Ɛkɔndɔ W’apandjudi a Diolelo
Akristo wa Mɛtɛ Wayɔhɛnyahɛnyama
OMA KO nshi ya Abɛlɛ, ekambi wa Jehowa efula wekɔ lo mbikikɛ ɛhɛnyɔhɛnyɔ w’oma l’ɛtɛmwɛlɔ. (Luka 11:49-51) Hatokoke mamba nɛ dia Bible mɛnyaka hwe ɔnɛ: “wane tshe walanga [mamema Nzambi lo sangana la, NW] Kristu Jesu, wayusuwa”! (2 Timote 3:12) Omalɔkɔ, ɛlɔ kɛnɛ wamboshimba Ɛmɛnyi wa Jehowa sambisha lo wedja ndekana 25, ndo wekɔ lo mbikikɛ ɛhɛnyɔhɛnyɔ.
Lo wodja ɔmɔtshi wele Ɛmɛnyi wa Jehowa hawoshimbama paka shimbama tsho koko wanyɔkɔmakɔ nto oma le ase ɛtɛmwɛlɔ, apandjudi wa lokumu l’ɔlɔlɔ ndekana 12 000 wekɔ lo tetemala la kamba olimu l’ohetoheto, wekɔ lo mbeka Bible l’anto ndekana 15 000. Koko, wekɔ lo sala olimu awɔ w’esambishelo la yewo. Tena efula, vɔ salaka sanganya yawɔ y’Akristo lo mvudu y’anto, ndo vɔ mongaka la yewo etena kelɛwɔ anto wayasha dia vɔ ndja lo sanganya ya ngasɔ.
Atayala edja kɛnyisha mbolamatadi ɔlɔlɔ ande otsha le Ɛmɛnyi wa Jehowa, wanɛ wokamba efula k’elimu awɔ ɛlɔ kɛnɛ aha l’ɔhɛnyɔhɛnyɔ. Koko, elui efula w’ɛtɛmwɛlɔ wotshikitanyi wekɔ lo mbidja shɛngiya yawɔ dia vɔ tondja ofukutanu.
L’osomba ɔmɔtshi, olui w’anto oko 200 w’oma l’ɛtɛmwɛlɔ wakayayaka, la kɛlɛ tshɛ, oya lo luudu lakasangana yɛdikɔ y’Ɛmɛnyi wa Jehowa 50 lo losanganya lɔmɔtshi la l’etshumanelo. Amɔtshi wa l’olui akɔ wakayɛmbaka abanga ndo wakayadaka toshalemba ta l’ɛtɛmwɛlɔ. Akɛnama hwe dia waki la saki ka mbɔtwɛ Ɛmɛnyi wa Jehowa ko pandjola luudu lakɔ. Akɛnama di’oko ɛnɔmbɔdi w’ɛtɛmwɛlɔ akɔ wakendaka woho wakasalemaka sanganya ko wakakongaka etena k’ɔlɔlɔ ka vɔ mbaɔtwɛ. Kam’akalange olui akɔ w’anto mbɔtɔ lo luudu, apulushi 15 wakakome ko vɔ mbatɛ dia vɔ pandjɔnɛ vɔ tshɛ. Aki dikambo dia diambo efula le Ɛmɛnyi, nɛ dia ndoko onto la l’atei awɔ lotonga l’etena ka mbelɛ apulushi.
Lo tena dikina, atunyi wakahomɔka lokolo l’ɔlɔ. Ɛmɛnyi efula wakalomboshamaka ndo wakadjamaka lo lokanu. Onongo ɔmɔtshi wakatshikala ngango ɛnɔnyi efula hahembɔma, ko wanɛ wakâfunde wakayonyaka yimba. Koko, ewandji w’ɛtɛmwɛlɔ waki lo ngelo kakɔ wakayodjaka shɛngiya, ko tuminadi akayohola onongo akɔ nto, ko ndjonda Ɔmɛnyi ɔmɔtshi ko mbodja lo lokanu.
Lo dihole dikina olui ɔmɔtshi w’Ɛmɛnyi wakasangana lo luudu l’onto ɔmɔtshi dia mbohɔ Dambo dia Nkumadiɔndjɔ dia Dikɔlɔ. L’ɔkɔngɔ diko la dikɔlɔ diakɔ, apulushi wakayonda kanga luudu la ekumanyi kakalɔmbɔlaka losanganya lakɔ. Lam’akawakome lawɔ laka apulushi, vɔ wakakɔmɔla lodui la mamba. Wakalombosha wolo l’edja ka wenya efula. Ɔmɛnyi ɔmɔtshi nto akakikɛ ɔhɛnyɔhɛnyɔ wa tambiyamaka lo difuku di’ashi wa tshitshi wayanga kama.
Lande na kakawandaka apulushi ngasɔ na? Olui okina nto w’ase ɛtɛmwɛlɔ, wakakimanyiyama oma le ewandji w’ɛtɛmwɛlɔ waki lo ngelo kakɔ, waketaka l’apulushi wedi. L’ɔkɔngɔ diko, owandji w’apulushi akayotaka ɔnɛ nde kotoma dui dia vɔ mbanda. Mukanda w’edimanyielo wakayofundamaka, ndo anto wakâkɔmɔlaka wakakondja dilanya.
Ɛmɛnyi wa Jehowa wekɔ lo tetemala la sambisha lokumu l’ɔlɔlɔ la Diolelo diaki Nzambi l’andja w’otondo, oyadi kânga l’atei wa lohetsho la wolo. Vɔ wekɔ lo ndjela dui diaki Yeso diakandate ate: “Nyulungi, dimi lambunyutuma uku ekoko l’atei wa ndjaundu. Okone nyuyali la yewu uku elui, ndu memakana uku fudu ya binga.”—Mateu 10:16.
[Caption]
Abɛlɛ aki onto la ntondo lakahɛnyahɛnyama