Wembola w’oma le ambadi
Joani ya ntondo 4:18 totɛka ɔnɛ: “Kema woma lam’eli ngandji keli ngandji [ka kokele, NW] atunyeka woma.” Koko Petero akafunde ɔnɛ: “Nyoke nkumbo k’otondo k’anangɛso ngandji, nyoke Nzambi wɔma.” (1 Petero 2:17, NW) Woho akɔna wakokaso mbɔtɔnganyiya avɛsa ahende asɔ na?
Petero nde la Joani waki apɔstɔlɔ wakeke akambo oma le Yeso Kristo ndamɛ. Ɔnkɔnɛ, sho kokaka ndjashikikɛ ɔnɛ kɛnɛ kakawafunde mbɔtɔnganɛka. Lo kɛnɛ k’endana l’avɛsa ango wofundami la diko, dia sho mbaɔtɔnganyiya, sho pombaka mbeya ɔnɛ apɔstɔlɔ akɔ ahende waki lo tɛkɛta dikambo dia weoho wa wɔma wotshikitanyi.
Totokenda dako diaki Petero ntondo. Oko wadiɛnya avɛsa wosukanyi la divɛsa sɔ, Petero aki lo mbisha anyande Akristo alako wakasambiyama oma le Nzambi lo dikambo dia dionga diawɔ la ntondo ka lowandji. Kɛdikɛdi, nde aki lo nembetshiya kanyi y’ɔlɔlɔ yakawahombe monga layɔ dia ndjakitshakitsha lo akambo amɔtshi. Ɔnkɔnɛ, nde akalake Akristo dia vɔ ndjakitshakitsha le anto wele l’ahole wa lowandji l’atei wa dɔmbwɛlɔ di’anto, ɛnyɛlɔ oko nkumi ya dikanga kana ɛnɔmbɔdi. (1 Petero 2:13, 14) Petero akatetemala funda ate: “Nyolemia antu tshe. [Nyoke nkumbo k’otondo k’anangɛso ngandji, nyoke Nzambi wɔma, nyɔlɛmia nkumekanga, NW].”—1 Petero 2:17.
Naka sho sɛdingola avɛsa wosukanyi la divɛsa sɔ, kete tayɛna hwe ɔnɛ lam’akate Petero ɔnɛ Akristo pombaka ‘mboka Nzambi wɔma,’ nde akalembetshiya ɔnɛ sho pombaka mbisha Nzambi dilɛmiyɛlɔ di’efula, diɔsɔhanyemi la wɔma, wɔma w’aha nyangiya omboledi wa lâdiko dia tshɛ.—Ɛdika la Heberu 11:7.
Kayotota lo dikambo dia kɛnɛ kakate ɔpɔstɔlɔ Joani? L’etatelo ka tshapita 4 ya 1 Joani (NW), ɔpɔstɔlɔ akɛnya ohomba wa pemba “awui wakasambiyama oma le nyuma,” ɛnyɛlɔ oko awui waya oma le amvutshi wa kashi. Awui asɔ mɛtɛ hawoye oma le Jehowa Nzambi; vɔ ndja oma l’andja ɔnɛ wa kɔlɔ.
Lo yoho yotshikitanyi, Akristo w’akitami ‘wakatɔngɔ oma le Nzambi.’ (1 Joani 4:1-6) Oko wediɔ ɔsɔku, Joani akasha dako nɛ: “Elangimi ami, tukani ngandji; ne dia ngandji keli uma le [Nzambi, NW].” Nzambi mbakɔshi yɛdikɔ ya ntondo ya tɛnya ngandji—nde “akatumi On’andi dia ndjala ulambu ne dia kolo yasu.” (1 Joani 4:7-10) Kakɔna kahombaso sala lo menda ngandji kɛsɔ na?
Mɛtɛ, sho pombaka tshikala kâmɛ lo ngandji ka Nzambi. Sho hatohombe monga la esasesase ka wɔma otsha le nde kana didima lokomba lam’awotɛso dikambo dimɔtshi lo dɔmbɛlɔ. Oma l’etatelo, Joani akasha dako nɛ: “Naka etema asu hawutamia, ku shu tayuyala la dihunga la ntundu ka [Nzambi, NW]. Shu tatulungulaka kene kalombasu, ne dia shu tatulamaka elembe andi.” (1 Joani 3:21, 22) Eelo, nkum’otema k’ɔlɔlɔ toshaka lotshungɔ la sho sawola la Nzambi aha la monga la lokomba la wɔma kana mbututala la wɔma. Oma lo ngandji kawokaso, sho ndjaokaka dia tekɔ la lotshungɔ la mbotɛ dui, kana sawola la Jehowa lo dɔmbɛlɔ. Lo dikambo sɔ, “kema woma lam’eli ngandji.”
Nyɛsɔke tosanganya tokanyi tɔsɔ tohende. Nshi tshɛ, Okristo pombaka mbokaka Jehowa wɔma wɔsɔhanyemi la dilɛmiyɛlɔ, dilɛmiyɛlɔ di’efula dia dihole diele lande, ndo losembwe lande. Koko, sho mbokaka Nzambi ngandji nto oko Shɛso, ndo sho ndjasukanya otsha le nde la lotshungɔ la mbotɛ kɛnɛ tshɛ kele l’etema aso. Koko, lo dihole dia sho didimaka la wɔma ande, sho tekɔ la dietawɔ ɔnɛ sho kokaka mbotɛ dui, oko wahatokandakandaka ɔna dia mbutɛ ombutshi ande wa ngandji dikambo.—Jakoba 4:8.