Wekɔ lo soyama koko wekɔ l’ɔngɛnɔngɛnɔ
‘Lam’ayowonyɔtɛnga, lam’ayowonyosoya, lam’ayowonyomamatanyiya weho tshɛ w’akambo wa kɔlɔ dia dikambo diami, nyekɔ l’ɔngɛnɔngɛnɔ.’—MATEU 5:11.
1. Eshikikelo kakɔna kakasha Yeso ambeki ande lo kɛnɛ kendana l’ɔngɛnɔngɛnɔ ndo l’ɛhɛnyɔhɛnyɔ?
LAM’AKATOME Yeso ambeki ande mbala ka ntondo dia tosambisha Diolelo, nde akawatɛ dia wayohomana l’ɔlɔshamelo. Nde akawatɛ ate: “Nyu nyayuhetshama le antu ne dia lukumbu lami.” (Mateu 10:5-18, 22) Koko, yema tshitshɛ la ntondo ka lâsɔ, lo Dako diande dia lo Dikona, nde akasha apɔstɔlɔ ande ndo anto akina eshikikelo ɔnɛ ɔlɔshamelo wa woho ɔsɔ kopomba shidiya ɔngɛnɔngɛnɔ awɔ w’oma k’ɛse otema. Ɔnkɔnɛ, Yeso akakatanya ɔngɛnɔngɛnɔ la soyama oko Akristo! Ngande wakoka ɛhɛnyɔhɛnyɔ mbela ɔngɛnɔngɛnɔ?
Wekɔ lo soyama l’ɔtɛ w’akambo w’ɔlɔlɔ
2. Lo ndjela Yeso ndo Petero, woho akɔna w’asui washa ɔngɛnɔngɛnɔ?
2 Lo kɛnɛ kendana l’ɔkɔkɔ w’enanɛi wɛnya bonde keso l’ɔngɛnɔngɛnɔ, Yeso akate ɔnɛ: “Wane wambusuyama dia akambu w’ololo, weko la [ɔngɛnɔngɛnɔ], ne dia diulelu dia l’ulungu dieli diawo.” (Mateu 5:10, sho mbɛnganyisha alɛta ango lo sawo nɛ tshɛ.) Sui dɔamɛ hadiela ɔngɛnɔngɛnɔ. Ɔpɔstɔlɔ Petero akafunde ate: “Lutumbu lakona leko, naka nyayetawo l’etetemalu lam’ayuwunyokomola ne dia akambu wa kolo wakanyatshi? Keli naka nyu nyayutsha ololo, la nyayetawo l’etetemalu lam’anyusuyawo, dikambu diako mbetawomaka lu ashu a [Nzambi].” Nde akate nto ate: “Keli omotshi l’atei anyu tasuyamaki uku tomboki, kuyanga uku uvi, kuyanga uku utshi a kolo, kuyanga uku kanga esaku lu akambu wa kana. Keli naka untu omotshi ambusuyama uku usika Kristu, ndi tukaki sonyi, keli ndi atumbuli [Nzambi] lu lukumbu lone.” (1 Petero 2:20; 4:15, 16) Lo ndjela ɛtɛkɛta waki Yeso, asui mbelaka ɔngɛnɔngɛnɔ naka tekɔ lo mbakikɛ l’ɔtɛ w’akambo w’ɔlɔlɔ.
3. (a) Kakɔna kalembetshiya pɛnyahɛnyama l’ɔtɛ w’akambo w’ɔlɔlɔ? (b) Etombelo akɔna waki l’ɛhɛnyɔhɛnyɔ ɛsɔ le Akristo wa ntondo?
3 Nɛmɔ dia losembwe la mɛtɛ ndja oma lo kitanyiya lolango laki Nzambi ndo wadjango ande. Ɔnkɔnɛ, soyama l’ɔtɛ w’akambo w’ɔlɔlɔ nembetshiyaka soyama l’ɔtɛ walɔshanaso la tɔsɛngiya tatotshutshuya dia mɔnyɔla atɔndɔ kana tɛdikɔ taki Nzambi. Apɔstɔlɔ wakahɛnyahɛnyama oma le ewandji w’ase Juda l’ɔtɛ w’otonelo awɔ wa tshika sambisha lo lokombo laki Yeso. (Etsha 4:18-20; 5:27-29, 40) Onde dikambo sɔ diakakitshakitsha ɔngɛnɔngɛnɔ awɔ kana akâkonya dia vɔ tshika sambisha? Kema! “Vo wakamo uma la ntundu k’embadi, watangenangena ne dia vo wakakuki dia monywama dia lukumbu loso. La lushi la lushi lu etemwelo ndu la wakawo, vo kumpeko mbetsha antu la nsambisha [l]ukumu l’[o]lolo vati: Jesu keli Kristu.” (Etsha 5:41, 42) Ɛhɛnyɔhɛnyɔ ɛsɔ akawasha ɔngɛnɔngɛnɔ ndo akanyomoyokeketshaka ohetoheto awɔ l’esambishelo. L’ɔkɔngɔ diko, ase Rɔma wakayɔhɛnyahɛnyaka Akristo wa ntondo asɔ nɛ dia vɔ wakatone tɛmɔla nkumekanga.
4. Naa ɛkɔkɔ ɛmɔtshi wahɛnyahɛnyama Akristo?
4 Nshi yaso nyɛ, Ɛmɛnyi wa Jehowa wekɔ lo pɛnyahɛnyama nɛ dia vɔ tonaka dia tshika sambisha “lukumu l’ololo lone la diulelu.” (Mateu 24:14) Lam’asekɛma nsanganya yawɔ, vɔ mbetawɔka soyama lo dihole dia tshika sanganaka kâmɛ oko wadjanga Bible. (Heberu 10:24, 25) Vɔ wekɔ lo pɛnyahɛnyama l’ɔtɛ wa lomangemange lawɔ l’Okristo kana lam’atonawɔ dia kamba la dikila lo yoho ya kɔlɔ. (Joani 17:14; Etsha 15:28, 29) Koko, woho wamamema ekambi waki Nzambi akambo wa mɛtɛ ɛlɔ kɛnɛ mbaelaka ki ndo ɔngɛnɔngɛnɔ w’efula wa l’etei k’otema.—1 Petero 3:14.
Wekɔ lo tɛngama dikambo dia kristo
5. L’ɔtɛ w’ɔkɔkɔ akɔna wa woke wahɛnyahɛnyama ekambi waki Jehowa ɛlɔ kɛnɛ?
5 Ɔkɔkɔ wa divwa wakasha Yeso lo Dako diande dia lo Dikona wɛnya bonde keso l’ɔngɛnɔngɛnɔ mendanaka l’ɛhɛnyɔhɛnyɔ. Nde akate ate: “Lam’ayuwunyotenga, lam’ayuwunyusuya, lam’ayuwunyumamanyia wehu tshe w’akambu wa kolo dia dikambu diami, nyeko la [ɔngɛnɔngɛnɔ].” (Mateu 5:11) Ɔkɔkɔ woleki woke wahɛnyahɛnyama ekambi waki Jehowa ɛlɔ kɛnɛ ele nɛ dia vɔ bu anto wa lo dikongɛ nɛ di’akambo dia kɔlɔ. Yeso akatɛ ambeki ande ɔnɛ: “Utunyuyala wa la kete, tshiki wa la kete wutulanga asikawo. Ne dia nyu nyaha wa la kete, keli dimi lakanyosonola uma le wa la kete, diako mbanyuhetsha wa la kete.” (Joani 15:19) Lo woho akɔ wâmɛ, ɔpɔstɔlɔ Petero akate ate: “Vo wambamba, ne dia nyu hanyutshu la wo pulu lu akambu wa kolo ako ntu; vo watunyotendaka.”—1 Petero 4:4.
6. (a) Lande na katɛngama ndo kahɛnyahɛnyama atshikadi w’akitami w’esɔ ndo asekawɔ? (b) Onde tɛngɔ shɔ kitshakitshaka ɔngɛnɔngɛnɔ aso?
6 Takɛnyi dia Akristo wa ntondo wakahɛnyahɛnyama nɛ dia vɔ wakatone dia tshika sambisha lo lokombo laki Yeso. Kristo akasha ambeki ande ɔkɛndɛ ɔnɛ: “Nyu nyayuyala emenyi ami . . . l’ekumelu ka kete.” (Etsha 1:8) Atshikadi w’akitami w’esɔ wa anango Kristo wa kɔlamelo wekɔ lo kotsha ɔkɛndɛ ɔsɔ la ekimanyielo k’asekawɔ wa lo “ului a wuki,” wele la kɔlamelo vɔ lawɔ. (Enyelo 7:9) Ɔnkɔnɛ, Satana ayɔlɔ la “an’andi wakatshikala ta [tokanula taki “umuntu,” mbut’ate etenyi k’ɔlɔngɔswamelo wa l’olongo waki Nzambi], wane watukitanyiaka elembe wa [Nzambi], watulamaka diui dia Jesu.” (Enyelo 12:9, 17) Oko weso Ɛmɛnyi waki Jehowa, sho sambishaka kɛnɛ kendana la Yeso, Nkumekanga kalɔmbɔla kakianɛ lo lowandji la Diolelo, layolanya mandji y’ana w’anto yadjɛ anto wekamu otsha l’andja w’oyoyo wosembwe waki Nzambi. (Danyele 2:44; 2 Petero 3:13) L’ɔtɛ wa dikambo sɔ, sho tɛngamaka ndo pɛnyahɛnyamaka koko tekɔ l’ɔngɛnɔngɛnɔ nɛ dia tekɔ lo sowa l’ɔtɛ wa lokombo laki Kristo.—1 Petero 4:14.
7, 8. Emamatanya akɔna wakate atunyi lo kɛnɛ kendana l’Akristo wa ntondo?
7 Yeso akate dia ambeki ande la dia monga l’ɔngɛnɔngɛnɔ kânga etena kele anto “[wayowamamatanyiya] wehu tshe w’akambu wa kolo” dia dikambo diande. (Mateu 5:11) Dikambo sɔ diakakomɛ mɛtɛ Akristo wa ntondo. Etena kaki Paulo lo lokanu la Rɔma lo 59-61 T.D., ewandji w’ase Juda wakate lo dikambo di’Akristo ɔnɛ: “Shu mbeyaka shati: Lu ahuli tshe, antu mvutaka aui wa kolo lu dikambu diawo.” (Etsha 28:22) Vɔ wakasɔngwɛ Paulo nde la Silasi ɔnɛ “wambungayula wa la kete tshe,” lo mbuta dia ‘vɔ wakalɔshanaka la ɛlɛmbɛ waki Kayisa.’—Etsha 17:6, 7.
8 Etena kakandafundaka dikambo dia Akristo lo Ɛlɔmbwɛlɔ ka Diolelo diaki ase Rɔma, ombewi ɔmɔtshi w’ɛkɔndɔ K. S. Latourette akafunde ate: “Wakâsɔngwɛka lo weho wotshikitanyi. Akristo wakɔsamaka oko wanɛ wahetawɔ dia Nzambi ekɔ nɛ dia vɔ wakatonaka dia ndjatambiya lo waa nsɛlɛmɔni y’apanganu. L’ɔtɛ wakawatonaka ndjatambiya l’akambo efula wa l’atshunda w’anto, mbut’ate lo tɔfɛtɛ t’apanganu ndo l’ɛngɛnɔngɛnɔ wa lo sɛkɛ . . .—vɔ wakɔnywamaka ndo wakɔsamaka oko anto wakahetshaka dioho di’anto. . . . Anto wakataka nto di’Akristo w’apami la waa wamato wakahomanaka l’otsho . . . ndo wakayakimɔka l’awui wa mindo wa dieyanelo. . . . Woho wakasalemaka [Eohwelo ka nyɔi kaki Kristo] paka la ntondo k’ambetawudi akayokonyaka anto lo mbuta ɔnɛ Akristo wakalambolaka ɔn’ashashi ndo wakanɔka dikila ndo wakalɛka emunyi waki ɔna ɔsɔ.” Ndo nto, l’ɔtɛ wakatonaka Akristo tɛmɔla nkumekanga, vɔ wakɔsamaka oko atunyi wa Wodja.
9. Ngande wakasale Akristo wa lo ntambe ka ntondo l’ɔtɛ w’emamatanya wakawataka lo lokombo lawɔ, ndo kakɔna kasalema ɛlɔ kɛnɛ?
9 Emamatanya ɛsɔ koshimba Akristo wa ntondo dia kotsha ɔkɛndɛ awɔ wa sambisha lokumu l’ɔlɔlɔ la Diolelo. Lo 60-61 T.D., Paulo akakoke mbuta ɔnɛ ‘lokumu l’ɔlɔlɔ lekɔ lo tɔ elowa ndo lekɔ lo tahame lo nkɛtɛ tshɛ’ ndo ɔnɛ lɔ “la[mbo]sambishama l’etungelu tshe la tshina di’ulungu.” (Kolosai 1:5, 6, 23) Woho akɔ wâmɛ mbasalema ɛlɔ kɛnɛ. Vɔ sɔngwɛka Ɛmɛnyi wa Jehowa oko wakawasale la Akristo wa lo ntambe ka ntondo. Koko ɛlɔ kɛnɛ, olimu wa sambisha losango la Diolelo wekɔ lo tangɔnɛ ndo wekɔ lo mbela wanɛ walisambisha ɔngɛnɔngɛnɔ w’efula.
Wekɔ l’ɔngɛnɔngɛnɔ dia pɛnyahɛnyama oko amvutshi
10, 11. (a) Ngande wakakumiya Yeso ɔsɛdingwelo ande w’ɔkɔkɔ wa divwa wɛnya bonde keso l’ɔngɛnɔngɛnɔ? (b) Lande na kakahɛnyahɛnyama amvutshi? Sha bɛnyɛlɔ.
10 Yeso akakumiya l’ɔsɛdingwelo ande w’ɔkɔkɔ wa divwa wɛnya bonde keso l’ɔngɛnɔngɛnɔ lo mbuta ate: “Nyongenengene . . . , ne dia wakasuya amvutshi waki la ntundu kanyu wuhu ako.” (Mateu 5:12) Amvutshi wakatomama oma le Jehowa dia tewola ase Isariyɛlɛ waki komonga la kɔlamelo konongɔma dimɛna ndo tena efula wakahɛnyahɛnyamaka. (Jeremiya 7:25, 26) Ɔpɔstɔlɔ Paulo akɛnya dikambo sɔ, lam’akandafunde ate: “Ukundi ayumuta ntu? Dihuli hadiukuki dia dimi mbuta dikambu dia . . . amvutshi [akina], dia mbetawo . . . waki la dikambu dia ntengama ndu dia nkomwama, ndu di’ekodi, ndu dia kanu.” —Heberu 11:32-38.
11 Amvutshi efula waki Jehowa wakadiakema la yɔɔmbɔ lo ɛlɔmbwɛlɔ kaki Nkumekanga ka kɔlɔ Ahaba nde la wadɛnde Jezabɛlɛ. (1 Khumi ya Dikanga 18:4, 13; 19:10) Omvutshi Jeremiya akadjama lo lowete ndo l’ɔkɔngɔ diko lo difuku di’ashi diaki la lɔtɛkɛ. (Jeremiya 20:1, 2; 38:6) Omvutshi Danyɛlɛ akakashema lo difuku dia tambwɛ. (Danyele 6:16, 17) Amvutshi asɔ tshɛ wakasɛnaka la ntondo ka Kristo wakahɛnyahɛnyama nɛ dia vɔ wakâmɛka ɔtɛmwɛlɔ wa pudipudi waki Jehowa. Amvutshi efula wakahɛnyahɛnyama oma le ewandji w’ɛtɛmwɛlɔ w’ase Juda. Yeso akelɛ afundji ndo Afarisɛ ɔnɛ: “Tukanula ta andjaki w’amvutshi.”—Mateu 23:31.
12. Lande na kele oko weso Ɛmɛnyi wa Jehowa sho mbɔsaka dia soyama oko amvutshi wa nshi y’edjedja ekɔ tshondo ya diɛsɛ?
12 Ɛlɔ kɛnɛ, oko weso Ɛmɛnyi waki Jehowa, tekɔ lo pɛnyahɛnyama mbala efula l’ɔtɛ w’ohetoheto aso l’olimu w’esambishelo ka lokumu l’ɔlɔlɔ la Diolelo. Atunyi aso wekɔ lo tɔsɔngwɛ dia ‘tekɔ lo munda anto la wolo ko mbaetɛ ambetawudi,’ koko sho mbeyaka dia atɛmɔdi wa kɔlamelo waki Jehowa wa nshi ya ntondo wakahomana l’emamatanya wa woho ɔsɔ. (Jeremiya 11:21; 20:8, 11) Tɔsɛ dia ekɔ diɛsɛ soyama l’ɔkɔkɔ akɔ wâmɛ la wɔnɛ wakasoyama amvutshi wa kɔlamelo wa nshi y’edjedja. Ombeki Jakɔba akafunde ate: “Anyasu, nyendi amvutshi wakataka diui lu lukumbu la Khumadiondjo, vo wayali djimbitelu ya fono la ya etetemalu. Nyulungi, shu mvutaka dia antu wakayakikitsha shati: Weko la [ɔngɛnɔngɛnɔ].”—Jakoba 5:10, 11.
Ɛkɔkɔ wa weke wa monga l’ɔngɛnɔngɛnɔ
13. (a) Lande na keso hatɔkɔmɔ otema l’ɛhɛnyɔhɛnyɔ? (b) Ɛngɔ kakɔna katokimanyiya dia tshikala nge ndo dikambo sɔ alangadiɔ mɛnya?
13 Lo dihole dia sho kɔmɔ otema l’ɔtɛ w’ɛhɛnyɔhɛnyɔ, sho keketshamaka oma lo kanyi y’ɔnɛ tekɔ lo ndjela wanya waki amvutshi, Akristo wa ntondo, ndo waki Kristo Yeso nde ndamɛ. (1 Petero 2:21) Sho kondjaka ɔngɛnɔngɛnɔ w’oma k’ɛse otema oma l’Afundelo, oko wɛnya ɛtɛkɛta wayela ɛnɛ waki ɔpɔstɔlɔ Petero lakate ate: “Elangemi ami, tanyambaki dia akambu wa wulu weli l’atei anyu, wambuya le nyu dia nyuhimba, nyati: Dikambu di’uyuyu diambuya le su. Naka nyu nyambotengama dia lukumbu la Kristu, nyu nyeko la [ɔngɛnɔngɛnɔ], ne dia nyuma ka lutumbu, ndu ka [Nzambi], keko la nyu.” (1 Petero 4:12, 14) Sho mbeyaka oma l’awui wambotɛnaka dia naka tekɔ l’akoka wa tshikala nge la ntondo k’ɛhɛnyɔhɛnyɔ, kete ekɔ paka nɛ dia nyuma kaki Jehowa ekɔ lâdiko diaso ndo tɔ tokeketshaka. Osukɔ wa nyuma k’ekila ekɔ djembetelo yɛnya dia tekɔ l’ɛtshɔkɔ waki Jehowa ndo dikambo sɔ toshaka ɔngɛnɔngɛnɔ wa mamba.—Osambu 5:12; Filipi 1:27-29.
14. Ɛkɔkɔ akɔna wele laso wa monga l’ɔngɛnɔngɛnɔ etena kahɛnyahɛnyamaso l’ɔtɛ w’akambo w’ɔlɔlɔ?
14 Ɔkɔkɔ okina wele ɔlɔshamelo ndo ɛhɛnyɔhɛnyɔ wahomana laso l’ɔtɛ w’akambo w’ɔlɔlɔ toshaka ɔngɛnɔngɛnɔ ele nɛ dia dikambo sɔ mɛnyaka dia tekɔ lo sɛna l’omamemelo wa Nzambi oko Akristo wa mɛtɛ. Ɔpɔstɔlɔ Paulo akafunde ate: ‘Wanɛ tshɛ walanga sɛna l’omamemelo le Nzambi kâmɛ la Yeso wayɔhɛnyahɛnyama.’ (2 Timote 3:12) Tekɔ l’ɔngɛnɔngɛnɔ woleki tshɛ lo mbeya ɔnɛ etena katetemalaso nama olowanyi aso l’atei w’ehemba mbishaka okadimwelo okina lo emamatanya waki Satana w’ɔnɛ ditongami tshɛ diaki Jehowa wekɔ lo mbokambɛ l’ɔtɛ w’eyango awɔ wa lokaki. (Jobo 1:9-11; 2:3, 4) Tekɔ l’ɔngɛnɔngɛnɔ lo woho washaso lonya l’oyindjamelo wa lowandji losembwe laki Jehowa.—Tukedi 27:11.
Totamanya ngɛnangɛna l’ɔtɛ wa difuto
15, 16. (a) Ɔkɔkɔ akɔna wakatosha Yeso dia sho ‘ngɛnangɛna ndo tamanya ngɛnangɛna’? (b) Woshasha akɔna wombami l’olongo dikambo di’Akristo w’akitami w’esɔ, ndo ngande wayokondja “ekoko ekina” w’asekawɔ woshasha?
15 Yeso akasha ɔkɔkɔ okina wa monga l’ɔngɛnɔngɛnɔ lam’ɔnywamaso ndo wahɛnyahɛnyamaso oko amvutshi wa nshi y’edjedja. Otsha l’ekomelo k’ɔkɔkɔ wa divwa wɛnya bonde keso l’ɔngɛnɔngɛnɔ, nde akate ate: “Nyongenengene, nyutamanya ngenangena, ne dia difutu dianyu dieko efula l’ulungu.” (Mateu 5:12) Ɔpɔstɔlɔ Paulo akafunde ate: “Difutu dia akambu wa kolo eli nyoi, keli ushasha a [Nzambi] eli lumu la pundju uma le Jesu Kristu Khumesu.” (Romo 6:23) Eelo, ‘woshasha wa woke,’ ko lɔsɛnɔ ndo lɔ kema difuto diakokaso kondja. Lɔ lekɔ woshasha waha losomba. Yeso akate dia woshasha wekɔ “l’ulungu,” nɛ dia vɔ ndja oma le Jehowa.
16 Akitami w’esɔ wayolongola “dembo dia kusu,” dialembetshiya le wɔ lɔsɛnɔ lahavu kâmɛ la Kristo l’olongo. (Jakoba 1:12, 17) “Ekoko ekina” wele l’elongamelo ka sɛna la nkɛtɛ nongamɛka dia kondja lɔsɛnɔ la pondjo lo nkɛtɛ kayokadimɔ paradiso. (Joani 10:16; Enyelo 21:3-5) Le elui akɔ ehende tshɛ, “ushasha” ɔsɔ kema ɛngɔ kɛmɔtshi kalongolawɔ l’ɔtɛ w’olimu ɔmɔtshi wokambiwɔ. Oyadi akitami w’esɔ kana “ekoko ekina,” vɔ nongolaka difuto diawɔ oma lo “ngandji ka mamba k’utamanya,” kaki Jehowa, kakatshutshuya ɔpɔstɔlɔ Paulo dia mbuta ɔnɛ: “Lusaka le [Nzambi], ne dia ushasha andi waheyana mvuta.” —2 Koreto 9:14, 15.
17. Lande na kakokaso monga l’ɔngɛnɔngɛnɔ lam’ahɛnyahɛnyamaso ndo ‘tamanya ngɛnangɛna’ lo yoho ya didjidji?
17 Le Akristo, wele kombeta edja amɔtshi l’atei awɔ wakahɛnyahɛnyama heyama oma le Nkumekanga Nɛrɔ, Paulo akafunde ate: “Shu tatongenangenaka lu asui asu. Shu mbeyaka shati: Asui watutungaka etetemalu. Etetemalu atutungaka lokewo l’ololo, lokewo l’ololo atutungaka elungamelu. Elungamelu hatutsha sonyi.” Nde akate nto ate: “Nyongenangenaki lu elungamelu; nyuyali la memakana lu asui.” (Romo 5:3-5; 12:12) Oyadi tekɔ l’elongamelo ka ntshɔ l’olongo kana ka nsɛna la nkɛtɛ, woshasha wayotolongola l’ɔtɛ wa kɔlamelo yaso l’atei w’ehemba heyama mbɛdikama kânga l’ɛngɔ ɔtɔi kasunganaso nongola. Tekɔ l’ɔngɛnɔngɛnɔ w’efula l’ɔtɛ w’elongamelo kele laso ka sɛna pondjo pondjo ko kambɛka ndo tombolaka Shɛso ka ngandji Jehowa l’ɛse k’ɛlɔmbwɛlɔ kaki Nkumekanga Yeso Kristo. Lo yoho ya didjidji ‘tekɔ lo tamanya ngɛnangɛna.’
18. Kakɔna kakongɛ ase wedja lam’ele ekomelo kaya suke ndo kakɔna kayosala Jehowa?
18 Lo wedja ɛmɔtshi, Ɛmɛnyi wa Jehowa wakasoyama ndo wakatetemala soyama. Lo prɔfɛsiya kande kendana l’ekomelo ka dikongɛ nɛ di’akambo, Yeso akewola Akristo wa mɛtɛ ate: “Nyu nyayuhetshama lu wedja tshe ne dia lukumbu lami.” (Mateu 24:9) Oko wayaso suke l’ekomelo, Satana ayotshutshuya wedja dia mɛnya lohetsho lawɔ otsha le ekambi waki Jehowa. (Ezekiyele 38:10-12, 14-16) Dikambo sɔ mɛnyaka dia etena ka Jehowa mbɔsa yɛdikɔ kambokoka. “Dimi layenya wedja efula wuki ami la ekila kami. Dimi layuyaenya le wo, ku vo wayeya vati: Dimi keli [Jehowa].” (Ezekiyele 38:23) Jehowa ayokidia lokombo lakinde la woke ndo ayotshungola ekambi ande oma lo ɛhɛnyɔhɛnyɔ. Koko, “untu lakikitala l’ehimba eko la [ɔngɛnɔngɛnɔ].”—Jakoba 1:12.
19. Kakɔna kahombaso sala etena kekeso lo kongɛ “lushi la [Jehowa]” la woke?
19 Oko wamboleka sukana “lushi la [Jehowa]” la woke, nyɛsɔ tɔngɛnɛngɛnɛ nɛ dia ‘tâkakoke dia mɔnywama’ dia lokombo laki Yeso. (2 Petero 3:10-13; Etsha 5:41) L’ɛnyɛlɔ k’Akristo wa ntondo, nyɛsɔ totetemale ‘la mbetsha ndo la mbewoya lokumu l’ɔlɔlɔ lendana la Kristo,’ ndo la Diolelo diande etena kɛnɛ kekeso lo kongɛ woshasha aso lo andja w’oyoyo wa losembwe waki Jehowa.—Etsha 5:42; Jakoba 5:11.
Ovuswelo
• Kakɔna kalembetshiya soyama l’ɔtɛ w’akambo w’ɔlɔlɔ?
• Etombelo akɔna waki l’ɛhɛnyɔhɛnyɔ le Akristo wa ntondo?
• Lande na kakokadiɔ mbutama ɔnɛ Ɛmɛnyi wa Jehowa wekɔ lo pɛnyahɛnyama oko amvutshi wa nshi y’edjedja?
• Lande na kakokaso ‘ngɛnangɛna ndo tamanya ngɛnangɛna’ lam’ahɛnyahɛnyamaso?
[Esato wa lo lɛkɛ 28]
‘Ɔngɛnɔngɛnɔ le nyu, lam’ayowonyɔtɛnga ndo lam’ayowonyɔhɛnyahɛnya’
[Efundelo wɛnya kanga]
Olui w’anto lo lokanu: Chicago Herald-American