Toke Jehowa wɔma ndo tolame ɛlɛmbɛ ande
“Uki [Nzambi] woma, ulamaki elembe andi. Oso eli okende w’untu tshe.”—UNDAKI 12:13.
1, 2. (a) Ngande wokoki wɔma tokokɛ lo demba? (b) Lande na kele ambutshi wa lomba salaka la wolo dia mbidja wɔma wa dimɛna l’etema w’anawɔ?
LÉONARD DE VINCI akate ate: “Dihonga mbidjaka lɔsɛnɔ lo wâle, kele wɔma likokɛka.” Dihonga diambotamba olelo mbohiyaka onto wâle wele la ntondo kande koko wɔma mbôholaka dia nde monga la mayɛlɛ. Ɛnyɛlɔ, lam’asukanaso l’omamu wa lowenga lɔmɔtshi ko tambɛna dia lekɔ ɔhɔngɔ efula, efula l’atei aso kawolaka ɛkɔngɔkɔngɔ aha l’onto mbotɛ. Woho akɔ wamɛ mbele wɔma w’ɔlɔlɔ hatokimanyiya tsho dia monga la diɔtɔnganelo di’oshika lam’asaso la Nzambi oko wakatadiɛnyi lo wekelo wa ntondo, koko vɔ tokimanyiyaka nto dia sho ndjakokɛ oma lo mpokoso.
2 Koko sho pombaka mbeka dia monga la wɔma w’awui efula wendana la wâle wa nshi nyɛ. Oko wele akɛnda hawodje yimba lo wâle wokoki ndja oma lo kura, mituka, akalo kana mitutu w’eteta, vɔ koka sala aksida wa wolo esadi eto.a Ambutshi wa lomba salaka dia mbidja wɔma wa dimɛna l’etema w’anawɔ lo mbaewolaka esangɔ l’esangɔ lo kɛnɛ kendana la wâle wele suke lawɔ. Ambutshi mbeyaka dia wɔma ɔsɔ koka shimbɛ nsɛnɔ y’anawɔ.
3. Lande na ndo ngande watewola Jehowa oma lo wâle wa lo nyuma?
3 Jehowa ndjakiyanyaka woho akɔ wamɛ dikambo di’ɔlɔlɔ aso. Oko wende Shɛso ka ngandji, nde tetshaka l’ekimanyielo k’Ɔtɛkɛta ande ndo k’ɔlɔngɔswamelo ande dikambo dia wahɔ wakiso. (Isaya 48:17) Etenyi kɛmɔtshi k’ekongelo ka wetshelo ɔsɔ waki Nzambi tewolaka ‘esangɔ l’esangɔ’ lo kɛnɛ kendana la wâle wa lo nyuma dia sho monga la wɔma wa dimɛna wa wâle wa ngasɔ. (2 Ekondo 36:15; 2 Petero 3:1) Ɔkɔndɔ w’anto w’otondo mɛnyaka dia mpokoso ya lo nyuma ndo asui efula wakakoke mbewɔma “utunduyala vo wayalaki la etema ene etu, wa vo [mbokaka Nzambi] woma la nkitanyiaka elembe [ande] tshe.” (Euhwelu k’Elembe 5:29) Lo ‘tena dia wolo mbikikɛ nɛ,’ ngande wakokaso monga l’otema woka Nzambi wɔma ndo wewɔ wâle wa lo nyuma?—2 Timote 3:1.
Totshike kɔlɔ
4. (a) Woho akɔna wa lohetsho lahomba Akristo monga lalɔ? (b) Ngande wɔsa Jehowa dionga dia kɔlɔ? (Enda nɔtɛ ka l’ɛse ka dikatshi.)
4 Bible nembetshiyaka dia ‘wɔma wa Jehowa kɛdikɛdi petsha kɔlɔ.’ (Tukedi 8:13) Dibuku dimɔtshi dialembetshiya awui wa lo Bible mɛnyaka dia lohetsho lɔsɔ lekɔ oko “dionga dimɔtshi dionga l’onto otsha le anto kana diangɔ diahɔtɔnɛ, diahokana lande, diɔnyɔlande ndo diahandakombola munanda kana mbɔtɔnganɛ ladiɔ.” Ɔnkɔnɛ, wɔma wa Nzambi kɛdikɛdi monga la lohetsho kana la nyɔmi k’oma k’ɛse otema ka kɛnɛ tshɛ kele kɔlɔ lo washo waki Jehowa.b (Osambu 97:10) Vɔ totshutshuyaka dia mbewɔ kɔlɔ oko wokokiso mbewɔ lowenga l’ɔhɔngɔ etena kokaso wɔma aha l’onto tewola. Bible mbutaka ɔnɛ: “Uma lu woma wa [Jehowa] mbatukadimoka antu uma lu kolo.”—Tukedi 16:6.
5. (a) Ngande wakokaso keketsha wɔma wokaso Nzambi ndo lohetsho la kɛnɛ kele kɔlɔ? (b) Ɔkɔndɔ wa wodja w’Isariyɛlɛ toshaka wetshelo akɔna lo dikambo sɔ?
5 Sho koka keketsha wɔma ɔsɔ wa dimɛna ndo lohetsho la kɛnɛ kele kɔlɔ naka sho sɛdingola etombelo wa kɔlɔ wela pɛkato. Bible toshikikɛka dia tayona kɛnɛ kakatonɛ, oyadi takonɛ lo demba kana lo nyuma. (Ngalatiya 6:7, 8) L’ɔtɛ wa dikambo sɔ mbele Jehowa mɛnyaka hwe kɛnɛ kahomba tomba naka sho mɔnyɔla wadjango ande ndo takɔ ɔtɛmwɛlɔ wa mɛtɛ. Otondonga aha ekokelo kaki Nzambi tshike wodja w’Isariyɛlɛ waki tshitshɛ ndo waki komonga la wolo wotodiɛnɛ oma le wedja wa ngala ndo wa welo wakasukana lawɔ. (Euhwelu k’Elembe 28:15, 45-48) Etombelo wa kɔlɔ wakatombe oma l’ohedia w’ase Isariyɛlɛ wakafundama tshɛ lo Bible dia ‘tewola’ woho wa sho kondja wetshelo ndo monga la wɔma wa Nzambi.—1 Koreto 10:11.
6. Naa bɛnyɛlɔ dimɔtshi di’oma l’Afundelo diakokaso sɛdingola dia monga la wɔma wa Nzambi? (Enda l’awui wa l’ɛse ka dikatshi.)
6 Lâdiko dia kɛnɛ kakakomɛ wodja w’Isariyɛlɛ w’otondo, Bible ekɔ l’ɛkɔndɔ wa mɛtɛ wa nsɛnɔ y’anto wakonge la kandjema, la lɔkɛwɔ la mindo, la lokaki ndo la lotamanya.c Amɔtshi l’atei w’anto asɔ wakakambɛ Jehowa ɛnɔnyi efula, koko l’etena kɛmɔtshi ka wolo ka lo nsɛnɔ yawɔ, vɔ komonga nto la wɔma w’efula otsha le Nzambi ndo vɔ wakayodiɛnɛka heyama. Etena kakanaso yimba la bɛnyɛlɔ di’oma l’Afundelo sɔ, sho koka keketsha yɛdikɔ yaso yaha sala munga yakɔ yamɛ. Ekɔ kandji efula naka takakonge dia mpokoso kɛmɔtshi tokomɛ la ntondo ka sho ndjela alako waki Nzambi! Otshikitanyi la kɛnɛ kakanyiya anto efula ɔnɛ onto hombe mpota naka nde atatshumbɔ, kema dimɛna ndjohɔka okanga wa kɔngɔlɔ wanyu amboshila.—Osambu 19:7.
7. Jehowa onto akɔna elɛnde oya lo luudu lande la didjidji?
7 Ɔkɔkɔ okina w’oshika wahombaso monga la wɔma wa Nzambi ele saki kaso ka kokɛ diɔtɔnganelo diasaso la nde. Sho mbokaka wɔma dia nyangiya Jehowa nɛ dia sho mbɔsaka lɔngɛnyi lasaso lande la nɛmɔ efula. Onto akɔna akoka mbɔsama oko ɔngɛnyi waki Nzambi, ndo lakoka mpanga lo luudu lande la didjidji na? Ele paka “one latokendakendaka ololo, [ndo] latutshaka akambu w’uluwanyi.” (Osambu 15:1, 2) Naka sho mbɔsa diɔtɔnganelo di’oshinga wolo diasaso la Otungi aso sɔ la nɛmɔ, kete tayodjaka yimba dia kɛndakɛnda ɔlɔlɔ lo washo ande.
8. Ngande wakɔnyɔla ase Isariyɛlɛ amɔtshi wa lo nshi yaki Malaki lɔngɛnyi laki lam’asawɔ la Nzambi?
8 Lonyangu ko ase Isariyɛlɛ amɔtshi wa lo nshi ya Malaki wakɔnyɔla lɔngɛnyi laki lam’asawɔ la Nzambi. Lo dihole dia vɔ mboka Jehowa wɔma ndo mbɔlɛmiya, vɔ wakalambolaka nyama yele la hemɔ ndo la dikɔmɔ lo elambwelo kande. Woho wakiwɔ komonga la wɔma wa Nzambi akɛnama nto oma lowoho wakawɔsaka diwala. L’oyango wa tshuka wamato weke esekaseka, vɔ wakasɛkɛ wadi wa lo nshi yawɔ y’ɛlɔngɔlɔngɔ l’ɔtɛ w’ɛkɔkɔ w’anyanya. Malaki akawatɛ dia Jehowa petshaka “ediakelu ka diwala” ndo ɔnɛ yimba yawɔ ya lokeso yakasale dia vɔ mangana etale la Nzambi kawɔ. Ngande wakakoke Nzambi mbetawɔ elambo awɔ etena kele elambwelo kakalole l’asɔyi lo yoho ya didjidji mbut’ate asɔyi w’alelo wakalelaka wamato wakawasɛkɛ na? Yoho shɔ yakawɔnyɔla ɛlɛmbɛ ande l’okonda akatshutshuya Jehowa dia nde mumbola ate: “Lend’eli woma watunyumbukaka?”—Malaki 1:6-8; 2:13-16.
9, 10. Ngande wakokaso mɛnya dia sho mbɔsaka lɔngɛnyi lasaso la Jehowa la nɛmɔ?
9 Woho akɔ wamɛ mbele, ɛlɔ kɛnɛ, Jehowa ekɔ lo mɛna woho wakɛla dikila l’asolo w’atshukanyi ndo ana efula waha l’onongo waya ekalema l’ɔtɛ wa dionga dia lokaki ndo dia mindo diaki waomi, wadi, ambutshi w’apami kana wa wamato. Dikambo sɔ mbonyangiyaka mɛtɛ efula. Ɔnɛ lele ɔngɛnyi wa Nzambi ayɛnaka akambo oko wawaɛna Nzambi ndo ayosalaka la wolo dia keketsha diwala diande, tona tokanyi t’ase andja ɔnɛ wɔsa dimama dia diwala kana ‘olawelo wa monanyi’ oko ɛngɔ k’anyanya.—1 Koreto 6:18.
10 Oyadi lo diwala kana l’akambo akina wa lo lɔsɛnɔ, petsha kɛnɛ kele kɔlɔ lo washo wa Jehowa ndo ngɛnangɛna efula lɔngɛnyi lasaso la nde ayotokimanyiya dia sho tshɔkwama ndo mbetawɔma le nde. Ɔpɔstɔlɔ Petero akate l’eshikikelo tshɛ ate: “Dimi lambeya nti: [Nzambi] kema la shonodi y’antu. Keli ndi mbetawoka wa lu wedja tshe, wane wawuka woma la watsha akambu w’ololo.” (Etsha 10:34, 35) Tekɔ la bɛnyɛlɔ efula di’oma l’Afundelo diɛnya woho wakatshutshuya wɔma wa Nzambi anto dia sala kɛnɛ kaki ɔlɔlɔ lo tena efula dia wolo.
Anto asato waki la wɔma wa Nzambi
11. L’atei w’akambo akɔna wakawatɛ Abarahama di’ɔnɛ nde mbokaka “[Nzambi] woma”?
11 Ekɔ onto ɔmɔtshi la lo Bible lele Jehowa ndamɛ akawete ate ɔngɛnyi ami, onto akɔ ko owandji wa nkumbo Abarahama. (Isaya 41:8) Wɔma wakokaka Abarahama Nzambi wakɔtɔ l’ohemba etena kakɔlɔmbɛ Nzambi dia mbolambola ɛtɔi kande k’ɔna, Isaka lele oma lo tshimbo yande Nzambi akahombe kotsha daka diande di’ɔnɛ tokanula t’Abarahama tayokoma wodja wa woke. (Etatelu 12:2, 3; 17:19) Onde “ongenyi a [Jehowa]” akatondoya ohemba wa wolo ɔsɔ? (Jakoba 2:23) Paka l’etena kakawedja Abarahama lokuwa lande dia ndjaka Isaka, mbakawotɛ ondjelo waki Jehowa ate: “Tukumiaki lunya laye le ona. Ndu tûtshelaki nduku dikambu. Dimi lambeya kakiane nti: we mbukaka [Nzambi] woma, ne dia we konseka dia mbishami etoi kaye k’ona.”—Etatelu 22:10-12.
12. Kakɔna kakatshutshuya Abarahama dia monga la wɔma wa Nzambi ndo ngande wakokaso monga la woho wa dionga dia ngasɔ?
12 Kânga mbele Abarahama akɛnya lo nshi yakete dia nde aki onto loka Jehowa wɔma, nde akɛnya wɔma wakandokaka Nzambi lo yoho ya lânde lo diaaso sɔ. Woho wakandetawɔ nambola Isaka akɛnya dia nde komonga tsho l’okitanyiya wele la dilɛmiɛlɔ. Abarahama akatshutshuyama oma l’eshikikelo k’efula kaki lande ɔnɛ She lele l’olongo ayokotsha daka Diande lo mbolola Isaka naka ayonga ohomba. Oko wakadifunde Paulo, Abarahama “aketawo l’utema tshe ate: [Nzambi] mbeyaka nshidiya dikambo diakandalaki.” (Romo 4:16-21) Onde tamboyalɔngɔsɔla dia sala lolango laki Nzambi kânga l’etena kalɔmba dikambo sɔ dia ndjahombia akambo efula? Onde tekɔ l’eshikikelo ka mɛtɛ ɔnɛ okitanyiya wa ngasɔ ayotela ɛlɔlɔ watshikala edja, lo mbeya dia Jehowa ekɔ “ufutshi a wane watûyangaka”? (Heberu 11:6) Ɔsɔ kele wɔma wa Nzambi wa mɛtɛ.—Osambu 115:11.
13. Lande na kakakoke Jɔsɛfu mbuta dikambo diande ndamɛ ate: “Dimi mbukaka [Nzambi] woma”?
13 Tɔsɛdingole ɛnyɛlɔ kekina k’onto lakɛnya wɔma waki Nzambi l’etsha, onto akɔ ko Yɔsɛfu. Oko wakinde fumbe lo luudu laki Pɔtifara, lushi la lushi Yɔsɛfu akatshutshuyamaka dia sala loseka. Ndoko woho wakandakoke mbewɔ di’aha mɛnana la wadi aki nkumɛnde lakatetemalaka la mbotshutshuya dia vɔ mbeyana. L’ekomelo, etena ‘kakawomamɛ wadi aki nkumɛnde,’ nde “akatshiki dihondo lu anya andi, [ko] akalawo l’andja.” Kakɔna kakotshutshuya dia mbewɔ kɔlɔ aha la tshimbatshimba na? Aha la tâmu, kɛnɛ kakaleke ele wɔma wa Nzambi ndo nsaki ka mbewɔ dia “ntsha munga k[ɛsɔ] ka wuki, la tshela [Nzambi] kolo.” (Etatelu 39:7-12) Yɔsɛfu akakoke mɛtɛ mbuta dikambo diande ndamɛ ate: “Dimi mbukaka [Nzambi] woma.”—Etatelu 42:18.
14. Ngande wakɛnya kɛtshi kaki Yɔsɛfu dia nde ekɔ la wɔma wa Nzambi wa mɛtɛ?
14 L’ɔkɔngɔ w’ɛnɔnyi ɛmɔtshi, Yɔsɛfu akayɛnanaka ko la ko nde l’anango wakosondja lo fumbe l’esehe tshɛ. Nde akakoke kamba esadi eto la woho wakayahɛmahɛmaka anango la ndjala ka mbo ya ndɛ oko diaaso dia nde sɔmbɔya kɔlɔ kakawosalɛ. Koko salɛ anto akambo l’epetenge kokoka mɛnya dia nde aki la wɔma wa Nzambi. (Akambu w’Asi Lewi 25:43) Diakɔ diele, etena kakɛnyi Yɔsɛfu dia mɛtɛ anango wambokadimola etema, nde akakimwɛ la nkɛtshi tshɛ. L’ɛnyɛlɔ ka Yɔsɛfu, wɔma wokaso Nzambi ayototshutshuyaka dia nɛndja kɔlɔ la ɔlɔlɔ, ndo tokimanyiya di’aha sho nkɔ l’ohemba.—Etatelo 45:1-11; Osambu 130:3, 4; Romo 12:17-21.
15. Lande na kele dionga diaki Jɔbɔ diakangɛnyangɛnya otema wa Jehowa?
15 Jɔbɔ aki ɛnyɛlɔ kekina ka woke k’onto lakokaka Nzambi wɔma. Jehowa akatɛ Diabolo ate: “We akalimbitela ukambi ami Jobo? Nduku untu la kete uku ndi, untu l’ololo ndu l’usimbwi, latukaka [Nzambi] woma, ndu lambukadimo uma lu kolo.” (Jobo 1:8) L’edja k’ɛnɔnyi efula, dionga diaki Jɔbɔ dia losembwe diakangɛnyangɛnya otema waki She lele l’olongo. Jɔbɔ akokaka Nzambi wɔma nɛ dia nde akeyaka dia ɔsɔ aki dikambo dia dimɛna dia sala ndo yoho ya lɔsɛnɔ yoleki dimɛna. Jɔbɔ akate ate: “Ulungi, woma wa Khumesu mbeli yimba; la anganelu k’uma lu kolo keli ewu.” (Jobo 28:28) Oko wakinde la wadi, Jɔbɔ komendaka esekaseka la sso dia kɔlɔ, kana monga la saki ka kɔlɔ ka loseka l’otema. Kânga mbakinde kanga ɔngɔnyi, nde kɔmbɛkɛ otema ande lo lomombo ndo nde akewɔ woho w’ɔtɛmwɛlɔ wa dikishi tshɛ.—Jobo 31:1, 9-11, 24-28.
16. (a) Lo weho akɔna wakɛnya Jɔbɔ etsha ande w’ɔlɔlɔ? (b) Ngande wakɛnya Jɔbɔ dia nde komombanɛka tokumbɛkumbɛ?
16 Ɔnkɔnɛ, wɔma wa Nzambi kɛdikɛdi sala kɛnɛ kele ɔlɔlɔ ndo tona kɛnɛ kele kɔlɔ. Diakɔ diele, Jɔbɔ akayashaka la ngandji tshɛ le akanga wa totshungu, wa tshumbe ndo le ase wola. (Akambu w’Asi Lewi 19:14; Jobo 29:15, 16) Jɔbɔ akashihodia dia ‘onto tshɛ latona dia salɛ osekande ɔlɔlɔ hatonga nto la wɔma wa Kanga-Nkudu-Tshɛ.’ (Jobo 6:14) Tona dia sala ɔlɔlɔ koka nembetshiya nto tona kimwɛ kana momba kumbɛkumbɛ. Lo ɛlɔmbwɛlɔ kaki Nzambi, Jɔbɔ akalɔmbɛ dikambo di’asekande asato wakawɛnya pâ l’ɛtɛkɛta wa lɔlɛngɔ. (Jobo 42:7-10) Onde sho koka mɛnya woho wa yimba ya kimwanɛka munga ya ngasɔ otsha le osekaso ombetawudi lakoka tosalɛ kɔlɔ lo woho ɔmɔtshi? Naka sho nɔmba l’otema ɔtɔi dikambo di’ɔnɛ lakatosalɛ kɔlɔ koka tokimanyiya efula di’aha mombɛ kumbɛkumbɛ. Ɛtshɔkɔ wakakondja Jɔbɔ l’ɔtɛ wa wɔma wakandokaka Nzambi tɛnyaka ‘akambo w’ɔlɔlɔ efula wamombɛ Jehowa wanɛ wawoka wɔma.’—Osambu 31:19; Jakoba 5:11.
Wɔma wa Nzambi tshikitana la wɔma w’onto
17. Kakɔna kakoka wɔma w’anto tosalɛ, ko lande na kele wɔma ɔsɔ wekɔ l’elelo?
17 Etena kele wɔma wa Nzambi koka totshutshuya dia sala kɛnɛ kele ɔlɔlɔ, wɔma w’onto koka nanya mbetawɔ kaso. Diakɔ diele, lam’akandakeketshaka apɔstɔlɔ dia monga esambisha wa lokumu l’ɔlɔlɔ wele l’ohetoheto, Yeso akawatɛ ate: “Tanyukaki wane wadiaka alimba woma, keli haweyi ndjaka lumu. Keli nyuleki mbuka one lukuki ndjaka ndu lumu ndu dimba lu luwinga la dja woma.” (Mateu 10:28) Yeso akalembetshiya dia wɔma w’anto wekɔ l’elelo nɛ dia anto hawokoke nanya elongamelo kaso ka lɔsɛnɔ la lo nshi yayaye. Lâdiko dia lâsɔ, sho mbokaka Nzambi wɔma nɛ dia sho mbeyaka dia nde ekɔ la nkudu ka mamba koleki nkudu ka wedja tshɛ. (Isaya 40:15) L’ɛnyɛlɔ kaki Abarahama, sho ndjaɛkɛka tshɛ lo nkudu kele la Jehowa ka mbolola ekambi Ande wa kɔlamelo. (Enyelo 2:10) Diakɔ diataso l’eshikikelo tshɛ ɔnɛ: “Naka [Nzambi] eko la su wedi ayeya ntahamela na?”—Romo 8:31.
18. Lo woho akɔna wafuta Jehowa wanɛ wawoka wɔma?
18 Oyadi otunyi aso ekɔ ose nkumbo kana onto latɔhɛnyahɛnya la kalasa, tayɛna dia “one latukaka [Jehowa] woma, keli la usuko a wulu.” (Tukedi 14:26) Sho koka nɔmba Nzambi dia nde tokeketsha teya dia nde ayoka dɔmbɛlɔ diasɔ. (Osambu 145:19) Jehowa hohɛka wanɛ wawoka wɔma pondjo. Oma lo tshimbo y’omvutshi ande Malaki, nde toshikikɛka ate: “Wane wakuki [Jehowa] woma, wakatanela; [Jehowa] akahukama, akuki. Ku buku di’euhwelu diakafundama la ntundu kandi lu dikambu dia wane wakuki [Jehowa] woma, ndu waketawo lukumbu landi.”—Malaki 3:16.
19. Weho akɔna wa wɔma wayokomɛ ndo wɔma akɔna wayotshikala pondjo pondjo?
19 Etena kambosukana kele anto tshɛ wa la nkɛtɛ wayɔtɛmɔla Jehowa ndo wɔma w’onto wayoshila. (Isaya 11:9) Wɔma wa ndjala, wa hemɔ, w’awui wa ngala ndo wa ata wayoshila vɔ lawɔ. Koko, wɔma wa Nzambi wayotshikala pondjo pondjo nɛ di’ekambi ande wa kɔlamelo wa l’olongo ndo wa la nkɛtɛ wayotetemala mbosha dilɛmiɛlɔ diahombama, mbokitanyiya ndo mbosha kɛnɛmɔ. (Enyelo 15:4) Etena kakatakongɛ akambo asɔ, sho tshɛ toyele dako diaki Sɔlɔmɔna diakasambiyama nɛ: “Utema aye tawukaki antu wa kolo kandjema. Keli ukaki [Jehowa] woma tena tshe. Mete mete, ekumelu keko, ndu elungamelu kaye huyala anyanya.”—Tukedi 23:17, 18.
[Nɔtɛ ya l’ɛse ka dikatshi]
a Epalanga ɛmɔtshi ndjokomaka dia mbuta ɔnɛ ewodja ewodja naka olimu wakambawɔ mbahomanyaka mbala la mbala l’akambo wele wâle. Lo ɛkɔnya ɛmɔtshi wakasalema dia mbeya bonde kele etshudi w’abaya efula wakahembɔ lohita lɔmɔtshi, otshudi ɔmɔtshi wa manyi akakadimola tsho ate: “Vɔ hawoyoka si (scie) kana mashinyi wâta abaya watshimba la lowango l’efula lo wolo wa kura wɔma.”
b Jehowa mbɔsaka dionga dia kɔlɔ oko ɛngɔ ka nyɔmi. Ɛnyɛlɔ, Efeso 4:29 mɛnyaka di’ɛtɛkɛta wa mindo wekɔ “diui dia kolo.” Tshɛkɛta ya lo Grɛkɛ yakakambe lawɔ ɔnɛ “kolo” nembetshiyaka elowa, nse, kana mbo ya ndɛ yambɔhɔnda. Etelo ka woho ɔsɔ mɛnyaka nyɔmi kahomba monga laso la ntondo k’ɛtɛkɛta wa kɔlɔ kana wa mindo. Woho akɔ mbele, Afundelo tɛkɛtaka mbala efula dia dikishi oko diangɔ dia ‘mindo.’ (Euhwelu k’Elembe 29:17; Ezekiyele 6:9) Woho wahetshaso kɛnɛ kele nyɔmi kana tumi, tokimanyiyaka dia shihodia nganɛ wɔsa Nzambi woho tshɛ w’ɔtɛmwɛlɔ wa dikishi oko ɛngɔ ka wɔnɔnyi.
c Lo kɛnɛ kendana la bɛnyɛlɔ, sɛdingola ɛkɔndɔ wa l’Afundelo wendana la Kɛna (Etatelu 4:3-12); Davidi (2 Samuele 11:2–12:14); Ngɛhazi (2 Khumi ya Dikanga 5:20-27); ndo Uziya (2 Ekondo 26:16-21).
Onde wɛ akohɔ?
• Ngande wekaso dia petsha kɛnɛ kele kɔlɔ?
• Ngande wakɔnyɔla ase Isariyɛlɛ amɔtshi wa lo nshi ya Malaki diɔtɔnganelo diaki lam’asawɔ la Jehowa?
• Wetshelo akɔna wakokaso kondja oma le Abarahama, Yɔsɛfu, ndo Jɔbɔ lo kɛnɛ kendana la wɔma wa Nzambi?
• Woho akɔna wa wɔma wayotshikala pondjo ndo lande na?
[Osato wa lo lɛkɛ 25]
Ambutshi wa lomba mbidjaka wɔma wa dimɛna l’etema w’anawɔ
[Osato wa lo lɛkɛ 26]
Oko watohandoya wɔma oma lo wâle, wɔma wa Nzambi tongolaka oma lo kɔlɔ
[Osato wa lo lɛkɛ 28]
Jɔbɔ koshisha wɔma wa Nzambi kânga lam’akotondjɛka angɛnyi ande asato wa kashi ɛtɛkɛta wa lɔlɛngɔ
[Efundelo wɛnya kanga]
Oma l’ekadimwelo ka Bible ka Vulgate (Vulgata Latina), 1795