, 39) Koko, naka wambotosalɛ akambo aha la losembwe lo etshumanelo, nyɛsɔ tokoya Yɔsɛfu ndo toleke ndjasukanya la Jehowa. Tosale la wolo dia mɛna akambo woho wawaɛnande. L’ɔkɔngɔ wa sho nsala kɛnɛ tshɛ kakokaso nsala dia nkandola okakatanu lo ndjela atɔndɔ wa lo Bible, sho pombaka ntshika dikambo diakɔ l’anya wa Jehowa. Sho koka monga l’eshikikelo dia nde ayɔlɔngɔsɔla dikambo diakɔ lo etena ndo lo yoho yalangande. w17.04 20 od. 12; 22 od. 15-16

Hana akasale paka oko wakandalake Jehowa. Nde akatɔlɛ Samuɛlɛ le Eli Ɔlɔmbɛdi a laadiko lo tabɛrnaklɛ ka la Shilo ndo akate ate: “L’ɔtɛ w’ɔna ɔnɛ kakamalɔmbaka ko Jehowa ambombisha kɛnɛ kakamɔɔlɔmbɛ. Wonya ɔnɛ, dimi lawɔ lambookimɔ le Jehowa. Nde ambokimɔma le Jehowa lo nshi tshɛ ya lɔsɛnɔ lande.” (1 Sa. 1:24-28) Oma ko etena kɛsɔ, Samuɛlɛ akatshikalaka lo tabɛrnaklɛ. Bible mbutaka dia “Samuɛlɛ akatatetemalaka mbola la ntondo ka Jehowa.” (1 Sa. 2:21) Komonga dui dia wɔdu le Hana dia nde nkotsha dɔkɔlɔkɔ diande. Dui sɔ nembetshiyaka dia Hana kokoka mbetsha lushi tshɛ kaamɛ la ɔnande la nɛmɔ lakandalangaka efula. Takandahombe mɛna woho wakatolaka ɔna. Koko Hana akɔshi dɔkɔlɔkɔ diakandatshike le Jehowa la nɛmɔ. Nde aketawɔ ndjahombia awui waki ohomba le nde l’oyango wa nkotsha daka diakandalake Nzambi.​—1 Sa. 2:1, 2; Os. 61:1, 5, 8. w17.04 5 od.7-8

Ɔpɔstɔlɔ Pɔɔlɔ akate dia lo nshi y’ekomelo, “tena dia paa dia wolo mbikikɛ diayoyala.” Oma laasɔ nde akakotsha ate: “Akanga wa kɔlɔ ndo akanga wa lokeso wayoleka mpama lo kɔlɔ.” (2 Tim. 3:2-5, 13) Onde wɛ ambɛnaka akambo asɔ? Efula ka l’atei aso tambodiɛnɛka oma le akanga wa kɔlɔ wele oko asoyanyi wa djawudi, akanga wa kɔngɔdi wahetshana, ndo atshi w’awui wa kɔlɔ efula. Amɔ l’atei awɔ hawoshɛ akambo wa kɔlɔ wasalawɔ. Akina sɛmaka dia wekɔ lo nkimanyiya anto, koko lo mɛtɛ vɔ wekɔ akanga wa kɔlɔ. Koko, oyadi kaanga tatadiɛnɛka la dikambo dimɔ dia kɔlɔ efula, akanga wa kɔlɔ wekɔ la shɛngiya le so. Sho nyangaka efula etena kokaso woho wasalɛwɔ ana w’akɛnda, esombe ndo anto akina wahakoke ndjakokɛ akambo la esehe tshɛ. Akanga wa kɔlɔ asɔ wekɔ lo nsala akambo lo yoho yaakonya dia mɛnama oko nyama ya ngala kana oko ɛdiɛngɛ. (Jak. 3:15) Diɛsɛ ko, Ɔtɛkɛta wa Jehowa toshaka elongamelo. w17.04 10 od. 4