Onde wɛ mbohɔka?

Onde wɛ akangɛnangɛna walelo wa numɛlɔ ya Tshoto y’Etangelo yeke ka tomba? Naka ɔsɔku, kete wɛ ayɛna dia ekɔ dimɛna kadimula lo wembola wayela ɛnɛ:

▫ Onde mɛtɛ k’endana l’ɛtɛmwɛlɔ kokaka shihodiama? Yeso akate ate: “Nyu nyayeya akambu wa mete, ku akambu wa mete wayunyutshungula.” (Joani 8:32) Yeso kombuta tsho ɔnɛ mɛtɛ kokaka shihodiama, koko nde akalembetshiya nto ɔnɛ ekɔ ohomba efula kieya dia ɔtɛmwɛlɔ aso mbetawɔma le Nzambi. Nde akatɛ omoto Ose Samariya ate: “Atemodi wa mete wayotemola Papa lu [n]yuma la lu mete.” (Joani 4:23)​—⁠15/4, lɛkɛ 5.

▫ Robert Estienne akinde, ndo woho akɔna wakandatshike ndjembetelo yande? Robert Estienne aki onto ɔmɔtshi laki la yândjo y’ofundelo l’eleko ka 16. Nde akakimɔ lɔsɛnɔ lande tshɛ l’olimu wa fundaka Afundelo w’Ekila ndo akayatshutshuya dia kaloya ɛtɛkɛta wele lo Bible oko akawafundama ntondo. Shambu yande ya kahanya afundelo wa Bible l’avɛsa mbaya shambu yasalema l’ahole tshɛ ɛlɔ kɛnɛ.​—⁠15/4, lɛkɛ 10, 14.

▫ Ngande wakondjaso wâhɔ oma lo walelo wa Bible wa lushi la lushi na? Afundelo tatetemalaka monga l’olembetshiyelo okina le so, ko pɔlɔfɛsi y’endana la nshi y’ekomelo ndekaka tɔtɔmiyama lo yimba yaso lo ndjela kɛnɛ kakatɛnyi, kakatoke, ndo akambo wakatokomɛ shɔamɛ. Oko atataleke mpokɔ akambo watatɛnyi lo lɔsɛnɔ ndo watatakandola ekakatanu, mbatataleke shihodia ohomba w’alako wele lo Bible. (Tukedi 4:18)​—⁠1/5, lɛkɛ 25.

▫ Woho akɔna wakokaso mbohɔka avɛsa wele lo Bible na? Etena kâlayɛ Bible, dja djembetelo l’avɛsa walangayɛ mbohɔka, kana fundawɔ l’akatshi amɔtshi ko wɛ mbakitsha lo dihole diayokoka mbaɛnaka lushi la lushi. Kimɛwɔ l’ɔtɛ, kanaka lawɔ yimba ndo kambaka lawɔ olimu. Tohembake dia kimɛ akambo efula l’ɔtɛ mbala kakɔ ɔtɔi, ondo wɛ ayolembetɛka divɛsa ɔtɔi kana ahende lomingu tshɛ.​—⁠1/5, lɛkɛ 28.

▫ Akambo akɔna watanema lo Evangiliyɔ wa Luka wahatanema l’Evangiliyɔ wakafunde anto akina? Kânga mbele efula k’awui wa lɔkɔ fɔnaka l’ɔkɔndɔ waki Mateo, % 59 y’akambo akina tshikitana. Luka akakɔndɔla ahindo asamalo l’atei w’ahindo waki Yeso ndo akatɛkɛta dia wɛla Ande oleki afundji akina mbala hiende.​—⁠1/6, lɛkɛ 8.

▫ Naa dingadimu di’osase w’endana la mɛtɛ diakɛnyama lo 1935? L’ɔnɔnyi ɔsɔ anto wa Jehowa wakashihodia ɔnɛ olui a woke watawɔ lo Enyelo 7:​9, 14, kondjala olui wa hende wahomba ntshɔ l’olongo, koko wanɛ wele l’elongamelo ka monga la kɛtɛ. (Joani 10:16)​—⁠1/6, lɛkɛ 16.

▫ Lo woho akɔna w’oshika wokokiso keketsha wanɛ wele lo delo na? Tahokame. Takeketsha. Toyatshungwe etena. Tɔshi tɛdikɔ l’etena kasungana. Tofunde mukanda ɔmɔtshi kana kalata k’esambelo. Tɔlɔmbɛ kâmɛ lawɔ. (Jakoba 5:16) Totetemale la mbakimanyiya.​—⁠1/6, lɛkɛ 29, 30.

▫ Kakɔna kokoki anangɛso l’akadiyɛso wa lo nyuma sala dia kimanyiya wanɛ wadjasɛ l’atei a nkumbo yokahanyemi l’akambo w’ɔtɛmwɛlɔ na? Tôngake l’ɛtɛkɛta washa ekeketshelo, w’ɔlɔlɔ ndo wâsamba nshi tshɛ. (1 Tesalonika 5:14) Dikambo sɔ diekɔ oko ekeketshelo lo yimba ndo lo demba diawɔ. Totshu lawɔ l’elimu aso wa Teokrasi la lo tɔkɛnyɔ taso l’etena kasungana ndo kokoki. Tâlɔmbɛ. (Romo 1:9; Efeso 1:16)​—⁠1/6, lɛkɛ 29.

▫ Naa ɛlɔlɔ wakondjaso lam’ongaso la lotutsha etena keso l’olimu w’esambishelo na? Lotutsha kimanyiyaka opandjudi a Diolelo dia nde mbikikɛ wendjodi efula kana wekamu. Ekambi wele la lotutsha wayokoka mbisha kanga ngelo kele djawudi okadimwelo wa la lotutsha kana tomba oma lakande lo ki, ɔnkɔnɛ wayolama wɔladi ndo wayoyala l’ɔngɛnɔngɛnɔ. (Mateu 10:​12, 13) Ndo nto, anto wele oko ɛkɔkɔ wayokotɔma oya lo losango la Diolelo.​—⁠15/6, lɛkɛ 12.

▫ Lande na kele ewo ka mɛtɛ katanema lo Bible ohomba efula ngasɔ na? Ewo ka mɛtɛ totshungolaka oma lo akambo wa kashi, tokanyi t’anyanya ndo dikanyikanyi. Etena kasɛnaso la mɛtɛ kakɔ, tɔ toshaka wolo wa sho mbikikɛ ehemba ndo toshaka elongamelo katokimanyiya dia sho shika la ntondo k’ehemba wa weoho tshɛ.​—⁠1/7, lɛkɛ 8.

▫ Naa ɔkɛndɛ wa ntondo wakɔshi etshumanelo k’Akristo w’akitami oma le Isariyɛlɛ wa l’emunyi na? Diɛsɛ dia sambisha lɔnɛnɛ la Jehowa l’atei a wedja. (Isaya 43:21; 1 Petero 2:⁠9)​—⁠1/7, lɛkɛ 19.

▫ Ɔpɔstɔlɔ Petero akandalange nembetshiya lam’akandate ɔnɛ omi pombaka ‘nɛmiya’ wadiɛnde na? (1 Petero 3:⁠7) Pami kalɛmiya wadiɛnde hôkitshakitsha ndo hawɔnyɔla. Koko, nde mɛnyaka oma l’ɛtɛkɛta ande la lo ditshelo diande​—⁠oyadi lo woshɛshɛ kana lo sɛkɛ​—⁠ɔnɛ nde mbɔ̂saka la nɛmɔ. (Tukedi 31:​10-31)​—⁠1/8, lɛkɛ 18.

▫ Lande na kakokaso mbuta ɔnɛ minya kanga kɔlɔ lahayatshumuya oma l’atei w’etshumanelo k’Akristo ekɔ djembetelo ya ngandji? Wotshanyelo w’oma l’ɔtɛmwɛlɔ ekɔ djembetelo ya ngandji le Jehowa ndo lo mboka yande. (Osambu 97:10) Dui sɔ diekɔ djembetelo ya ngandji le wanɛ watayele losembwe nɛ dia onto tshɛ layoyokoka mbanganyiya la tɔsɛngiya ta kɔlɔ minyamaka; dui sɔ kokɛka ndo pudipudi k’etshumanelo. (1 Koreto 5:​1-13)​—⁠15/7, lɛkɛ 25.

▫ Woho akɔna wakoka mbeyama “ɔhɔmbɔ wa kɔlamelo ndo wa kɛsɔ” wakate Yeso lo Mateo 24:​45-47 (NW), lo nshi yaso nyɛ? Vɔ ndeka mbeyama oma l’olimu wakambawɔ wa tondja ekanda w’endana la Bible, ndakanya ndo sambisha “lukumu l’ololo la diulelu,” ndo oma lo woho wamamemawɔ Bible, Dui dia Nzambi. (Mateu 24:14; 28:​19, 20)​—⁠1/8, lɛkɛ 21.